14
Ya nambangngadan idan iIsrael ni neilaw di edum ni bebley
1 Nem hehmeken alin Apu Dios ida helag Israel. Ibbilang tuddalli mewan ni tutu-u tu niya ibbangngad tuddan mambebley di bebley da. Anin idalli tutu-ud edum ni bebley et um-aliddan mekibbebley ni hi-gada et mei-dum ida damaddan helag Israel. 2 Baddangan alin dakel ni bebley ida helag Israel ma-lat mambangngad idad bebley dan indawat Apu Dios ni hi-gada. Et pambalin daddalli humman ni tutu-ud edum ni bebley ni bega-en da. Ey apputen daddalli etan tutu-un nengenapput lan hi-gada et hi-gadalli law hu pan-ap-apuddan nunman ni nengipelilligat lan hi-gadan nunman.
Ya keapputan ni patul di Babilon
3 Pappegen alin Apu Dios hu neihbutan idan tutu-u tu * 14:3 Impakulug Apu Dios ni pappegen tu hu neihbutan idan helag Israel di Babilon henin nemappegan tun neihbutan dad Egypt eman lan nebayag. ma-lat masiked hu daka lelemyungi niya daka panhelheltapi, tep ya nekalligat ni ngunun daka ippilit ni pengunnun hi-gada. 4 Yallin pengippahdingan tun nunya, ey taltalanggaan idallin tuu tu hu patul di Babilon e kanday “Neapput kaya mewan law hu lawah ni patul di Babilon! Nepappeg law hu tuka pampehelheltapin tutu-u.
5 Tep pinappeg law Apu Dios hu kabaelan idan lawah nemnem tun aap-apu, 6 tep gapuh ni nemahhig ni bunget da ey impanhelheltap dadda kumamman hu tutu-un inenapput da. 7 Yan nunya law ey melinggep ida katuutuud kebebbebley eyad puyek, et humman hu, ida kaman-a-appeh ni amleng da. 8 Anin idan keyew e belbel niya sedar di Lebanon et ida dama kaman-an-anlan neapputan ni patul di Babilon, tep endi law manlelngeh ni hi-gada. † 14:8 Yadda patul di Assyria niyad Babilon ey nebayag ni impalpalngeh daddan tutu-u da hu kakkayyaggud ni keyew di Lebanon et ienamut dad bebley da.
9 Ya bebley idan netey e Kadungayan ey nandaddan ni mengapngan patul ni Babilon. Anin idan linnawan aap-apun nunman eyad puyek et imminah idan menammun hi-gatu. 10 Kandan hi-gatuy ‘Nambalin ka damelaw ni nekapuy ni nunya e henin hi-gami. 11 Yan nunman ey et-eteng kabaelam, et humman hu, in-ena-appehan dakaddan tutu-u e pinenelpelding da gitalah dan nenaydayaw dan hi-gam. Nem endi law henin nunman tep iyyadya ka law di bebley ni netey. Muka pambakbaktadi niya muka iwawwangngal ida bigih.’ ”
12 Hi-gam e patul ni Babilon e kameingngadnin madilag ni bittuwen ni kakkabbuhhan ‡ 14:12 Beken ni ebuh hu patul di Babilon ni nengadanan ni “madilag ni bittuwen ni kakkabbuhhan,” nem anin daman hi Satanas. (Ang-ang yu hu Luke 10:18.) ey et-eteng hu kabaelam ni nunman e kamengennapput ni tutu-u eyad puyek, nem impedep-ah dakan nalpud kabunyan et ma-gah ka eyad puyek. 13 Tep kammud nemnem muy “Pehding kun emin hu kabaelan ku et lektattuy hi-gak hu eta-ta-gey nem yadda keta-ta-geyyan ni bittuwen. Ya yuddungngak ni man-ap-apu ey yad keta-ta-geyyan ni duntug e kapanha-adiddan dios. 14 Li-bahan kudda kulput et man-ingngeh kamin Apu Dios e Eta-gey ni peteg.” § 14:14 [12-14] Hi Satanas ey ihik tun pilliwen hu nan-ap-apuan Apu Dios.
15 Nem impalaw daka kumedek di daul ni puyek di bebley idan nangketey.
16 Yadda menang-ang ni hi-gam diman ey daka kapanhintetkeli e daka nemnemnema neipahding ni hi-gam. Kanday “Kaw huyya etan kabaelan tun mengiggiwwed eyan puyek ni kamengippetekkut ni nan-ap-apuan ni edum ni patul? 17 Ey kaw beken ni hi-gatu nemahbah ni kebebbebley et mambalin idan eleg mebebleyi? Niya kaw beken ni hi-gatu hu nengapput idan etta-teng ni bebley e eleg tudda hemeken hu ingkalebut tu et eleg tudda paenamut?” * 14:17 Ya etan patul di Babilon ey eleg tu ibbukyat ida helag Israel ni ingkalebut tu. Hanniman daman Satanas e eleg tu ibbukyat ida ingkalebut tu, nem immali hi Christo ni mengibbukyat idan ingkalebut nan Satanas. (Ang-ang yu hu Luke 4:18.)
