1 Ngal mailma-ail gaiq-a nail yaq juq-ol, nuljuq oeqbal maq ya nl dai, ganl niil juq ngal nuljuq bhai gevq bhoel-ai leevq-a nail ngaol. Thailhai ngaol-aoq, teevq gaq ganav oeqbal nl laiq lao haq neq, ngadao nail haqbhoil thaoq hal nail gaq Aqbhu Miqyail nee mail jaol nail ngaol. Aivq neq, tsaq nail daol nail gaq pevq nail Yeiqsul Khali ngaol. 2 Aivq neq, ngadao nail oeqbal nail haqbhoil laol bhiq-a nail gaq ngaol. Ngadao nail oeqbal taivq-ail maq ngel nail, tsaol-aq yaq yaoq gaq yaoq-ao nee nail oeqbal bhai iqsanl laol bhiq-a nail ngaol. 3 Heeqphaq Yeiqsul-i mail bivq-ai thaq nail daoq bhai naldaiq haq neq, ngadao aivq bhai heeq kivq nail ngaol dai, aqduq bhao nail ngaol. 4 “Ngal aivq bhai heeq kivq naol” dai, tsaol-aq teevq gaq ganav ge khi ngaol-aoq, aivq-i mail bivq-ai thaq nail daoq bhai maq naldaiq haq neq, tsaol-aq al gaq goiqbhaoq bhaoq nail tsaol-aq ngaol. Aivq nail lavqkhoel bhai maldil tsaq nail phaq maq aol-ail. 5 Thailhai ngaol-aoq, Yeiqsul Khali nail daoq khal naldaiq nail tsaol-aq khul gaq maqkhaiq, Miqyail nail goil nail gaiq-a nail phaq aivq nail lavqkhoel bhai maldil bhee lal nail ngaol. Ngadao aivq nail lavqkhoel bhai jaol nail ngaol dai, niailhai ya heeq kivq nail ngaol. 6 “Ngal aivq nail lavqkhoel bhai jaol nail ngaol” dai, khal ge nail tsaol-aq Yeiqsul Khali doevq-a nail khe-ai, ya doevq nail ngaol.

7 Ngal mailma-ail gaiq-a nail aqtsaoq juq-ol, ngal nuljuq bhai gevq bhoel-ai leevq-a nail niil neq, daoq aqsivq bivq nail maq ngel-ail. Iqmoeq-u nee mail nuljuq bhai bivq thaq-ail ceevq khi, nuljuq iqsanl heeq nia nail daoq aqlil al daoq gevq bhoel-ai leevq-a nail ngaol. Bivq thaq-ail ceevq-a nail daoq aqlil al daoq neq, nuljuq gaiq daiq-a nail daoq al daoq ngaol. 8 Thailhai ngaol-aoq, niil aq-il neq, ngal nuljuq bhai gevq bhoel-ai leevq-a nail daoq aqlil al daoq neq, aqsivq iqsanl pevq nail ngaol. Daoq al daoq neq, Yeiqsul bhaqda nee bhee lal khi, nuljuq nail lavqkhoel bhai iqsanl bhee lal thailthaiq nail ngaol. Khul khi mail dai ngal-aq neq, aqnav peivq ail khi, maldil aqbhaq niil aq-il iqsanl, bhaq dol lavq thailthaiq nail ngaol.

9 Tsaol-aq teevq gaq ganav, “Ngal aqbhaq nail lavqkhoel bhai jaol naol” dai, ge khi ngaol-aoq, aivq nail aqivq jaqbheq bhai neejiav jiav haq neq, aivq neq, aqnav nail lavqkhoel bhai jaol-ai haq nail ngaol. 10 Yovqgavq nail aqivq jaqbheq bhai gaiq-a nail tsaol-aq, aqbhaq nail lavqkhoel bhai jaol nail ngaol. Aivq bhaqda nee yu phaqthiq thiq lai duq maq jiav-ail. 11 Yovqgavq nail aqivq jaqbheq bhai neejiav jiav nail tsaol-aq, aqnav nail lavqkhoel bhai jaol khi, aqnav nail lavqkhoel bhai tsao nail ngaol. Aqnav al neq, aivq bhai maivpeivq bhi peivq ail-a nail ngel-i mail, aivq khaq bha ail thailthaiq nail bhai maq heeq nia-ail.

