21
Ya neipeamtan meippahding alid Babilon
1 Huyya impeamtan Apu Dios ni hi-gak ni meippahding ni hi-gayun iBabilon: Wadalli memahbah ni hi-gayun heni na-let ni alipuhhapuh di desert. Melpullid anggetakkut ni bebley. 2 Inang-ang ku hu anggetakkut ni meippahding ali. Wadalli mengihdul ni Babilon ma-lat mebahbah. Hi-gayun iElam niyadda iMedia, kahelikubi yu ma-lat gubaten yudda iBabilon! Meippahding hu hanniman ni Babilon ma-lat paniked Apu Dios ni daka pengippehelheltapin tutu-ud edum ni bebley.
3 Nemahhig takut kun nenang-angak niya nangngelak ni nunyan neipeamtan hi-gak et nemahhig degeh ni annel ku e henin kagibbekan biin man-ungnga. 4 Eggak amta pehding ku. Nakka manggegeygey ni takut ku. Nakka um-aabtun kehillengan tu, nem entannit nehileng ey nema-ma kumedek takut ku.
5 Entanni mewan ey inang-ang ku e ida kamanhahamul di diman Babilon e yimmudung ida tuud yuddungngan ni mekihhemmul e neiap-ap etan mahdel ni luput. Ida kamammangngan ey mengi-innum ida ey endi maptek ey wada simmekuk e kantuy “Hi-gayun aap-apu, immalidda buhul tayu. Pan-ale yu happiyaw yu. Pandaddan kayun mekiggubbat!”
Ya kameippenahding di Judah
6 Entanni ey kan Apu Dios ni hi-gak ey “Lakkay et mu peehneng hu guwalya etan di netuping ni luhud * 21:6 Huyyan guwalya ey manha-ad di nanlinikweh ni Jerusalem et ang-angen tu hedin wada kamengellin buhul da. et peamta tu hedin hipa ang-angen tu. 7 Ehel mu etan ni ihha-ad mun mangguwalya e hedin wada ang-angen tun tutu-un nanlugan di kalesah ni ginuyud ni handedwan kebayyu niya tutu-un nantakkay di kamel niya donkey ey peamta tu.”
8 Immehel etan guwalya ey kantuy “Apu, nanhahha-addak eyad nangguwalyaak ni kahilehileng niyan kewa-wa-wa, 9 ey yan nunya law ni ebuh hu penang-angak idan nantutu-nud ni kakalesah niyadda sindalun kamengelli. Endi! Mebahbah tu-wangu hu Babilon! † 21:9 Ya bebley ni Babilon ey neapput eman ni 539 B.C. Nem yad New Testament ey hedin na-hel hu Babilon, man ya keibbellinan tu ey yadda eleg mengullug nan Apu Dios e beken etan ni bebley. (Ang-ang yu hu Revelation 14:8 et ya 18:2.) Niya emin ida kinapya dan dios dan daka deyyawa ey nangkebukli et maiwehit di puyek.”
10 Hi-gayuddan tutu-uk di Israel e kamei-ellig di wheat ni netaltag, ey ‡ 21:10 Yadda iJudah ey ida kamei-ellig di wheat ni netaltag tep meapput idallid gubat et mambalin idan balud di Babilon. (Ang-ang yu hu Isaiah 39:5-7.) inhel kun emin ni nunyan hi-gayu hu kayyaggud ni dingngel kun impeamtan Apu Dios e Kabaelan tun emin e Dios idan helag Israel.
Ya na-hel ni meippahding ni Edom
11 Huyya neipeamtan hi-gak ni meippahding ni Edom: § 21:11-12 Ang-ang yu hu Jeremiah 49:7-22, ya Ezekiel 25:12-14 et ya Amos 1:11-12. Wadad Edom hu kaum-eheehel ni hi-gak e kantuy “Guwalya, kaw ayepaw pay et han mewa-wa? Ehel mun hi-gak hedin piga pay ni olas et han mewa-wa.” 12 Hinumang ku et kangkuy “Kamangkewa-wa law, nem mehilleng ali mewan. * 21:12 Ya dammutun keibbellinan nunyan kantun ‘kamangkewa-wa law’ ey kamangkepappeg law hu kapampehelheltapiddan iAssyria idan iJudah. Ey ya dammutun keibbellinan nunyan kantun ‘nem mehilleng ali mewan’ ey anggegannu law hu pengilleppuan idan iBabilon ni mengippehelheltap idan iJudah. Hedin pinhed mulli mewan ni mahmahan ey pambangngad kan mengibbegga.
Ya na-hel ni meipanggep ni Arabia
13 Huyya neipeamtan meippahding ni Arabia: † 21:13-17 Jeremiah 49:28-33 Hi-gayun iDedan ni kamantu-tu-nud ni mangkampud desert di Arabia, 14 idwasi yuddan danum hu na-wew. Ey hi-gayun iTema, idwasi yuddan kennen da etan ida bimmesik ni hini-yan da bebley da. 15 Imbesikan dadda umpatey ni hi-gadan nampan-ispadah, yadda nampampana niyadda anggetakkut ni meippahding di gubat.
16 Entanniy kan Apu Dios ni hi-gak ey “Melebbah hantoon et mepappeg hu dayaw idan tutu-ud Kedar. 17 Hahhakkey idalli metdaan idan ketultuledan ni tutu-ud Kedar ni nelaing ni umpana.” Ya Ap-Apu e Dios ni Israel hu nanghel idan nunya.
*21:6 21:6 Huyyan guwalya ey manha-ad di nanlinikweh ni Jerusalem et ang-angen tu hedin wada kamengellin buhul da.
†21:9 21:9 Ya bebley ni Babilon ey neapput eman ni 539 B.C. Nem yad New Testament ey hedin na-hel hu Babilon, man ya keibbellinan tu ey yadda eleg mengullug nan Apu Dios e beken etan ni bebley. (Ang-ang yu hu Revelation 14:8 et ya 18:2.)
‡21:10 21:10 Yadda iJudah ey ida kamei-ellig di wheat ni netaltag tep meapput idallid gubat et mambalin idan balud di Babilon. (Ang-ang yu hu Isaiah 39:5-7.)
§21:11 21:11-12 Ang-ang yu hu Jeremiah 49:7-22, ya Ezekiel 25:12-14 et ya Amos 1:11-12.
*21:12 21:12 Ya dammutun keibbellinan nunyan kantun ‘kamangkewa-wa law’ ey kamangkepappeg law hu kapampehelheltapiddan iAssyria idan iJudah. Ey ya dammutun keibbellinan nunyan kantun ‘nem mehilleng ali mewan’ ey anggegannu law hu pengilleppuan idan iBabilon ni mengippehelheltap idan iJudah.
†21:13 21:13-17 Jeremiah 49:28-33