23
Ya neipeamtan meippahding ni Tyre
1 Huyya neipeamtan meippahding alid Tyre: * 23:1 Yadda dewwan et-eteng ni bebley e Tyre niya Sidon ey humman ida hu importanteh ni bebley di Phoenisia. (Ang-ang yu hu verses 2, 4 et ya 12.) Pantete-ul kayun lemyung yu e nampambapor tep nebahbah ida yuka dekkalid Tyre anin idan baballey yudman. Dedngelen yu la huyyan panda-guhan yud Cyprus ni ennamutan yu. 2 Hi-gayu daman kamampanggettang di Sidon ni nambebley di gilig ni baybay ni impekedangyan idan kamambiyaheh di baybay, ey i-ineng kayu niya lelemyung kayu! 3 Nanglaw kayud edum ni bebley et kayu gumtang niya kayu nanggatang ni begah idan iEgypt ey kayu nekinegosyoh di kebebbebley eyad puyek et mambalin eya bebley yun mulkaduh ni emin ni bebley.
4 Nem yan nunya ey nebabba-ingan ka e Sidon e et-eteng ni bebley di gilig ni baybay. Heni ka etan ni nelahin ni biin endi u-ungnga tu. Et humman hu, heninnuy hu kan etan ni baybay ni hi-gam: “Endi u-ungngak. Eggak patnaan ni man-ungnga niya eggak patnaan ni menge-etteng ni u-ungnga.”
5 Anin idallin iEgypt et nemahhig ali lemyung dan pengngelan dan kebahbahan ni Tyre.
6 Et humman hu, pidwaek ni e-helen ni hi-gayun nambebley di gilig ni baybay e pantete-ul kayun lemyung yu! Pan-agwat kayu et patnaan yun umbesik di Tarsis di Spain! 7 Kaw hanneya tu-wa anhan law nambalinan ni kayyaggud ni bebley yu e Tyre e nebehwat lan nebayag? Natnga-ak tep yan nunman ey kaman-an-anladda bimmebley niya daka pampalaw tutu-u dan mansekkup ni edum ni bebley. 8 Kaw hipa kannemnem ni mengippahding ni hanneyan Tyre, e nandingngel ni bebley niya kametbal di emin ni bebley eyad puyek hu negosyanteh da? 9 Hi Apu Dios e Kabaelan tun emin hu nannemnem ni mengihhanniman ni nunyan bebley ma-lat meibabah idan emin hu kapakaddeyyawan tutu-ud kebebbebley eyad puyek ma-lat mepappeg hu daka pampahhiyyai.
10 Hi-gayun tutu-ud Tarsis ey nebahbah ida kadekkalin bapor yud bebley yu. Mambalin kayu law ni newetwet ni mampeyyew e heniddan tutu-ud Egypt. 11 Inusal Apu Dios hu et-eteng ni kabaelan tun memahbah idan emin ni kebebbebley eyad puyek, anin idan bebley ni wadad gilig ni baybay. Bahbahen tudda nehammad ni neluhud ni bebley di Phoenisia † 23:11 Huyyaddan bebley ni nakahhammad ni neluhud di Phoenisia ey ya Sidon niya Tyre. et meendi kabaelan da. 12 Heninnuy hu inhel tuddan tutu-ud Sidon: “Nepappeg law hu pan-an-anlaan yu, et anggehemmek kayulli tep panhelheltap dakeyu. Anin ni umbesik kayud Cyprus et endi damengu hu linggep ni biyag yudman.”
13 Ang-ang yu impahding ni iAssyria ni bebley idan iBabilon. ‡ 23:13 Yadda sindalun iAssyria ni impangulun Sennakerib ey binahbah da hu Babilon eman ni 689 B.C. Ginubat dadda et bahbahen dan emin hu hipan wadadman ni bebley, anin idan netuping ni luhud da, et yadda law animal di muyung hu kamanha-ad diman. § 23:13 Ya pinhed nunyan e-helen ey hedin yadda iBabilon man eleg da kabaelan ni ibbebsikan ida buhul dan iAssyria, ey hanniman dama e endi kabaelan idan tutu-ud Tyre niyad Sidon ni ibbebsikan ida buhul da.
14 Hi-gayun nampambapor ey pantete-ul kayun lemyung yu tep mekabbahbah hu bebley yun Tyre et endi keihhikkugan yu.
15 Yan nunman alin aggew ey meliwwan hu Tyre * 23:15 Ya bebley e Tyre ey nambalin ni beken law ni importanteh eman ni negibbuhan ni nansakupan ni sindalun Nebukadnessar e patul di Babilon. Ey yadda bimmebley diman ey nambalin ida law ni newetwet. Nelabah hu pigan toon ey neihullul ida iPersia ni nansakup ni hi-gada. ni nepitun toon e humman dama toon ni kapambiyagin hakey ni patul. Nem hedin nelabah humman ni bilang ni toon, ey mambalin ali Tyre ni heni etan ni lawah ni biid hakey ni a-appeh. 16 Heninnuy humman ni a-appeh: “Hi-gam ni lawah ni biin tuka iggatang annel tud laki, ey liniwwan daka law. Alam mewan hu ayyuding mu et petettennul mu et kamanliklikweh eyad bebley ey nan-a-appeh ka et matepangan ida mewan lalakki et umliddan hi-gam.”
17 Hedin negibbuh humman ni nepitun toon ey i-abulut Apu Dios humman ni bebley ni Tyre et ipahding tu hu manggettang ngu dedan henin nunman et umlidda mewan tutu-ud kebebbebley eyad puyek et mansilbin hi-gadan heni lawah ni bii e tuka iggatang annel tu. 18 Nem hedin yalli law tangdanen tu ey eleg tu iddulin, nem mei-appit nan Apu Dios et usalen idan kamandeyyaw ni hi-gatu, ma-lat igtang dad kayyaggud ni kennen niya balwasi da. † 23:18 [1-18] Ang-ang yu hu Ezekiel 26:1 ingganah di 28:19 et ya Amos 1:9-10.
*23:1 23:1 Yadda dewwan et-eteng ni bebley e Tyre niya Sidon ey humman ida hu importanteh ni bebley di Phoenisia. (Ang-ang yu hu verses 2, 4 et ya 12.)
†23:11 23:11 Huyyaddan bebley ni nakahhammad ni neluhud di Phoenisia ey ya Sidon niya Tyre.
‡23:13 23:13 Yadda sindalun iAssyria ni impangulun Sennakerib ey binahbah da hu Babilon eman ni 689 B.C.
§23:13 23:13 Ya pinhed nunyan e-helen ey hedin yadda iBabilon man eleg da kabaelan ni ibbebsikan ida buhul dan iAssyria, ey hanniman dama e endi kabaelan idan tutu-ud Tyre niyad Sidon ni ibbebsikan ida buhul da.
*23:15 23:15 Ya bebley e Tyre ey nambalin ni beken law ni importanteh eman ni negibbuhan ni nansakupan ni sindalun Nebukadnessar e patul di Babilon. Ey yadda bimmebley diman ey nambalin ida law ni newetwet. Nelabah hu pigan toon ey neihullul ida iPersia ni nansakup ni hi-gada.
†23:18 23:18 [1-18] Ang-ang yu hu Ezekiel 26:1 ingganah di 28:19 et ya Amos 1:9-10.