1 Gaolliqthu
Gevq-a nail gaq
1 Haoqgavq niil keiv iqmoeq ilmoeq bhai maqkhaiq, haoqnao naosaq bhai maqkhaiq, Gaqkhoel Paolluv aivq-i mail gevq-a nail ngaol dai, gevq-ai thaq nail ngaol. Al ovqtavq, Milnee uqnee khe Khali yaq juq iqsanl, Paolluv-i mail gevq-a nail ngaol dai, noeq nail ngaol.
Gevq-a nail aqyanq khi mail aqduq
Gevq-a nail aqyanq neq, A.D. 55 kovq niidai bhai gevq-a nail ngaol. Paolluv milkhaoq doi dai lavqkhiq tsail nail geeqlaoq daoq cavq cavq-ail tsao nail hail pov teevq pov bhai, Eilpheilsu meenq-ai jaol khi gevq-a nail ngaol.
Khaq sil gaq bhai gevq bhiq-a nail
Haoqgavq niil keiv neq, Gaolliqthu meenq bhai jaol nail Khali yaq munl juq bhai gevq bhiq-a nail ngaol. Paolluv milkhaoq doi dai lavqkhiq tsail nail geeqlaoq daoq cavq cavq-ail tsaol nail nvq pov teevq pov bhai, Gaolliqthu meenq khe tsaol-aq juq Khali yaq pevq lal khi, Khali yaq nail munl bhi pevq lal-a nail ngaol. Gaolliqthu nail meenq neq, meenq meenq ma teevq meenq pevq khi, jaiq gaiq jaiq kha kha nail meenq pevq nail ngaol. Al ovqtavq, thaoqphaoq aqma maolkhoel bhai uqhuq thaoq nail ilkhaol maodai jiav khi khaqmiq sev nail phaq iqsanl, maodai jiav nail ngaol. Meenq al meenq nail lavqkhoel bhai jaol nail tsaol-aq juq neq, yaqkav jiovq nail juq liq sainv gaq niidai jaol khi, yaqkav maq ngel nail juq neq, nvq sainv ngaq meel-nvq gaq niidai jaol nail meenq pevq nail ngaol.
Khul bhai noeqthunq khi gevq-a nail
Yanq al yanq bhai Gaolliqthu meenq khe jaol nail Khali yaq munl neq, noeq bheeq khi maq gov heeq nia nail ganl maodai jiav nail ngel-i mail, Paolluv teevq phaq gil-a neq, teevq phaq aqmeeq-ai cavq bhiq cov bhiq nail haqbhoil gevq-a nail ngaol. Al ovqtavq, Gaolliqthu meenq khe Khali yaq munl Miqyail nail geeqlaoq eeljaol ya khi ngaol-aoq, aqhaqlal phao yaqbeiv khe-ai dul nail ngel-i mail, bhi eeq lal nail haqbhoil iqsanl cavq bhiq cov bhiq-a nail ngaol.
1
Iqmoeq ilmoeq khe daoq
1-2 Ngal neq, Yeiqsul Khali nail gaqkhoel Paolluv ngaol. Miqyail neema tsaq nail ngel-i mail, “Naol ngaq nail gaqkhoel jiovq yaoq” dai, aivq ngaq bhai khul lavq-a nail ngaol. Aqivq jaqbheq Solthai nv-nvq gaq, Gaolliqthu meenq bhai jaol nail Khali yaq juq bhai haoqgavq niil gevq bhoel-ai lavq-a nail ngaol. Nuljuq neq, Yeiqsul Khali bhaqda nee Miqyail nail tsaol-aq pevq lal-a nail ngaol. Al ovqtavq, meeq nail haol nail tsaol-aq bhi pevq lal dai iqsanl, Miqyail nuljuq bhai khul-ai thaq nail ngaol. Ngadao nail Heeqphaq Yeiqsul Khali nail aqmil bhai khal hal nail khaq bha jaol nail tsaol-aq bhai maqkhaiq, haoqgavq niil gevq bhiq-a nail ngaol. Aivq neq, ngadao nail Heeqphaq teevq-eel maq ngel-ail. Aqyu juq nail Heeqphaq iqsanl ngel nail ngaol.
3 Ngadao nail Aqbhu Miqyail khi Heeqphaq Yeiqsul Khali nail geeqlaoq eeljaol khi neesal-ovq nail phaq nuljuq nail kovtavq bhai jiav dei-eiq.
