1 Morarame Romano kynexine Sezarea po, esety Koneriu. Soutatu esẽ kynexine ynororo. 100me ipoetory tõ kynexine, soutatu tomo. Itariapõkõme toto esety. 2 Mokyro Ritonõpo waro exikety kynexine. Aomipona roropa kynexine tytapyĩtaõkõ maro. Tuhke tytinerũ tokarose eya juteu tomo a, tymõkomokãkara a. Kokoro rokẽ Ritonõpo maro tõturuse ynororo. 3 Morarame Koneriu a Ritonõpo nenyokyhpyry tonese tõsenety, xixi tywykahme ahtao. Morarame ynara tykase sã ynororo eya,

—Koneriu, tykase.

4 —Otara myka? tykase Koneriu Ritonõpo nenyokyhpyry a, tõserehse.

—Õtururu Ritonõpo a totase eya mana. Tymõkomokãkara pyno oexiry tonese roropa eya. 5 Wenikehpyra ynororo kure oexiry poko. Naeroro opoetory aropoko Jope pona Ximão enehtohme xiaro. Esety akorõ Peturu. 6 Tosetyae exikety maro reh mahna, okyno pihpyry rine mahro. Itapyĩ mã tuna ehpio. Ãmorepãko mã mokyro Ritonõpo omiry poko zuaro oehtohme, tykase Ritonõpo nenyokyhpyry Koneriu a. 7 Morarame tymaro auturuhpyry toytose ropa ahtao, tynamoto tonehpose tyya, oseruao soutatu maro, toto a tõturutohme. 8 Mame tõsenehtopõpyry poko toto zuruxĩpo, tonyohse toto Jope pona.

9 Yrokokoro Koneriu poetory moe pyra Jope poko toehse toto ahtao, Peturu tõnuhse tapyi mypatarãnaka, tõturutohme Ritonõpo a, tãxiahtao toehse ahtao. 10 Morarame Peturu tomitapãse. Tõtukuru se repe. Yrome tõsẽ atahnopyra ro ahtao tõsenehse ynororo Ritonõpo poko. 11 Kapu atapiakary tonese eya. Otuato konõto panõ tyhtose eary poko Peturu myhtokoxi. 12 Moro tapo onokyro panõ tonese eya, nono po ro ytoketomo, torõ tõ roropa. 13 Morarame ynara tykase Ritonõpo,

—Mokaro etapako õtyme, tykase Peturu a.

14 —Onetapara ase. Moinoro ase tõsẽ rypyry onõpyra ypoetoae ro, tykase Peturu eya.

15 Morarame sekere tykazomose inetaryme,

—Õtyme ynekarohpyry poko, “Tõsẽ rypyryme nase,” kara exiko, tykase. 16 Mame tõnuhse ropa otuato panono. Morarame tyhtozomose osemazuhme ayhtohpyry saaro. Mame tõnuhse ropa rahkene, jũme, kapu aka.

17 Morarame Peturu toepohnohse tynenehpyry poko. Aemynyhmary rohtao Koneriu nenyohtyã toeporehkase toto.

—Otokohko Ximão tapyĩ nae? tykase toto osemataõkomo a.

—Seny, tykase toto.

18 —Taroh Ximão Peturu nahe? tykase toto tõturupose.

19 Morarame toepohnopyryhtao ro Ritonõpo zuzenu omiry totase Peturu a,

—Etako pahne, ahno mokaro oupĩko. 20 Oyhtoko. Enaromyra exiko. Toto maro ytokose. Ynenehpotyã mokaro, tykase Ritonõpo zuzenu eya. 21 Morara kary etaryke tyya Peturu tyhtose ropa zara tae Koneriu nenyohtyã omikase.

—Taro ase. Oty kase moehtou? tykase Peturu eya xine.

22 Morarame tõturuse toh eya. Ynara tykase toto,

—Koneriu yna enehpoase tarona, tykase toto. —Kure ynororo, Ritonõpo omipona exikety. Emero juteu tõ, “Kure mana,” ãko roropa ipoko toh mana. Ritonõpo nenyokyhpyry kapu ae imaro tõturuse, itapyĩ taka oytotohme, imaro õturutohme, tykase toto Peturu a.

23 —Omõtoko tapyi taka, tykase Peturu eya xine. Mame moro tao tynyhse toto.

Yrokokoro toto maro Peturu toytose imehnõ Jezu poetory tõ maro, Jopepõkõ maro. 24 Sã aeporehkatohkomo Sezarea pona. Moroto Koneriu kynexine toto eraximãko, tyekyry tõ maro, tope tõ maro, Peturu otururu etatohme. 25 Morarame Peturu omomyryhtao tapyi taka, Koneriu tooehse aomikase. Tosekumuru po typorohse ynororo Peturu ẽpataka.

—Kure mase. Ritonõpo nenyokyhpyryme mase, tykase ynororo eya. 26 Yrome Peturu a tanỹse ropa ynororo.