12 Yaq juq-ol, Yeiqsul nail aqmil bhaqda nee nuljuq nail oeqbal phaiq lavq-a nail ngaol. Alheel ngel-i mail, ngal nuljuq bhai haoqgavq niil gevq bhoel-ai leevq-a nail ngaol. 13 Aqbhu juq-ol, iqmoeq-u nee mail doevq nail jaol nail gaq bhai heeq nia nail ngel-i mail, ngal nuljuq bhai haoqgavq niil gevq bhoel-ai leevq-a nail ngaol. Yaqyov-aq yaqnoil juq-ol, haqeiv nail gaq bhai gaq lai-a nail ngel-i mail, ngal nuljuq bhai haoqgavq niil gevq bhoel-ai leevq-a nail ngaol. Yaq juq-ol, Aqbhu Miqyail bhai heeq nia nail ngel-i mail, ngal nuljuq bhai haoqgavq niil gevq bhoel-ai leevq-a nail ngaol. 14 Aqbhu juq-ol, iqmoeq-u nee mail doevq nail jaol nail gaq bhai heeq nia nail ngel-i mail, ngal nuljuq bhai haoqgavq niil gevq bhoel-ai leevq-a nail ngaol. Nuljuq yaqyov-aq yaqnoil juq-ol, aqhaqlal phao gaq kav nail nee ovqtavq, Miqyail nail daoq nuljuq nail lavqkhoel bhai aol khi, nuljuq haqeiv nail gaq bhai gaq lai-a nail ngel-i mail, ngal nuljuq bhai haoqgavq niil gevq bhoel-ai leevq-a nail ngaol.

15 Miltsaq nail aol bhai maqkhaiq, miltsaq kovtavq bhai jiav nail phaq bhai maqkhaiq, thaq gaiq-a. Tsaol-aq teevq gaq ganav miltsaq nail aol bhai gaiq-a haq neq, Aqbhu Miqyail nail goil nail gaiq-a nail phaq aivq nail lavqkhoel bhai maq aol-ail. 16 Khul khi mail dai ngal-aq, miltsaq kovtavq bhai khal jiav nail yaoq phaq yaoq-ao nee, aqsivq haqjoil phao oil movq nail phaq maqkhaiq, maivneev moel khi oil movq nail phaq maqkhaiq, phul heel ildaoq maoqgaiq bhaqda nee neema eeq nail phaq maqkhaiq, Aqbhu Miqyail nee mail dov lee-a nail maq ngel-ail. Miltsaq yaq nee mail dov lal-a nail ngaol. 17 Miltsaq nail aol khi mail miltsaq bhai tavq nail neekhaol jiav nail juq neq, peivq-ail thailthaiq nail ngaol. Thailhai ngaol-aoq, Miqyail neema tsaq dai, nl nail tsaol-aq nqmaq maqluv halyeel ya doevq nail ngaol.