Geeqlaoq eeljaol ya-a nail ngel-i mail, Miqyail bhai tsiq eeq nail ganl
4 Nuljuq bhaqda nee ngal khaq mao iqsanl Miqyail bhai tsiqeeq naol. Khul khi mail dai ngal-aq neq, Yeiqsul Khali bhaqda nee nuljuq Miqyail nail geeqlaoq eeljaol ya-a nail ngaol. 5 Yeiqsul Khali bhaqda nee, yaoq phaq yaoq-ao nee nail lavqkhoel nuljuq bhee lal-aoq nail ngaol. Daoq ge nail maqkhaiq, neenoeq neekha maqkhaiq, bhee lal-aoq nail ngaol. 6 Alhai bhee lal-a nail bhaqda nee, Khali nail ganl nv-nvq gaq salkhil khanq nail khe-ai tsaq-ail nial dai, nuljuq nail lavqkhoel bhee lal thailthaiq nail bhai, yu ya moel-a nail ngaol. 7 Alheel ngel-i mail, ngadao nail Heeqphaq Yeiqsul Khali dov lee nail bhai daonq-u phao, nuljuq nail lavqkhoel bhai aqhaqlal phaoq khe kovpavq bhee lovq nail ngaol. 8 Ngadao nail Heeqphaq Yeiqsul Khali nail aqn n-gaol, nuljuq nail kovtavq bhai oeqbal thaq duq maq jiav dai, haoqnao naosaq kev dai, aivq nuljuq bhai bhi ivq nail ngaol. 9 Ngadao nail Heeqphaq pevq nail aivq nail Yaqyov Yeiqsul Khali bhai tavq lai kivq dai, nuljuq bhai khul dov-a nail Miqyail neq, saljial ivq nail Miqyail pevq nail ngaol.
Khali yaq munl pav ail-a nail ganl
10 Aqivq jaqbheq juq-ol, ngadao nail Heeqphaq Yeiqsul Khali nail aqmil bhaqda nee ngal nuljuq bhai niailhai hal nail ngaol. Nuljuq teevq gaq nee teevq gaq tsaq lai jil lai yaoq. Nuljuq nail gaiqlaq bhai munl thaq bhoilpav. Neema teevq heeq taivq-ail, neenoeq needul teevq phaq taivq-ail tavq khi, aqmeeq-ai tsaq lai jil lai yaoq. 11 Aqivq jaqbheq juq-ol, nuljuq iqdaiq iqtsai dov nail ngaol dai, Khaqlaol-iv nail ildaoq juq ngaq bhai ge lavq-a nail ngaol. 12 Ngal niailhai ge movq-ail nial. Nuljuq ge nail: “Ngal neq, Paolluv nail tsaol-aq ngaol. Ngal neq, Aqpaolluv nail tsaol-aq ngaol. Ngal neq, Geiqphal nail tsaol-aq ngaol. Ngal neq, Khali nail tsaol-aq ngaol” dai, nuljuq nail gaiqlaq bhai ge nail ngaol.
13 Khali neq, he pav he sav nail gaq laiq. Paolluv nuljuq nail haqbhoil lavqyavq kovtavq bhai khanqsil-a nail laiq. Maq ngel haq neq, Paolluv nail aqmil kov-uvq nee nuljuq ulcuvq saol-a nail laiq. 14 Gaqlilphul khi Gaqyul, aqyu nvq gaq bhai maq ngel nail neq, nuljuq nail lavqkhoel bhai ngal teevq gaq bhai iqsanl ulcuvq maq saol bhiq-a nail ngel-i mail, ngal lavqkhiq tsail-ail nial. 15 Alheel ngel-i mail, ngaq nail aqmil kov-uvq nee ulcuvq saol-a nail ngaol dai, teevq gaq-ail maq ge kivq-ail. 16 (Ngal Saqteiqphaq phaqyaq mayaq bhai iqsanl ulcuvq saol bhiq-a nail ngaol. Al juq bhai maq ngel nail neq, ngal yaoq juq yaoq bhai ulcuvq saol bhiq-a nail dai, maq noeq-ail.) 17 Khul khi mail dai ngal-aq neq, ulcuvq saol bhiq-ail yaoq dai, Khali ngaq bhai khoel nail maq ngel-ail. Lavqkhiq tsail nail geeqlaoq daoq cavq-ail yaoq dai, khoel nail ngaol. Geeqlaoq daoq al cavq bhiq-u phao, Khali lavqyavq kovtavq-ai khanq sil-a nail al aqdeq maq ya deq-ail dai, ngal miltsaq bhai tavq nail neenoeq neekha nail daoq bhai maq juq dai, cavq bhiq cov bhiq-a nail ngaol.
Khali neq, Miqyail nail bhaqaoq khi Miqyail nail neenoeq neekha ngaol
18 Lavqyavq nail ganl daoq cavq daoq cov cov-u phao, luq-ail seil-ail thailthaiq nail tsaol-aq nail haqbhoil neq, neenoeq neekha maq aol nail daoq pevq nail ngaol. Thailhai ngaol-aoq, hevqkovq nail phaq ya-a nail ngadao nail haqbhoil, daoq al daoq neq, Miqyail nail bhaqaoq pevq nail ngaol. 19 Jalliq lavqkhoel-ai gevq-ai thaq nail khe-ai,
“Miqyail ge nail:
‘Ngal neq,
neenoeq neekha
aol nail tsaol-aq nail
neenoeq neekha bhai
lav cov khi,
tselpav bhoilpav nia nail
tsaol-aq nail
tselpav bhoilpav nia nail
phaq bhai aqnieivq-ail
bhi pevq ail naol’ ” dai,
gevq-ai thaq nail ngaol.
