1 Gubuꞌ mangan da Abraham impa ungaran apu rini gangan muantsi maranggan imingꞌ gai tsiraꞌ tsiraꞌ mingꞌa Mamri gin da gubuꞌ wasaꞌ da Yawe iwaꞌ da arangan. 2 Abraham iraꞌ i maran da irunt fafun i tsanganda garam iruꞌ da bits bamuntidan. Da gubuꞌ tsanganda ribarangan da arangan iraꞌ i ruan sung angu da irunt ifa rutin da yidzaꞌ fagan da itatapuangꞌ iruꞌ ribarangan maranggan. 3 Da Abraham ini, “O dzi nifutsarifangꞌ! Dzi su u mamaꞌ gumam, da dzi marangꞌ yari iyus i agam bada dzi ungarangꞌ. 4 Wampa asap yaung ani da mpui pas naba da agam wadzuꞌ fagamin. 5 Agam iba dzi maragab ungarangꞌ sib da waga nam isiꞌ pas wasuf i, ida wamus yunga sanabam.”

Da rib iruꞌ da bits igi ini binaꞌ, “Isangꞌ. Wanang nabi u nidan.”

6 Ibinigi da Abraham yatangꞌ sung angu ifa ungar apu rini gangan da Sara da ini da arangan, “Ariꞌ Sara! Sung angu! Wayu parawaꞌ bini 20 kg ugu da wamuat da watai bret fain.” 7 Da arangan irunt ifa makau gan mpada gin da ipiriangꞌ makau narun faꞌ bini mangan da ini da mamaꞌ guman i isa funub da tipa sung angu. 8 Gubuꞌ nam gadan nuꞌa sib da arangan iyu tsis*18:8 tsis: Itip nam gadan igi i makau ma nuning sisu gurun da ibabampaf. da makau sisu gurun da makau tipan ugu iba, da irim da garam igi igan, da Abraham impa tayangꞌ ribarangan imingꞌ yaung wasaꞌ igi.

9 Tuas arangan igut i arangan, “U fininggam Sara impa anungꞌ?”

Da Abraham ini, “Rumpa ungar wasaꞌ.” 10 Da Yawe ini da Abraham, “Waꞌa gubuꞌ bida aruani da udzuf mangan aga da dzi nida tipa badan da u fininggam Sara bungꞌ apingꞌ narun marub mangan sib.”

Sara impa imingꞌ ungar muantsi nifun mingꞌa garam igi barun da irim ringan i nan igi. 11 Abraham da Sara ifufi sib da Sara gubuꞌ gan rima narun intsup sib. 12 Sara irubungꞌ da ini imingꞌ wangunggan ibiani, “Mai, dzi da gabunggangꞌ ifufi sib, da aga rininggangꞌ iraraiꞌ wa. Da aga bu waꞌa da nam nugun tsiaꞌan igi bida anung?”

13 Da Yawe ini da Abraham, “Ibi anungꞌ da Sara irubungꞌ da ini, ‘Dzi fufi sib da isangꞌ i dzi rima narungꞌ?’ 14 Nam mangan wabarabin da Dzi, Yawe, i nangan u. Imaꞌ. Da waringantin. Dzi bungꞌ aba da gubuꞌ aru Dzi nidan da agu da aruani da udzuf mangan aga da Sara bungꞌ arim narun marub mangan sib.”

15 Da Sara irat da itung i ruan da ini, “Dzi warubungꞌ u.”

Da bitsintaꞌ Yawe ini, “Imaꞌ. U rubungꞌ.”

16 Da gubuꞌ ribarangan uriꞌa i fadan da Abraham iyu ifan i tanginda i sanab, da ifa munti da itsangan Sodom iruꞌ. 17 Mingꞌan nigi da Yawe ini i unggan ini binaꞌ, “Dzi nani sisingꞌ i nam Dzi nida nangan ani wasi da Abraham, ma? 18 Abraham tafan rusan bungꞌ awaꞌ nasu garam utup tsiraꞌ mangan ruta nampang, da mingꞌa Abraham da Dzi bungꞌ afinti garam intap wain wain sib angu. 19 I dzi piriangꞌ arangan sib i santingꞌa Dzi sanabangꞌ da narun rusan da tafan rusan waꞌa bampan i atsungꞌa gin da nanga Dzi sanabangꞌ dauman da rururungan angu. Da Dzi bungꞌ anang nam santan dzi ragada arangan gin ugu nasu nidzun.”

