1 Ngal neq, Paolluv ngaol. Yeiqsul Khali nail ganl bhaqda nee ngal thaonq bhai aol thailthaiq nail ngaol. Ganl al neq, yu nail jeq-e jaq-a pevq nail nuljuq bhai lavqkhiq tsail nail geeqlaoq daoq cavq-a nail al ngaol.

2 Nuljuq ya gaiq-a nail khe-ai, nuljuq bhai bhiq tsaojao-ai nail haqbhoil, Miqyail aivq nail geeqlaoq eeljaol ngaq bhai bivq lavq-a nail ngaol. 3 Miqyail neq, aivq-i mail oil tsail-ai thaq nail phaq, ngaq bhai phaodaiq lavq-a nail ngaol. Ganl niil ngal davqnil nil dai, gevq-ai thaq nail ngaol. 4 Nuljuq haoqgavq al keiv ge daiq-u phao, Khali bhai tavq nail oil tsail-ai thaq nail phaq bhai, ngal heeq nia-ail nial dai, nuljuq ya heeq kivq nail ngaol. 5 Oil tsail-ai thaq nail al phaq nail ganl, milnee uqnee khe tsaol-aq juq bhai maq bhi heeq nia khi ngaol-aoq, aqyanq niil nail lavqkhoel Aqhaqlal Miqyail neq, Miqyail nail meeq nail haol nail gaqkhoel juq khi aivq nail haqbhoil gedan nail juq bhai, phaodaiq bhiq-a nail ngaol. 6 Oil tsail-ai thaq nail al neq, niailhai ngaol. Lavqkhiq tsail nail geeqlaoq daoq bhaqda nee yu nail jeq-e jaq-a Yeiqsul Khali nail lavqkhoel, Yuldav nail tsaol-aq nee jaiqbhoil ya khi, aqyu juq nee mail teevq maol taivq-ail pevq lal nail nee ovqtavq, jaq-ai thaq nail saljial bhai iqsanl teevq gaq khe-ai ya-a nail ngaol.

7 Miqyail nail geeqlaoq eeljaol ngaq bhai bivq lavq-a nail khe-ai, lavqkhiq tsail nail geeqlaoq daoq niil, yu bhai cavq bhiq-ail yaoq dai, aivq ngaq bhai khoel lavq-a nail ngaol. Aivq aivq nail bhaqaoq lavqkhoel bhai nl lavq-a nail ngel-i mail, ngal aivq nail kovpavq niil ya-a nail ngaol. 8 Khali nail lavqkhoel bhai aol nail, mao dee bhee deedee khi aqphoiq phoiq nail ganl juq, yu nail jeq-e jaq-a bhai cavq bhiq ail dai, Khali yaq iqsanl nail lavqkhoel khe, yu nee maqtsil theq nail gaq pevq nail ngaq bhai, Miqyail geeqlaoq eeljaol al bivq lavq-a nail ngaol. 9 Al ovqtavq, iqsanl bhai teivq-a nail Miqyail aivq nail neema lavqkhoel-ai, milnee uqnee nee oil tsail-ai thaq nail al phaq, khalhai bhee lal thailthaiq nail ganl tsaol-aq iqsanl bhai bhaqlaoq kheq dai, phaodaiq bhiq dai, aivq ngaq bhai geeqlaoq eeljaol bivq lavq-a nail ngaol. 10 Khul khi mail oil tsail-ai thaq nail dai ge haq neq, Miqyail neenoeq neekha khadai eeq khadai heel nail ganl, Khali yaq munl bhaqda nee nqtavq khi mail miltsaq nail gaiqlaq bhai uvthaiq nail juq khi bhaqaoq eeq nail juq bhai niil aq-il bhi heeq nia nail dai khi, milnee uqnee nee oil tsail-ai thaq nail ngaol. 11 Miltsaq maq teivq-u nee mail, aivq-i mail noeqceiv-ai thaq nail khe-ai, ngadao nail Heeqphaq Yeiqsul Khali nail lavqkhoel niil aq-il bhee lal dai, aivq alhai nl-a nail ngaol. 12 Ngadao juq Yeiqsul nail lavqkhoel bhai jaol khi, aivq bhai neema thaqtsaol nail ngel-i mail, geesil nail neema maq aol dai, Miqyail nail sivtavq bhai aol lai kivq nail ngaol. 13 Alheel ngel-i mail, ngal nuljuq nail haqbhoil haq dee aoq deedee nail juq ya daq thailthaiq nail bhaqda nee, neema thaq cov dei-eiq dai, ngal nuljuq bhai hal nail ngaol. Ngal ya daq thailthaiq nail niil neq, nuljuq nail haqbhoil seiqleiq khaoqsail ngaol.

14 Ganl niil bhaqda nee, Aqbhu Miqyail nail sivtavq bhai ngal peevqceevq kovdoiq doiq khi geeqlaoq hal nail ngaol. 15 Aivq neq, nqtavq kovtavq bhai jaol nail nqtavq gaqkhoel juq bhai maqkhaiq, miltsaq kovtavq bhai jaol nail tsaol jeq-e iqsanl bhai maqkhaiq, maldil Aqbhu gaq ngaol. 16 Ngal niailhai geeqlaoq hal nail ngaol. Miqyail nail seiqleiq khaoqsail eeq dee mao deedee nail khe-ai, aivq nail Aqhaqlal Miqyail bhaqda nee nuljuq nail neema lavqkhoel bhai bhaqaoq khi gaq teevq bhee aol lal dai, ngal geeqlaoq hal nail ngaol. 17-18 Al ovqtavq, nuljuq neema thaqtsaol nail ngel-i mail, Khali nuljuq nail neema lavqkhoel bhai jaol ivq lal dai, geeqlaoq hal nail ngaol. Nuljuq goil nail gaiq-a nail lavqkhoel nee, daoqtsail kha-ail khi daoqthaoq ivq nail ngel-i mail, Khali yaq iqsanl nee mail Khali nail goil nail gaiq-a nail al, khadai eeq khadai heel, khadai moe khi, khadai navq nail bhai heeq nia lal dai iqsanl, ngal geeqlaoq hal nail ngaol. 19 Tsaol-aq yaq-i mail teevq bhee teevq lovq maq heeq kivq-a nail, Khali nail goil nail gaiq-a nail phaq bhai nuljuq heeq nia lal dai iqsanl, ngal geeqlaoq hal nail ngaol. Aivq nail goil nail gaiq-a nail al phaq bhai heeq nia lal-u phao, Miqyail nail lavqkhoel bhai bhee nail yaoq phaq yaoq-ao nee nuljuq nail lavqkhoel bhai bhee lal nail ngaol.

20 Miqyail nail bhaqaoq ngadao nail lavqkhoel bhai nl nail hal nail ngel-i mail, ngadao hal nail khi noeq nail dul nail nee maqtsil, aivq maodai nl lavq hal lavq nail ngaol. 21 Khali yaq munl nail lavqkhoel bhai maqkhaiq, Yeiqsul Khali nail lavqkhoel bhai maqkhaiq, nqmaq maqluv halyeel Miqyail bhai tsiqeeq bhel.