1 Gubuꞌ mangan da Daina, Yakop narunggan finam riman da Lia ugu, iyung ifan i tsanganda sagat sagat gamp igi. 2 Da Hamor, nifutsarif gamp igi, aranga garam Hiwi da narunggan marub Sekem. Gubuꞌ Sekem tsanganda Daina da iyafi un gin da yuntapin da inang asub in. 3 Da arangan nugunggan imais nidzun angu i Daina da nan isu madamin bingan i untapa i arangan wangunggan. 4 Arangan yaga ramanggan Hamor ini binaꞌ, “Wau sagat aga da dzi i suda dzi fininggangꞌ.”

5 Gubuꞌ Yakop uda sisingꞌ i arangan narunggan finam igi waꞌa da sanab asub, da wanang nam mangan u, i narun ruas ifa sib i mpada tayangꞌ apu santan, da impa ntras angu. 6 Da Sekem ramanggan Hamor ifa i ruta Yakop tipa nan igi. 7 Gubuꞌ Yakop narun rusan mingꞌa gum bawaꞌan da ba ringanta i nan da nugun itsakia tsiraꞌ bingan, i Sekem nanga sanab asub i ribarangan nafunggan da nigi isu miaꞌ tsiraꞌ bingan da Israil utupan. Uwayant bida nigi anungꞌ sanab bini mangan u.

8 Hamor ini da Yakop da narun rusan ibiani, “Dzi narunggan Sekem wangungan iyu u narunggam finam aga nidzun angu. Dzi gaib runggangꞌ da agam i agam rima Daina suda arangan fininggan. 9 Nam uda ruan namingꞌ wasaꞌ i agam da agai; warim narum rusam finam da agai da wau aga narungꞌ rusangꞌ finam nasu agamam nabinigi. 10 Da wampa wasaꞌ i agai; intap rumingꞌ da wampa gin da wanang gumam in nasangꞌ maranggam furan da wayu intap fain nasu u nanggam.”

11 Da Sekem ini da Daina nafun rusan da ramanggan ini binaꞌ, “Dzi gaib runggangꞌ da agam; dzi ni uda agam nafunggam suda dzi fininggangꞌ. Dzi bungꞌ arim nam ntsuman idzuwai agam gutagin. 12 Warim nam bunump gudzunggan. Bida agam maram fura i rima tsiraꞌ bingan, da wani, da dzi bungꞌ arim, bida agam rima mamaꞌ finam arigi da dzi suda dzi fininggangꞌ.”

13 Da bitsintaꞌ Yakop narun rusan yi-iyuꞌ Sekem da Hamor i nam idzuwai Sekem nanga da ribarangan nafunggan Daina. 14 Da ini binaꞌ, “Aga wasangꞌ atsunga sanab bida arigi. Aga wasangꞌ i rima nafunggangꞌ da garam mangan mamida i safa riniubit u. Nigi bungꞌ asu rinin miaꞌan tsiraꞌ da agai. 15 Aga sangꞌ i nida nifungꞌ da agu i uda arangan bida u nanga nam bida aruani suda miamun: agu da garam gampam ani sib angu nasaf riniubit nabi agai. 16 Ida aga bungꞌ arim narungꞌ rusangꞌ finam da agam, da nayu agamam. Da aga bungꞌ ampa wasaꞌ i agam da nasu garam utup bitsintaꞌ. 17 Da bitsintaꞌ bida agam buginda i safa riniubit, da aga bungꞌ ayu nafunggangꞌ da narut afan.”

18 Hamor da narunggan Sekem itsanga ribarangan nan gan nidan igi iwaꞌ bini angu. 19 Da Sekem nugun itsiaꞌ i uda Yakop narun finam igi da iyu nan igi iyab sung angu. Da arangan ramanggan utupan itsarif arangan isarimp ramanggan Hamor. 20 Ibinigi da Hamor da narunggan Sekem ifa gan gampan igi mumai gan mpruꞌa maran gin da ini nan wasi da gan garaman sib angu ibiani, 21 “Garam utup igi isu agi rinungꞌ rusangꞌ nidzun. Agi natangin ribarangan nampa agi intapangꞌ da nanang guman gin nasangꞌ maranggan furan. Intap ani tsiraꞌ bingan isangꞌ agi da ribarangan. Da agi sangꞌ i uda ribarangan narun rusan finam da ribarangan isangꞌ i uda agi gangꞌ. 22 Da bitsintaꞌ rib igi bungꞌ ani nifun i ruta agi mpruꞌa ruangꞌ mpada suda garam utup bitsintaꞌ bida agi nanga nam bitsintaꞌ angu bida ani: garam sib angu nasaf riniubit nasangꞌ ruan, nabi ribarangan nangan. 23 Bida agi nanga bida nigi da ribarangan makau gan da apu gan da nanggan santan bungꞌ asu agi gangꞌ. Ibinigi da agi nanang nam ribarangan nidan igi da ribarangan bungꞌ ampa wasaꞌ i agi.” 24 Garam gamp igi santan iringant i nan igi, da sib angu irut Hamor da narun Sekem isaf riniubit.

25 Gubuꞌ iruꞌ da bits ntsupan da garam santan rungꞌ mpadan da tsakia tsiraꞌ da Yakop narun rusan iruꞌ, Simion da Liwai, Daina nafun rusan igi, iyu bainatan da yatangꞌ gamp isu nam runta fafun da yis garam da mamaꞌ marub gamp igi sib angu funub. 26 Da yis Hamor da narunggan Sekem funub da iyu nafunggan Daina i Sekem ungaran da irut ifa gan arun. 27 Yakop narun rusan fain iba tsangan garam santan mampa sib da iyu nam santan mingꞌa gamp igi iyab i Sekem nanggan maisan nanga i ribarangan nafunggan. 28 Ribarangan iyu dumpa, nuning, makau da dongki impruꞌ da nam mingꞌa gamp wasaꞌ da mingꞌa manaꞌ santan. 29 Ribarangan iyu rib igi nam bunumpan mara maran sib angu impruꞌ da sagat da mamaꞌ narun da nam idzuwai mingꞌa ungar wasaꞌ santan.

30 Ntsupa sib da Yakop ini da Simion da Liwai ini binaꞌ, “Aruani da agam irim barabin tsiraꞌ bingan angu da dzi, da inang dzi binganggangꞌ imais. Garam Kanan da Peris mpada intap ani bungꞌ abugin dzi nidzun angu. Agi anungꞌ ampi bingan u. Garam gamp ani bida mpruꞌa ruan da udzuda nan sib i waꞌa gamp da bungꞌ ais agi sib.”

31 Da bitsintaꞌ Yakop narun rusan iruꞌ igi ini i nan gan mungaꞌ ibiani, “Aga tusa marangꞌ i garam bida nigi i nanga sanab asub yaba i aga nafunggangꞌ bida arangan sagat sanab mangan, a?”