18 Yadda nangketey ni patul ey immen idad kayyaggud ni kulung da. 19 Nem hedin hi-gam man eleg ka meikkullung e heni kan nahpak ni pangan keyew e pemegga bekah et pan-inggagasinan. Mei-ibbeng ali annel mud bitu et meita-bun ni hi-gam hu annel idan sindalun netey di gubat. 20 Eleg daka iyayyaggud ni ikkulung ni henin daka pehding ni patul tep binahbah mu bebley mu et pampateyem ida tuum. Hi-gam e lawah ni patul ey endiddan lawah ni pamilyah mu hu metdaan ma-lat meliwwan idan ingganah. 21 Hi-gayuddan tutu-u, pampatey yudda u-ungngan nunyan patul tep ya nambahulan ida lan aammed da, ma-lat eleg ida man-ap-apu eyad puyek niya ma-lat eleg ida mampengapyan etta-teng ni bebley.
Ya pemahbahan nan Apu Dios ni Babilon
22 Hi Apu Dios e Kabaelan tun emin ey kantuy “Gubbaten ku hu Babilon et bahbahen ku. Anin idan kaungaunga et endi an metdaan ni umtagu. Hi-gak e hi Apu Dios hu nanghel idan nunya. 23 Bahbahek humman ni Babilon et pambalin kun kamelellebbeng et pambalyan idan akup niyadda edum ni sisit. Heggadak ali humman ni bebley ma-lat mahegad ni emin hu wadadman. Hi-gak e hi Apu Dios e Kabaelan tun emin hu nanghel nunya.”
Ya pengastiguan Apu Dios ni Assyria
24 Insapatah nan Apu Dios e Kabaelan tun emin e kantuy “Ya implanuh kun pehding ey nanna-ud ni meippahding. 25 Bahbahek ida iAssyria di deya bebley kud Israel e pampetteyek ida eyad duduntug ma-lat masiked hu nanhimbutan idan tutu-uk ni hi-gada niya ma-lat eleg ida law manhelheltap. 26 Henin nunya implanuh kun pehding. Makulug ni kastiguen kun emin hu tutu-ud kebebbebley eyad puyek niya nandaddannak ni mengippahding nunya. 27 Hi-gak e hi Apu Dios e Kabaelan tun emin hu namplanuh nunya. Nanna-ud ni pehding ku huyya e endi mengippesikked ni hi-gak!” † 14:27 [24-27] Ya inamnuan nunyan inhel nan Apu Dios ey neitudek di Isaiah 37:21-28.
Ya pengastiguan Apu Dios ni Pilistia
28 Huyya neipeamtan hi-gak e hi Isaiah eman ni toon ni neteyyan nan patul e hi Ahas.
29 Kan Apu Dios ey “Hi-gayun iPilistia, ey entan pan-am-amleng yun neteyyan ni patul ni nampehelheltap ni hi-gayu. Tep ya etan u-ungnga tun meihhullul ey nehalhalman nem hi-gatu. Ya pinhed tun e-helen huyya ey hedin netey hu hakey ni uleg ni negitaan ey mewedda impah tun meihhullul ni nehalhalman nem ya inetu. Humman ni impah tu ey henilli dragon ni memahbah ni hi-gayu. 30 Ippaptek kudda nangkewetwet ni tutu-uk e henin kapemaptek ni kamampattul idan kalneroh tu. Nak ihhamakan idan panha-adan dan endi lawah ni meippahding ni hi-gada. Nem peellik ni hi-gayun iPilistia hu nemahhig ni bisil et endi an metdaan ni hi-gayun meteggu.
31 Hi-gayuddan iPilistia, elet yu nangih yun takut yu. Tep ida kamengelli dakel ni sindalun melpud north e henidda kaman-ehbuk ni dep-ul hu kedakkel da. Neka-let ida niya endi takut da.
32 Hipa ihhumang tayuddan buhul tayun um-alin melpud Pilistia? ‡ 14:32 Huyyaddan um-alin mekihhummangan ni melpud Pilistia ey da na-mu ibbaga et mambabaddang idan mekiggubbat ni iAssyria e buhul da. Kantayulliy ‘Inhammad nan Apu Dios ni kinapya hu Zion ma-lat yadman keihhikkugan idan kamanhelheltap ni tutu-u tu.’ ”
*14:3 14:3 Impakulug Apu Dios ni pappegen tu hu neihbutan idan helag Israel di Babilon henin nemappegan tun neihbutan dad Egypt eman lan nebayag.
†14:8 14:8 Yadda patul di Assyria niyad Babilon ey nebayag ni impalpalngeh daddan tutu-u da hu kakkayyaggud ni keyew di Lebanon et ienamut dad bebley da.
‡14:12 14:12 Beken ni ebuh hu patul di Babilon ni nengadanan ni “madilag ni bittuwen ni kakkabbuhhan,” nem anin daman hi Satanas. (Ang-ang yu hu Luke 10:18.)
§14:14 14:14 [12-14] Hi Satanas ey ihik tun pilliwen hu nan-ap-apuan Apu Dios.
*14:17 14:17 Ya etan patul di Babilon ey eleg tu ibbukyat ida helag Israel ni ingkalebut tu. Hanniman daman Satanas e eleg tu ibbukyat ida ingkalebut tu, nem immali hi Christo ni mengibbukyat idan ingkalebut nan Satanas. (Ang-ang yu hu Luke 4:18.)
†14:27 14:27 [24-27] Ya inamnuan nunyan inhel nan Apu Dios ey neitudek di Isaiah 37:21-28.
‡14:32 14:32 Huyyaddan um-alin mekihhummangan ni melpud Pilistia ey da na-mu ibbaga et mambabaddang idan mekiggubbat ni iAssyria e buhul da.