1 Morarame Exitewão tomĩnose Sauru a jehno toexiryke. Morarame Exitewão etapaxĩpo Jezu poetory tõ totapazomose moroto ro zehnotokomo a. Morara exiryke tãtahpahse toh emero Jutea pona, Samaria pona, enara. Peturu tõ rokẽ epara kynexine. 2 Morarame Ritonõpo omipona exiketomo a Exitewão tyhnamose. Tãtarerekase toto. Ekepyry tarose eya xine zonẽtohme.

3 Mame Sauru toytose Jezu poetory zupise, toto zehno toexiryke. Emero rokẽ tapyĩ taka toytose ynororo toto apoise. Orutua kõ tapoise aporykõ poko, nohpo tõ maro ãpuruhpyry taka ẽmatohme.

4 Morara exiryke toepase toto. Emero pata tõ poro toytose toto imehnõ zuruse Ritonõpo omiry poko.

5 Morarame Firipe toytose Samaria pona morotõkõ amorepase Jezu Kyrixtu poko. 6 Kure Firipe omiry totase imoihmãkomo a. Otato toehse toto kurãkõkara kurãkary ropa eneryke tyya xine. 7 Joroko tõ tutũtanohpose ropa eya ahno ae. Joroko tõ tũtary ropahtao toto kurohtae kui tykase toto. Tuhke ytoytopynỹpotõ roropa tukurãkase ropa eya. 8 Morara exiryke tãtãkyemase toto morotõkomo, Samariapõkomo.

9 Moroto pyaxi kynexine, esety Ximão. Pake tunuhnatase itamurume ynororo Samaria po.

—Pyaxime ase, tykase ynororo repe. 10 Mokyro omipona toehse toto poetohtimãkomo, ikaripãtyamo, enara.

—Mokyro jamihme mana Ritonõpo poe, tykase toh repe. 11 Yrome joroko poe uhnato ynororo kynexine, Ritonõpo poe pyra. Pake aepyaximahpyryme aexiryke toytose toto eya enetao. 12 Yrome Firipe tõturuse eya xine Ritonõpo kuesẽkõme exiry poko. Morarame zae aomiry tonetupuhse toto a. Jezu Kyrixtu poetoryme toehse toto. Tõpurihkase roropa toto Jezu omi poe, orutua komo, nohpo tomo, enara. 13 Morarame Ximão a roropa Jezu tonetupuhse. Morarame Firipe a tõpurihkase tahtao tõpurihkahpõ onurumekara toehse ynororo. Kurãkõkara kurãkary ropa tonese eya. Tõsenuruhkase ynororo pitiko rokẽ pyra.

14 Morarame, “Samariapõkomo a Ritonõpo omiry tapoise mana,” kary totase Jezu poetory tomo a, Jerusarẽpõkomo a. Naeroro asakoro orutua tonyohse toto morotõkomo a, Peturu, João, enara tonyohse toto. 15 Morarame Samaria pona tooehse tahtao xine tõturuse toto Ritonõpo a,

—Ouzenu ekaroko moxiamo a õmiry apoihpõkomo a, tykase toto Ritonõpo a, 16 Tuzenu onekaropyra ro Ritonõpo exiryke toto a, nakuaka rokẽ tõpurihkase toto Jezu omi poe. 17 Morarame tomarykõ tyrise ahtao eya xine morotõkõ zuhpokoxi, Tuzenu tokarose Ritonõpo a eya xine rahkene.

18 Morarame moro eneryke tyya tytinerũ ekarory se Ximão toehse Peturu tomo a, toto sã Ritonõpo zuzenu ekaroneme toehtohme repe. 19 Ynara tykase ynororo eya xine,

—Ritonõpo zuzenu ekaroneme kyritoko, imehnõ zuhpokoxi jemary riryhtao ya moxiã aka Ritonõpo zuzenu omõtohme, tykase ynororo Peturu tomo a.

