80
Ya a-appeh Asap ni meidwat etan ni kamengipappangngulun a-appeh. Huyyan a-appeh ey kei-ingngeh tu etan a-appeh ni kantuy “Ya habung ni lily ni pekitbalan.”
1 Dengel mu dasal mi e Apu Dios e heni kamengippattul niya kamengipappangnguluddan helag Joseph niya yimmudung di ta-pew ni Kaban di nambattanan idan anghel diman. * 80:1 Exodus 25:22
2 Peang-ang muddan tuud Epraim, yad Benjamin niyad Manasseh hu et-eteng ni kabaelan mun mengihwang ni hi-gamid lawah.
3 Apu Dios, baddangi dakemi ma-lat mengu-unnud kami mewan ni hi-gam, niya peang-ang mu anhan hu hemek mun hi-gami ma-lat meihwang kamid lawah.
4 Apu Dios e Kabaelan tun emin, kaw nanengtun nemahhig hu bunget mun hi-gami, et humman hu eleg mu penengngudin dasal min tutu-um?
5 Heni ya ligat hu intuging mun hi-gami ey heni ya lewa hu impainuinum mun hi-gami, tep nemahhig ni mika panlelehhani.
6 In-abulut mun pippihulen dakemiddan buhul min nambebley di nanlinikweh niya dakemi kapennadngelin hi-gada.
7 Baddangi dakemi e Apu Dios e Kabaelan tun emin ma-lat mengu-unnud kami mewan ni hi-gam, niya peang-ang mu anhan hu hemek mun hi-gami ma-lat meihwang kamid lawah.
8 Inlapu dakemillid Egypt et i-li dakemidya et degyunen mudda hu tuun nampambebley eyad bebley et ihullul dakemi. Heni kami temel ni grapes ni mulli illad Egypt et itnem mudya e bebley.
9 Heni ginebutam huyyan puyek, et kayyaggud temel ni intanem mun grapes. Hi-gami neieligan nunman ni grapes. Limmehed hu lamut tu niya pimmappanga et heyebheban tun emin eya bebley.
10 Anin yadda duntug et hiniduman tu et hilungen tudda hu etata-gey ni sedar.
11 Ey dimmateng ida hu utduk ni pangetud Baybay e Mediterranean di appit ni kakelinnugin aggew niyad Wangwang e Euphrates di appit ni kasimmilin aggew.
12 Nem yan nunya ey in-abulut mun bahbahen da hu luhud di nanlinikweh e inway mu humman ni grapes, et kapanhin-e-kaniddan emin ni katuutuun kamelebbah hu lameh tu,
13 niya kapambahbahaddan ulha niyadda etan edum ni animal di muyung.
14-15 Apu Dios e Kabaelan tun emin, entan dakemi eway, nem ihanggam law anhan daman hi-gami, et uhdungan dakemin tuum, ma-lat ihwang dakemin kamei-ellig etan di grapes ni heni mu intanem eyad bebley. Huyyan intanem mu ey heni u-ungngam ni pinutuk mu. † 80:14-15 Ya pinhed nunyan e-helen e “u-ungngan pinutuk Apu Dios” ey yadda helag Israel winu hi Christo ni kamengippaptek ni tutu-un Apu Dios.
16 Nemahhig ni mika panlelehhani hu kapehpehding idan buhul min hi-gamin heni kami etan ni grapes ni daka pangkep-aha ni nanlegab da. Pampapetey mudda ma-lat penang-angan dan bunget mu.
17 Ipaptek mu anhan etan tuun pinhed mu niya pinilim ni um-ehneng di winannan mu, ‡ 80:17 Ya pinhed nunyan e-helen e “etan tuun pinhed mu niya pinilim ni um-ehneng di winannan mu” ey yadda na-mu helag Israel winu hi Christo ni kamengippaptek ni tutu-un Apu Dios.
18 et wada inna-nu tun eleg daka law pengiwwallengi. Ihammad mu hu mika pengullug, et hi-gam mewan law hu daydayawen mi.
19 Baddangi dakemi e Apu Dios e Kabaelan tun emin ma-lat mengu-unnud kami mewan ni hi-gam, niya peang-ang mu anhan hu hemek mun hi-gami ma-lat meihwang kamid lawah.
*80:1 80:1 Exodus 25:22
†80:14-15 80:14-15 Ya pinhed nunyan e-helen e “u-ungngan pinutuk Apu Dios” ey yadda helag Israel winu hi Christo ni kamengippaptek ni tutu-un Apu Dios.
‡80:17 80:17 Ya pinhed nunyan e-helen e “etan tuun pinhed mu niya pinilim ni um-ehneng di winannan mu” ey yadda na-mu helag Israel winu hi Christo ni kamengippaptek ni tutu-un Apu Dios.