Jonr
dwandfamo husyuk gontwat
Barkof kfo nuhas mrokfom
Ndar husyuk gontwat sioshu bro yima Jonr wandfamort. Ndar gontwat yiyuk yimaroh yufam nhai htarmorm. Bok yimam duka memom, ka wom sioshu tuhan yindariroh yufampno htafmort. Sios futamort, mett. Sioshu Kristenm futamorm, “rothu yonm.” Ndar gontwat to rroh nayak marnyahato toh marnya yuhami yo giaman tisam, yimam frnheh htfaswa yuharoh kfo dukayuk mrokfomn wandfamorm.
Bro Nkifrarhu tu yafothet mrokfot bi yakitohetnom, yakitoh bmta kihkfot. Nndo nndo mrokfom hik duha.
1
1 Na sioshu bro tohak yimaya. Ni metni* rothu yonm† Sioshu Kristenm futamorm, “rothu yonm”. dukiwoyann ndar gontwat wandfiwanko. To mirahko ka be nanrpaya dukiwanko. Nhai. Bro Nkifrarhu mrokfo mifmift yakitohet yimam rompno rpat duke-wunomko. 2 Bro Nkifrarhu tu yafothet mrokfo mifmift nom yakitohwanomn nd nikmoh duka yima yuhur niewur-nom. Nd Bro Nkifrarhu mrokfo mifmift be yakitoh nkifranirahnomt. 3 Bro Yifemri rorhu yon Jisas Kraisr yuhuwafhato yak marnyaruhatfm nmoh toh nmbuham, yima yuhum be mirhuruhamn nmoh dukefm be rofhu dukefrpno rhuhato Bro Nkifrarhu mrokfo mifmifrpatn yakitoh hanyrah-nom.
Wommpno nayak marnyahato rpat tohkfot
4 Ninhu wom yonm Bro Nkifrarhu mrokfo mifmift yakitohhato hikwatmt na yindhorwa. Bro Nkifrar to ndhtet toh yuhamn kfiwurnom tohneft. 5 To bar mete, wom mrokfot kforuhant. Nmoh toh nmbuhat nom tunom nayak marnyahato rpat tohkfot. Ndt nhai be nfri mrokfot kanjo kfo ptha-kahant. Nhai. Nom Bro Nkifrarhu mrokfot riwanyakhato riyakitohak-mohat, bi nd yiha nd mrokfot bi riwanyakmonomt. 6 Nd nayak marnya-hato rpat tohneft, Bro Nkifrarhu kfo-yuk mrokfoyet. Ndt bi riwanyakmonomt. Nom Bro Nkifrarpno nayak marnyahato rpat tohrahnom be rorhu kfoyuk mrokfom hikrahnom.
Kraisrhu mrokfot yakitoh dbkaf kihkfot
7 Wawanyko, giaman tisam ndar bbinysoft bi thu yufurniromt. Nd yimam kfo yamukam Jisas Kraisr nhai yima mifm kanjo ndar bbinysoft tohrmor. To ndhtet kfet yimamn yi htfaswamn yimam kfo nheh bonheh htfaswomm. Jisasr be hti dbnot thuwomr. 8 To niko wadukaf hanyswako. Yihotar bi nia niamonomrn bi kmir myak fnah yibonwonom. To mirahko bi brbohartn tfit manoh yuhat ariwitanom. Toh bmtahato kmir rpat myak fnahrahnomr. Kmir myak fnahhato hti hanyrahkomm niko yak hanyuk shrkar. 9 Wom yimar Kraisr kfo htayuk mrokfo yuham myak htanihato turhu dukefrn hikneft, nd yimar nhai wom dukakahrr Bro Nkifrar. Be mong trohnitrr. Yimar Kraisr kfo htayuk mrokfo yuham hikwar, Bro Yifem nitohfpno brbo frtkafwor. 10 Niko bi kfo htewanko. Wom yimar nndo mrokfot hnewurt, wany nhtakfot afo. Nhai ndar niko wanuka mrokfot kanjo rorhu mrokfot kfokahrt, mirahko nd yimar akfo yindhorkahnomr ayakni kunyko ahanynomr. 11 Ndhtet yimar kfo yindhorhato yaknirahkomr, to be rorhu hingrnef bebt fknirahko.
Wuroh kfo yindhor mrokfom
12 Nikompno bok mrokfeta. Gon-twatn mrokfom htaneft nhai wofnkaha. Kto wom yihamn nierhoyann yima tnge nakfo tndh nuhasrahnom. Tnge nakfo ptharuhanomn yima yuhum yindhorrahm. 13 Nikmoh mndaremt‡ Bro Nkifrarhu yufat yorhwat, rothu yonm§ Sioshu Kristenm futamorm, “rothu yonm” niko dukahato kfo yindhor mrokfot htefiwumko.