—Owõko ropa. Xikihme rokẽ exiko. Ritonõpo kara ase, ahno rokẽ ase, apano ro, tykase Peturu eya. 27 Morarame tõtururukõme Koneriu maro tomõse ynororo tapyi taka. Tuhke ahno tonese eya moro tao. 28 Mame tõturuse ynororo eya xine. Ynara tykase,

—Juaro matose. Juteume ase. Imehnõ maro juteutõkara maro yna ahtao popyra mana yna a. Itapyĩkõ taka roropa yna omomyryhtao popyra mana yna tamuru tõ omi poe. Yrome Ritonõpo utuarõmase imehnõ poko, “Nuriame mose nase,” kara jehtohme. 29 Morara exiryke tykohmase jahtao oya xine kure rokẽ ezukuase anaropotyamo. Oehno oturuse oya xine. Oty katohme kuenehpoase tarohna? tykase Peturu, tõturupose.

30 Morarame Koneriu a tozuhse,

—Mokokonie otuhpyra exiase jotururuke Ritonõpo maro. Tapyi tao exiase. Morarame xixi tywykahme toehse ahtao orutua enease jẽpataka, tupoke saerehkane ke. 31 Ynara nase sã ya, “Koneriu, õtururu totase mã Ritonõpo a. Tymõkomokãkara pyno oexiry roropa tonese eya mana. Wenikehpyra ynororo kure oexiry poko. 32 Naeroro opoetory aropoko Jope pona Ximão enehtohme xiaro. Esety akorõ Peturu. Tosety ae exikety tapyĩ tao mana, okyno pihpyry rine tapyĩ tao. Tuna ehpio mã itapyĩkomo. Tooehse ynororo ahtao oturũko oya xine mana,” nase Ritonõpo nenyokyhpyry ya. 33 Morara kary etaryke ya ypoetory tõ aropoase axĩ oehtohme. Tãkye ase tooehse oexiryke. Seromaroro taro ynanase Ritonõpo poko. Õtururu etase moxiã noehno, tykase Koneriu eya.

34 Morarame Peturu tõturuse eya xine. Ynara tykase,

—Seromaroro zuaro ase. Emero kypyno xine Ritonõpo exiry waro ase, yna rokẽ kara pyno Ritonõpo mana, tykase Peturu eya xine. 35 —Emero tõmipona exiketõ kure Ritonõpo a mana, ajoajohpe pyra toto exiryke, juteu tomo, juteutõkara, enara, tykase Peturu. 36 —Ritonõpo a Izyraeu tõ tamorepapose urutõkomo a, Jezu Kyrixtu waro toto ehtohme, zehzehno pyra toto ehtohme. Emero Kuesẽkõme Jezu Kyrixtu mana. Moro waro matose. 37 Kuesẽkõme aexiry poko João tõturuse ahno ẽpurihkaryhtao tyya. Morotoino Jezu poko tutuarõtase toto Karireapõkomo. Juteapõkõ roropa tutuarõtase toto. Zuaro matose. 38 Seromaroro amarokõ roropa Jezu waro exĩko matose, tykase Peturu eya xine. —Ritonõpo a Tuzenu tokarose eya emero zuaro ehtohme. Morarame toytoytose ynororo. Ahno poko toenupunase. Joroko nyryhmatyã tukurãkase ropa eya, kurãkõkara roropa, Ritonõpo imaro exiryke. 39 Jezu waro ynanase, imaro toytose yna exiryke yna patary poro, Jerusarẽ poro, enara. Toxixihmase ynororo juteu tomo a wewe pokona, aorihtohme.

40 —Yrome Ritonõpo a tõsemãkase ropa oseruao tõmehse ahtao. Mame tõsenepose ropa ynororo. 41 Emero pyra, tunutuarõtanohtyamo a rokẽ tõsenepose ynororo, yna a rokene, tykase Peturu. 42 —Ynanotukuase imaro tõsemãse ropa ynororo ahtao. Mame yna enyokyase ãmorepatohkõme typoko, tykase Peturu. —Imeĩpo typoetory tõ apiakase oehnõko ropa mana iirypyrymãkõ aropotohme apotoimo htaka. Aorihtyã roropa apiakase oehnõko mana Ritonõpo omi poe. Moro poko ourutohkõme yna enehpoase Jezu xiaro. 43 Mokyro poko tymerose Ritonõpo poe urutõkomo a. Enetuputyryhtao oya xine oorypyrykõ korokãko mana, tykase Peturu eya xine.

44 Peturu a toto zururuhtao ro Ritonõpo zuzenu tyhtose. Tõmiry etananõ aka tomõse. 45 Moroto juteu tõ kynexine roropa Peturu marõkomo.

—To! tykase toto. Tõsenuruhkase toto, juteutõkara aka roropa Ritonõpo zuzenu tomõse exiryke. 46 Toto aka Ritonõpo zuzenu omomyry tonetupuhse eya xine, imeimehnõ omiryae toto otururuke, “Imehxo Ritonõpo mana,” kary etaryke roropa tyya xine. Morarame Peturu tõturuse tymarõkomo a,

47 —Sẽpurihkatone toto tuna kuaka, kysã xine moxiã aka Ritonõpo zuzenu tomõse exiryke, tykase Peturu eya xine. 48 Morarame tõpurihkase toto eya xine Jezu poetoryme toehse toto exiryke.

Morarame,

—Taro exiko aporo yna maro. Oytory se pyra ynanase aporo, tykase toto Peturu a.