1 Morarame Pexitu Sezarea pata pona tooehse tahtao, oseruao rokẽ tynyhse moroto. Morotoino Jerusarẽ pona toytose ynororo. 2 Moroto Ritonõpo maro oturuketõ tuisary tõturuse eya, imehnõ juteu tõ tuisary maro Pauru kerekeremãko. Ynara tykase toto Pexitu a,

3 —Ajohpãme sã Pauru enehpoko xiaro Jerusarẽ pona, yna maro auturutohme, tykase toh repe, etapary se toexirykõke osema tao. 4 Yrome Pexitu ynara tykase eya xine,

—Pauru moroto rokẽ mana, Sezarea po. Okynã pyra morotona ytõko ropa ase. 5 Ehmaropa oytorykõ se awahtao xine mokyro hxirose azahkuru aexiry poko, tykase ynororo eya xine.

6 Morarame 10me tynyhse ahtao toytose ropa ynororo Sezarea pona. Yrokokoro porohtoh taka typorohse tahtao, Pauru tonehpose tyya. 7 Mame Pauru tooehse ahtao Jerusarẽ poe aehtyã xikihme toehse toto. Itamurume Pauru hxirory se toh repe azahkuru aexiry poko. 8 Yrome ynara tykase Pauru eya xine,

—Ehxiropyra ase azahkuru pyra jexiryke. Moeze omihpyry omipona ase ipunaka. Ritonõpo tapyĩ onyjorokopara ase. Kowenu omipona roropa ase, tykase Pauru.

9 Yrome topeme juteu tõ se Pexitu kynexine. Naeroro ynara tykase ynororo Pauru a,

—Oytory se pyra Jerusarẽ pona mah, moero moxiã oturupotohme ya opoko? tykase.

10 Yrome Pauru a tozuhse, ynara tykase ynororo,

—Jytory se pyra ase. Taro ase amaro, kowenu terekatume oexiryke. Taro kure jekaropotohme kowenu tapyĩ tao. Juteu tõ onyryhmara exiase, zuaro ro mase. 11 Kowenu omipona pyra jahtao, imepỹ totapase ya ahtao jetapary se roropa exiry oya xine. Yrome imehnõ onyryhmara jahtao, jekarory se pyra ase eya xine, kowenu omipona jexiryke. Ĩperatu a kuaropoko, Seza a. Imaro rokẽ oturuse jytory se ase, tykase Pauru terekatu a.

12 Mame tõturuxĩpo kõseriu tõ maro ynara tykase Pexitu Pauru a,

—Seza a oytory se awahtao eya aaropõko ase, tykase.

13 Morarame tuhke pyra tynyhse ahtao tuisa Akyripa tõ tooehse Sezarea pona, typyty maro, Pexitu maro oturuse. Ipyty esety Perenixi. 14 Moroto tuhke tynyhse ahtao Pauru tokarose eya. Ynara tykase ynororo eya Pauru poko,

—Orutua mã ãpuruhpyry tao, Perixi nynomohpyry. 15 Jerusarẽ po jahtao Ritonõpo maro oturuketõ tuisary ipoko noturuase ya, juteu tõ tamuxiry maro etapapotohme repe. 16 Yrome ezukuase toto, “Romanome ahtao onetapara ase, oturupyra ro awahtao xine imaro ynetaryme, aosepynohtohme. Imaro soturutatose aporo zuaro jehtohme,” ase eya xine. 17 Morarame tooehse toto ahtao, yrokokoro yporotyase ekaropotohme. Pauru enehpoase ya. 18 Yrome mokyro hxiroryhtao tyorõ poko tyhxirose eya xine. 19 Tytamurukõ namorepatopõpyry poko rokẽ noturuase toto. Imepỹ poko roropa, Jezu poko. “Aorikyhpyry mokyro,” nase rokẽ toto. Yrome, “Orihpyra, tõsemãse ropa mana,” ãko Pauru. 20 Zuaro pyra jexiryke ynara ase Pauru a, “Oytory se pyra hma Jerusarẽ pona, moroto oturupotohme ropa ynetaryme, ohxirohpõkõ maro?” ase eya. 21 Yrome, “Seza maro rokẽ jotururu se ase,” karyke ẽmapoase ropa Roma pona aropotohto Aukuxtu Seza pataka, tykase Pexitu.

22 Morarame Akyripa ynara tykase Pexitu a,

—Mokyro otururu etary se ase, tykase Akyripa.

—Kokoro etãko mase, tykase Pexitu eya.

23 Mame yrokokoro Akyripa tooehse kowenu tapyĩ taka Perenixi maro, kurã ke tupoke, typoetory tõ maro, soutatu tuisary tõ maro, pata esã roropa maro. Mame Pauru tonehpose Pexitu a. 24 Tooehse ahtao Pexitu tõturuse aporo. Ynara tykase ynororo,

—Tuisa Akyripa, amarokõ roropa emero, mose orutua enetoko. Juteu tõ nyetunu Jerusarẽ po jahtao, taro roropa etapary se toh nexiase. 25 Mose kure rokẽ ya, yrome jehno juteu tõ exiryke aropõko ase Roma pona, Aukuxtu Seza maro auturutohme, imaro tõtururu se aexiryke. 26 Yrome otara ãko ha, pape poko imerõko, aropotohme Seza neneryme? Naeroro mose enehpono tarona ourutohkõme. Omoro nymyry oturuko imaro, tuisa Akyripa, zuaro jehtohme, pape merotohme ya. 27 Pauru aropory se ase repe, yrome azahkuru aexiry onenetupuhpyra jexiryke anaropopyra ro ase, tykase Pexitu.