18 Ngaq nail yaq juq-ol, aqyanq niil neq, haoqnao naosaq khe yanq ngaol. Khali bhai genl dev nail gaq dov lee nail ngaol dai, nuljuq ya gaiq-a nail khe-ai, niil aq-il iqsanl Khali bhai genl dev nail maodai gaq dov lee-a nail ngaol. Alheel ngel-i mail, yanq niil yanq neq, haoqnao naosaq khe yanq nial dai, ngadao heeq kivq nail ngaol. 19 Tsaol-aq al juq ngadao nail munl nee mail dov ail-a nail ngaol. Aqyu juq ngadao nail munl lavqkhoel bhai jaol-u phao iqsanl, ngadao nee mail maq tavq-ail. Khul khi mail dai ngal-aq, aqyu juq ngadao nee mail tavq lao-aol kheel nul, ngadao juq nee mail jaol-ai haq nail ngaol. Thailhai ngaol-aoq, aqyu juq yaoq gaq yaoq-ao nee ngadao juq nee mail maq tavq-ail dai, bhaqlaoq kheq dai bhi dov lal nail dai khi, ngadao juq nail munl nee mail dov ail-a nail ngaol. 20 Thailhai ngaol-aoq, nuljuq nail kovtavq bhai Meeqnail Haolnail Aqhaqlal hoeldav bhiq gaq-ao nail ngel-i mail, nuljuq iqsanl mail, maldil tsaq nail phaq bhai heeq nia nail ngaol. 21 Nuljuq maldil tsaq nail phaq bhai maq heeq nia nail ngel-i mail, ngal nuljuq bhai haoqgavq niil gevq bhoel-ai leevq-a nail maq ngel. Nuljuq maldil tsaq nail phaq bhai heeq nia khi, goiqbhaoq bhaoq nail khul phaq maqkhaiq, maldil tsaq nail phaq nee mail maq tavq-ail dai, nuljuq heeq nia nail ngel-i mail, ngal nuljuq bhai haoqgavq niil gevq bhoel-ai leevq-a nail ngaol. 22 Thailhai phal-iq, goiqbhaoq bhaoq nail neq, khaq sil gaq. Yeiqsul neq, Khali maq ngel-ail dai, jil nail gaq neq, goiqbhaoq bhaoq nail gaq ngaol. Alhai jil nail tsaol-aq al gaq neq, Aqbhu Miqyail bhai maqkhaiq, Yaqyov bhai maqkhaiq, jil ha khi, Khali bhai genl dev nail gaq ngaol. 23 Khul khi mail dai ngal-aq, Yaqyov bhai khal jil ha nail tsaol-aq neq, Aqbhu Miqyail bhai iqsanl jil ha nail khe-ai dul khi, Yaqyov bhai khal hav bhoel nail tsaol-aq neq, Aqbhu Miqyail bhai iqsanl hav bhoel nail khe-ai, dul nail ngaol. 24 Alheel ngel-i mail, iqmoeq-u nee nuljuq-i mail ya gaiq-ai thaq nail daoq bhai neema lavqkhoel bhai ivqdao dai, nieivq thaiq-ai thaq yaoq. Daoq al bhai nuljuq nieivq thaiq-ai thaq haq neq, Yaqyov khi mail Aqbhu Miqyail nail lavqkhoel bhai nuljuq khaq mao iqsanl jaol nail ngaol. 25 “Ngal nuljuq bhai nqmaq maqluv halyeel doevq nail phaq bivq naol” dai, Yeiqsul-i mail saljial jaq ceiv-ai thaq nail ngaol. 26 Nuljuq bhai hevq bheel-aivq movq-ai bhiq nail juq nail ganl, ngal nuljuq bhai haoqgavq niil gevq bhoel-ai leevq-a nail ngaol. 27 Yeiqsul-i mail hoel dav lavq-a nail Aqhaqlal Miqyail nuljuq nail lavqkhoel bhai jaol nail ngel-i mail, aqyu juq nuljuq bhai cavq bhiq cov bhiq nail maq loq-ail. Aqhaqlal Miqyail nuljuq bhai ganl al iqsanl mail cavq lavq cov lavq nail ngaol. Hoeldav lavq-a nail al phaq neq, aqduq maq bhao nail phaq maq ngel-ail. Maldil tsaq nail phaq pevq nail ngaol. Alheel ngel-i mail, aivq nuljuq bhai cavq lavq cov lavq-a nail khe-ai, Yeiqsul nail lavqkhoel bhai jaol yaoq.

28 Ngaq nail yaq juq-ol, Yeiqsul yavq kha lee-u phao, neema ivqdao dai aol khi, aivq nail sivtavq bhai maq ya haqsil dai, aivq nail lavqkhoel bhai jaol yaoq. 29 Khali neq, tsaq nail daol nail gaq ngaol dai, nuljuq heeq nia nail khe-ai, tsaq nail daol nail phaq khal nl nail yaoq gaq yaoq-ao nee mail, Miqyail nail yaq pevq lal-a nail ngaol dai, nuljuq heeq kivq nail neq, tsaq nail ngaol.