2
Ya pan-ap-apuan alin Apu Dios
1 Huyya impeamtan Apu Dios nan Isaiah e u-ungngan Amos ni meippahding alin Judah niya Jerusalem: 2 Yallin edum ni aggew ey ya etan duntug ni neituunan ni Tempol Apu Dios ey mandingngel, et dakel ali tutu-ud kebebbebley eyad puyek ni umlaw diman ni an mandaydayaw. 3 Kandalliy “Keyuy et manteyed itsud duntug Apu Dios e Dios idan helag Israel di Tempol tu et ituttuddu tun hi-gatsu hu pinhed tun pehding tayu et humman u-unnuden tayu.”
Huyyalli e-helen da, tep yan nunman alin tsimpuh ey yad Jerusalem hu keituttudduan ni ehel Apu Dios.
4 Hi-gatulli law mengippennuh ni panhahallaan ni katuutuud kebebbebley. Yan nunman ali ey eleg ida law mandaddan hu kebebbebley ni mekiggubbat, tep endi law manggugubat. Pan-e-dihen dalli law hu ispadah da et kapyaen dan aledu niya pangkapyaen dalli pahul dan ewah ni panlinnih dan intanem da.* 2:4 [2-4] Micah 4:1-3 5 Et humman hu, hi-gatsun helag Jacob, attu et ya elaw Apu Dios hu pengiu-unnudan tayu ey?
Ya aggew ni gintud nan Apu Dios ni pengippebabahan tuddan tutu-un daka peta-gey annel da
6 Apu Dios, inwalleng mudda tutu-um ni helag Jacob tep ya daka pehding e daka kulluga hu tuttuddun nalpu etan idad bebley di appit ni kasimmilin aggew. † 2:6 Yadda bebley ni na-hel eyad verse ey humman ida na-mu hu Syria et ya Assyria. Iraq law ni nunya hu ngadan ni Assyria ni nunman. Ida kamandinnel di anap e henidda iPilistia ‡ 2:6 Ang-ang yu hu 1 Samuel 6:2 niya 2 Kings 1:2. niya daka pehding hu kapehpehding idan tutu-ud edum ni bebley. 7 Kedangyan hu Judah e bebley dan dakel hu silber niya balituk diman e eleg melkud. § 2:7 Kimmedangyan ida dakel ni iJudah eman ni hi Ussiah hu patul da. Dakel mewan kebayyu da et tagan da kapyan kalesah ni kameussal di gubat. 8 Dakel mewan kinapyadan tutu-un dios da. Kinapya da ngu ni dinaydayaw da. 9 Ya pambalinan tu ey meibbabah ida et mabeingan ida. Et humman hu, entan tu liwwan hu liwat da e Apu Dios.
10 Hi-gayun tutu-u, kayu pantalud leyang niya kayu pangku-kun pantelluan yu, ma-lat eleg maipahding ni hi-gayu hu hipan pehding Apu Dios tep ya bunget tu. Em, patnai yu pangngun mantellu ma-lat eleg yu ang-angen hu kabaelan tu niya dayaw tu. * 2:10 Ang-ang yu 2 Thess. 1:8-10. Nem ya kakulugan tu, ey eleg ali mabalin ni yu ittaluan hu bunget tu. 11 Medettengan ali aggew ni meibbabah ida kamampahhiyan tutu-u ma-lat hi Apu Dios dedan hu medeyyaw. 12 Tep wada aggew ni gintud Apu Dios e Kabaelan tun emin ni pengippebabahan tuddan nunman ni et-eteng kabaelan tun tutu-un kamampahhiya. 13 Bahbahen tuddalli etan etata-gey ni keyew ni sedar di Lebanon niyadda etta-teng ni keyew ni oak di Bashan. † 2:13 Ya bebley e Lebanon ni wadad appit ni north ni Israel ey nandingngel tep yadda etata-gey ni sedar ni keyew diman. Ya Bashan ey wadad appit ni kasimmilin aggew di Israel di demang ni Wangwang e Jordan. Nandingngel dama tep yadda etta-teng ni keyew ni oak diman. In-alig nan Isaiah ida huyyan keyew di meippahding alin kamampahhiyan tutu-u. 14 Ey deklanen tuddalli hu etata-gey ni duntug. 15 Tu-lien tulli etata-gey ni kapangguwalyain sindalu niyadda netuping ni luhud di bebley da. 16 Pambahbahen tulli etta-teng ni bapor niyadda etan kakkayyaggud ni bangka et malneng ida. 17 Yan nunman ali ey mebabba-ingan ida hu tutu-un kamampahhiya niyadda manghay. Ebuh ali law hi Apu Dios ni medeyyaw ni nunman ni aggew. 18 Mangkeendiddalli law hu dios ni kinapyan tuu.
19 Yallin pengippeang-angan Apu Dios ni nemahhig ni bunget tu e henilli tu iggiwwed eya puyek, ey idalli mampantellu tutu-ud leyang niya mangku-kuddan pantelluan da, tep ya takut da. Patnaan dallin umbesik ma-lat meihwang idad bunget Apu Dios‡ 2:19 Revelation 6:15 niya ma-lat eleg da ang-angen hu kabaelan tu niya dayaw tu, nem eleg idalli damengu meihwang. 20 Yan nunman alin aggew ey pan-i-ibbeng idallin tutu-ud kad-an ni utut niya panniki hu balituk niya silber ni kinenapya dan dios da. § 2:20 Endi silbi tun penaydayawan ni dios ni kinapyan tuu. (Ang-ang yu hu Isaiah 30:22 ya 31:7 ya 40:19-20 ya 44:9-20.) 21 Memsik idallin an mangkeitlud leyang niyad linggeman ni hungab ma-lat patnaan dan ibsikan hu bunget Apu Dios, ya et-eteng ni kabaelan tu niya dayaw tu ni pengiggiwwedan tullin puyek.
22 Et humman hu, entan pandinel yud tuu, tep endi kabaelan tu niya nanna-ud ni mettey.
*2:4 2:4 [2-4] Micah 4:1-3
†2:6 2:6 Yadda bebley ni na-hel eyad verse ey humman ida na-mu hu Syria et ya Assyria. Iraq law ni nunya hu ngadan ni Assyria ni nunman.
‡2:6 2:6 Ang-ang yu hu 1 Samuel 6:2 niya 2 Kings 1:2.
§2:7 2:7 Kimmedangyan ida dakel ni iJudah eman ni hi Ussiah hu patul da.
*2:10 2:10 Ang-ang yu 2 Thess. 1:8-10.
†2:13 2:13 Ya bebley e Lebanon ni wadad appit ni north ni Israel ey nandingngel tep yadda etata-gey ni sedar ni keyew diman. Ya Bashan ey wadad appit ni kasimmilin aggew di Israel di demang ni Wangwang e Jordan. Nandingngel dama tep yadda etta-teng ni keyew ni oak diman. In-alig nan Isaiah ida huyyan keyew di meippahding alin kamampahhiyan tutu-u.
‡2:19 2:19 Revelation 6:15
§2:20 2:20 Endi silbi tun penaydayawan ni dios ni kinapyan tuu. (Ang-ang yu hu Isaiah 30:22 ya 31:7 ya 40:19-20 ya 44:9-20.)