20 Ida Yawe ini da Abraham ini binaꞌ, “Dzi ringant i nam rangan tsiraꞌ ampi bingan i raruda garam Sodom da Gomora i uwayant maisan ampi bingan mingꞌa gamp igi. 21 Ibinigi da Dzi bungꞌ aruꞌ da natsangan i maranggangꞌ i nam rangan Dzi ringantagin ani. Da Dzi bungꞌ atsangan da nasruꞌgin.”

22 Da garam iruꞌ igi itangin Abraham rai da iyung ifa i waꞌa gamp Sodom, da bitsintaꞌ Yawe rurut Abraham imunti. 23 Da Abraham iba su uts da Yawe da igutin ini binaꞌ, “Nan nidzun? U bungꞌ asiat garam rururungan nampruꞌ da garam maisan, ma? 24 Bida anungꞌ i bida garam rururungan 50 mpada wasaꞌ i gamp igi, U bungꞌ asiat garam rururungan 50 igi nampruꞌ da garam maisan rai, ma isangꞌ U gantsida gamp igi i garam rururungan 50? 25 U Garam atsungꞌa sanampun rururungan angu i raruda garam intap santan. Da anungꞌ isangꞌ u, i U siata garam rururungan mpruꞌa da garam maisan sangꞌa ruan angu, yaba i garam nanga asub nanggan. Imaꞌ!”

26 Da Yawe ini Abraham nan gan mungaꞌ ibiani, “Bida Dzi tsanganda garam rururungan 50 mpada gamp Sodom da Dzi bungꞌ agantsi gamp i rib igi binganggan.”

27 Da Abraham iraꞌ i nifun da itip ini da Yawe, “O Nifutsarif, wasiat dzi asubangꞌ nida nan babampaf da Agu. Dzi nam utaꞌ santan ibi ngaruntsuaf da pap. 28 Da bitsintaꞌ bida anungꞌ i garam rururungan 50 maꞌan da 45 angu mpada gamp igi, da U bungꞌ asiat sib angu rai i garam 5 maꞌan igi?”

Da Yawe ini, “Bida Dzi tsanganda garam rururungan 45 mpadan, da Dzi wasangꞌ i siata gamp igi rai u.”

29 Abraham itip igut i Yawe ini binaꞌ, “Da bida U tsanganda garam rururungan 40 angu mpadan nigi, da U bungꞌ asiat gamp igi rai, ma?”

Da Yawe itip ini, “Bida Dzi tsanganda garam rururungan 40 mpadan, da Dzi wasangꞌ i siata gamp igi rai u.”

30 Da Abraham itip ini, “O Nifutsarif, nugum anungꞌ ruaꞌa i dzi u, dzi ni rungꞌ guta i Agu, bida anungꞌ i garam rururungan 30 angu mpadan, U bungꞌ asiat rai, ma?”

Da Yawe ini, “Dzi wasangꞌ i siatan bida garam rururungan 30 angu mpadan.”

31 Da Abraham itip ini, “Nifutsarif, wasiat dzi nan gangꞌ ru rima udzungꞌ da Agu gin ani. Bida garam rururungan 20 angu mpadan, da U bungꞌ anang nabi anungꞌ gin?”

Da Yawe ini, “Dzi wasangꞌ i siatan rai bida Dzi tsanganda garam rururungan 20 angu mpada gamp igi.”

32 Da Abraham itip ini, “Nifutsarif, dzi ni gampunda ruangꞌ da Agu da nugum anungꞌ ruaꞌa i dzi u. Dzi ni tipa nida nan bits angu bida ani, bida U tsanganda garam rururungan 10 angu mpadan, da U bungꞌ anang nabi anungꞌ gin?”

Da Yawe ini, “Dzi wasangꞌ i siata gamp igi rai bida Dzi tsanganda garam rururungan 10 angu mpadan.”

33 Gubuꞌ Yawe ruta Abraham nida nan sib, da itangin arangan rai da ifan. Da Abraham itip iba gan gampan.