20 Yrome Peturu a tozuhse ynororo. Ynara tykase ynororo,

—Ritonõpo oenyohsasaka mana apotoimo htaka otinerũ maro, inekarohpyry epekatyry se oexiryke tineru poko. 21 Oesary kara sero taro, tykase Peturu eya. —Ritonõpo omipona pyra oexiryke ipoetoryme pyra mase. 22 Iirypyryme mase okurohtao Ritonõpo a. Moro oorypyry irumekako! Ekorokapoko Ritonõpo a. Otarãme oorypyry korokãko ropa mana, tykase ynororo eya. 23 —Iirypyryme oexiry waro ase. Itũ sã okurohtao mana zumoxike oexiryke. Tymyhse sã roropa mase oorypyry a, tykase Peturu, Ximão tyenonohse.

24 Mame ynara tykase Ximão eya xine,

—Ajohpãme sã kaxitoko amarokõ ypoko. Oturutoko Ritonõpo a kure rokẽ jehtohme, juãnohpyra Ritonõpo ehtohme, tykase ynororo Peturu tomo a.

25 Morarame imehnõ tamorepase Peturu tomo a João maro Ritonõpo omiry poko. Kure rokẽ turuse toto Jezu poko. Morarame axĩ pyra toytose ropa toto imehnõ amoreparyme pata tõ poro, tosaka xine, Jerusarẽ pona.

26 Morarame Ritonõpo nenyokyhpyry kapu ae tõturuse Firipe a,

—Ytokose osemae Jerusarẽ esema taka, eporehkakety ae oytotohme ona pona, Kaza pona. 27 Mame Firipe toytose moro ae. Moroto orutua tonese eya Etiopiapono. Mokyro Kãtase mõkomory esẽ kynexine. Kãtase Etiopiapõkõ esẽ kynexine. Mokyro ipoetory ytõko ropa kynexine Jerusarẽ poe Ritonõpo omiry poko tãtamorepaxĩpo. Ritonõpo omipona toehtohme toytose ynororo Jerusarẽ pona. 28 Morarame Ritonõpo omiry sekeremaryme ytõko ropa kynexine kahosa ae, Izaja nymerohpyry sekeremaryme. 29 Morarame Firipe taropose Ritonõpo zuzenu a,

—Kahosa aka ytoko mose maro oytotohme, tykase ynororo eya. 30 Tururume toytose Firipe kahosa aka. Morarame Izaja nymerohpyry sekeremary totase eya.

—Onysekeremary enetupuhnõko hma? tykase ynororo Etiopiapono a.

31 —Arypyra, onenetupuhpyra reahse. Tamorepane ke jahtao enetuputyry. Otyriko. Ymaro eropa, tykase ynororo Firipe a. 32 Ynara Ritonõpo omiry sekeremãko kynexine,

34 Morarame Etiopiapõ tõturupose Firipe a,

—Onoky poko Izaja nymerohpyry sero? Typoko, imepỹ poko? tykase ynororo Firipe a.

35 Mame Firipe tõturuse imaro Ritonõpo omiry poko, inysekeremahpyry poko. Kure turuse eya Jezu poko. 36 Morarame toytorykohtao tuna pona toeporehkase toto.

—Tunahxo mony. Jẽpurihkary se pyra hma? tykase mokyro Etiopiapõ Firipe a.

37 —Arypyra, Jezu enetuputyryhtao oya oesẽme oẽpurihkãko ase, tykase Firipe eya.

—Ỹ, Jezu Kyrixtu enetupuhnõko ase, Ritonõpo mũkuru nymyry mokyro, jesemy, tykase ynororo Firipe a.

38 Mame kahosa totypohkapose eya. Toytose toto nakuaka, Firipe maro. Mokyro Etiopiapõ tõpurihkase eya Jezu omi poe. 39 Morarame towõse ropa nakuae toto ahtao, Firipe tarose ropa Ritonõpo zuzenu a. Onenepyra ropa toehse Etiopiapono. Mame toytoryme ropa tãtãkyemase ynororo. 40 Morarame Firipe tonese ropa imehnomo a rokene, Azotu po ahtao. Mame imeimepỹ pata tõ poro toytoryhtao Ritonõpo omiry poko tõturuse ynororo morotõkõ netaryme, Sezarea pona toytoryme.