20 Neenoeq neekha aol nail tsaol-aq khaq. Aoldaoq kovqdaoq cavq nail cov nail tsaol-aq khaq. Miltsaq yaq juq nail lavqkhoel, mee nia phaq heeq nia khi jil pheeljaq movq nail tsaol-aq khaq. Miqyail miltsaq nail neenoeq neekha bhai khul nail ganl maq tsoiq nail phaq bhi pevq lal-a nail, maq ngel-ail laiq. 21 Khul khi mail dai ngal-aq neq, tsaol-aq yaq juq yovqgavq nail neenoeq neekha bhaqda nee Miqyail bhai maq bhi heeq nia lal dai, Miqyail aivq nail neenoeq neekha bhai juq khi noeqceiv-ai thaq nail ngaol. Alheel ngel-i mail, neenoeq neekha maq aol-ail dai, yu-i mail saol-nvq-ai thaq nail lavqkhiq tsail nail geeqlaoq daoq bhai neema thaqtsaol nail tsaol-aq bhai hevqkovq nail neq, Miqyail neema tsaq nail ngaol. 22 Yuldav nail tsaol-aq, bhi heeq bhi moel nail juq hal daiq nail ngaol. Heiqlaqsal tsaol-aq, neenoeq neekha halpov nail ngaol. 23 Thailhai ngaol-aoq, lavqyavq kovtavq bhai khanq sil-a nail Khali nail ganl nvjuq daoq cavq cavq nail ngaol. Ganl niil neq, Yuldav nail tsaol-aq nail haqbhoil phaqthiq thiq nail phaq pevq khi, yu nail jeq-e jaq-a nail haqbhoil neenoeq neekha maq aol nail phaq pevq nail ngaol. 24 Thailhai ngaol-aoq, Miqyail-i mail khal khul-ai thaq nail tsaol-aq, Yuldav nail tsaol-aq maqkhaiq, Heiqlaqsal tsaol-aq maqkhaiq, Khali neq, Miqyail nail bhaqaoq khi Miqyail nail neenoeq neekha pevq nail ngaol. 25 Miqyail nail neenoeq neekha maq aol nail phaq neq, tsaol-aq yaq nail neenoeq neekha nee maqtsil eeq nail ngaol. Miqyail nail gaq bhaq nail phaq neq, tsaol-aq yaq nail gaq kav nail nee maqtsil kav nail ngaol.
26 Aqivq jaqbheq juq-ol, Miqyail nuljuq bhai khul-a nail bhai saol-nvq daiq. Miltsaq nail neenoeq neekha phao saol-nvq daiq haq neq, khul-ai thaq nail tsaol-aq nail lavqkhoel neenoeq neekha aol nail tsaol-aq maq mao-ail. Aqmil dov nail tsaol-aq iqsanl maq mao-ail. Eeq nail heel nail jeq-e jaq-a iqsanl maq mao-ail. 27 Neenoeq neekha aol nail juq bhi haqsil nail dai khi, miltsaq yaq-i mail neenoeq neekha maq aol-ail dai, saol-nvq-ai thaq nail juq bhai, Miqyail tsel dov-a nail ngaol. Gaq kav nail juq bhi haqsil nail dai khi, gaq maq kav-ail dai, miltsaq yaq-i mail saol-nvq-ai thaq nail juq bhai, Miqyail tsel dov-a nail ngaol. 28 Miltsaq yaq juq-i mail ganl tsoiq naol dai, saol-nvq nail phaq bhai ganl maq tsoiq-ail bhi pevq-ail nail haqbhoil, miltsaq yaq-i mail seiqleiq khaoqsail maq jiav, ganl maq tsoiq-ail dai, thaqtheq-ai thaq nail juq bhai, aivq tsel dov-a nail ngaol. 29 Alheel ngel-i mail, Miqyail nail sivtavq bhai tsaol-aq teevq gaq-ail neema eeq duq maq jiav-ail. 30 Miqyail bhaqda nee, nuljuq Yeiqsul Khali nail lavqkhoel-ai ya jaol-a nail ngaol. Ngadao nail haqbhoil neenoeq neekha, tsaq nail daol nail phaq, meeq nail haol nail phaq khi, hevqkovq nail phaq, Miqyail Yeiqsul bhai bhi pevq lal-a nail ngaol. 31 Alheel ngel-i mail, Jalliq lavqkhoel bhai gevq-ai thaq nail khe-ai,
“Neema eeq nail tsaol-aq,
Heeqphaq Miqyail nail
lavqkhoel bhai taivq-ail
eeq dei-eiq” dai,
gevq-ai thaq nail ngaol.