2 Kings
Ya meippanggep nunyan libluh e 2 Kings
Emin ida nampatul di Israel ey lawah ida. Anin yad Judah et dakel ida dama lawah ni nampatul diman. Eleg da u-unuden hi Apu Dios tep yadda beken ni makulug ni dios ni kadaydayawaddan nekibebley ni hi-gada hu inu-unnud da. Et ipenahding idan tutu-u hu lawah e in-u-unnud daddan eleg mengullug nan Apu Dios.
Eleg umamleng hi Apu Dios ni nunyan impahding da, nem anin ni henin nunya et eleg tu pinhed ni iwwalleng ida hu pinili tun tutu-u tu. Et mukun intu-dak tudda prophet tu et ehelan dadda humman ni patul et yadda tutu-u ma-lat isiked da lawah ni daka pehpehding ma-lat hi-gatun ebuh daydayawen da. Nelabah hu pigan toon ni eleg da pengu-unnudan niya eleg da pangngelan ni tugun Apu Dios et iebulut tudda huyyan tutu-ud Israel et yad Judah ni apputen ni buhul dadda et alen daddan balud di edum ni bebley.
Ya neitudek eyad libluh:
1. Ginibbuh nan Elijah hu pansilbian tun Apu Dios et lumaw di kabunyan. (chapters 1:1–2:11)
2. Hi Elisha e prophet et ya nansilbian tun Apu Dios. (chapters 18:1–25:30)
3. Yadda neipenahding ingganah binahbah ni Assyria hu bebley di Israel. (chapters 8:16–17:41)
4. Yadda neipenahding di Judah ingganah neapput ida tutu-udman et mailaw idan balud di Babilon. (chapters 18:1–25:30)
1
Ya inhel Apu Dios ni kastigun Ahasiah
1 Yan eman ni netey hi Ahab ey ginubat ni iMoab hu Israel.
2 Hi Ahasiah e neihullul ni patul ey na-gah di balkon di meikkadwan gladuh di palasyo tud Samaria et eleg law pakedalan. Immitu-dak idan tuu tun an mekihhummangan nan Baal Sebub e dios di Ekron e et-eteng ni bebley di Pilistia, et amtaen tu hedin umyaggud winu eleg.
3 Nem kan ni anghel Apu Dios nan Elijah e prophet ni iTisbe ey “Mudda dammu etan bineal nan Ahasiah e patul et kammun hi-gaday ‘Kele yu ang-angen hi Baal Sebub e dios di Ekron? Kaw gapu tep kanyu nem endi hu Dios ni Israel? 4 Ehel yun etan ni patul huyyan kan Apu Dios ni hi-gatu: Eleg ka umyaggud tep mettey ka!’ ” Inu-unnud Elijah hu inhel Apu Dios, 5 et yan nambangngadan ida etan ni intu-dak ni patul ey kantun hi-gaday, “Kele kayu nambangngad?”
6 Kandan hi-gatuy “Dinammu dakemin etan ni hakey ni tuu ey kantuy mambangngad kami kunu et ehelen min hi-gam hu inhel Apu Dios e kantuy ‘Kaw endi hu Dios di deya Israel et humman gaputun intu-dak mudda tuun an manmahmah nan Baal Sebub e dios ni Ekron? Gapu tep impahding mu huyya ey eleg ka umyaggud et mettey ka!’ ”
7 Kan etan ni patul ey “Hipa ang-ang etan ni tuun nenammun hi-gayu et ehelen tu huttan?” 8 Kanday “Nambalwasin andukkey ni nekapyad belat ni animal et mamballikid ni katat.”
Kan etan ni patul ey “Hi Elijah humman!” 9 Entanniy intu-dak Ahasiah hu ap-apun sindalu et ya neliman tuu tu ni an mempap nan Elijah. Himmak dan kamanyuyyuddung di duntug et kan etan ni ap-apun hi-gatuy “Bega-en nan Apu Dios, kan apu patul ey meki-li ka kunun hi-gami.”
10 Nem kan Elijah ey, “Hedin bega-en da-ak nan Apu Dios e humman hu kammu, ali apuy di kabunyan et magiheb ka et yadda tuum!” Pinhakkey ey immali tu-wangu apuy et pateyen tudda emin humman ni sindalu.
11 Nenu-dak mewan etan ni patul ni hakey ni ap-apun sindalu et ya neliman tuu tu et lumaw idad kad-an Elijah et kantu mewan ni hi-gatuy “Bega-en nan Apu Dios, kan ni patul ey mahapul ni meki-li kan hi-gamin nunya!”
12 Hinumang mewan Elijah e kantuy “Hedin bega-en da-ak nan Apu Dios e humman hu kammu, ali apuy ni melpud kabunyan et pateyen daka et yadda tuum!” Et umli tu-wangu mewan hu apuy Apu Dios et pateyen tuddan emin.
13 Nenu-dak mewan etan patul ni hakey ni ap-apun sindalu et ikuyug tu hu neliman tuu tu. Nanteyed ida mewan di duntug et mandukkun etan ap-apun sindalud hinanggan Elijah et mampehemmehemmek e kantuy “Bega-en Apu Dios, hemek dakemi eyaddan sindaluk, entan dakemi patey! 14 Netey ida etan dewwan ap-apun sindalu et yadda tuu da tep pintey idan apuy ni nalpud kabunyan nem hemek muwak anhan.”
15 Kan etan ni angel Apu Dios nan Elijah ey “Pakilaw kan hi-gatu, entan takut.” Et makilaw hi Elijah et lumaw di kad-an ni patul.
16 Kantu etan ni patul ey “Heninnuy hu inhel Apu Dios: ‘Gapu tep nenu-dak kan an mekihhummangan nan Baal Sebub e dios ni Ekron e heni endi Dios di deya Israel ey eleg ka umyaggud tep mettey ka!’ ”
17 Netey tu-wangu hi Ahasiah e immamnu hu inhel Apu Dios ni impeamtan Elijah. Et gapu tep endi hu lakin u-ungngan Ahasiah ey hi Joram e agi tu hu neihullul ni hi-gatun nampatul ni meikkadwan toon ni nan-ap-apuan Jehoram e u-ungngan Jehoshaphat di Judah.
18 Emin hu impahding Ahasiah e patul ey neitudek di Libluh idan Patul di Israel.