1 Morarame toepohnohse tahtao xine,

—Saropotone Itaria pona, tykase toto. Mame Pauru tokarose Juriu a, imehnõ ãpuruhpyrytaõkõ maro, wapu ae toto arotohme Itaria pona. Juriu sajẽtu, Aukuxtu poetory. Pauru maro ynanytoase. 2 Morarame moroto Sezarea po ynanotyriase Ataramitiu poe aepyhpyry wapu aka, Azia pona yna ytotohme, Arixtaku maro. Mokyro Tesaronikapono, Masetoniapõpono. 3 Yrokokoro Xitõ pona ynanytoase. Juriu noturuase Pauru a,

—Oepe tõ maro oexiry se awahtao ytoko, nase, Pauru zuno pyra toexiryke. 4 Morotoino ynanytoase ahmõta Xipere kuroko, iratozo ae, tyryrykane jamihme exiryke. 5 Morotoino tuna konõto takuohse yna. Xirixia ehpikuroko toytose yna, Pãpiria ehpikuroko roropa Mira pona, Rixiapõ pona. 6 Moroto sajẽtu maro imepỹ wapu aka ynanotyriase, Arexãtyria poe Itaria pona ytokety aka.

7 Moro ae axĩ pyra ynanytoase Synitu pona tyryrykane popyra exiryke. Saumona kuroko ynanytoase Kereta zomye. 8 Morarame ynanytoase wapu ae ehpikuroko, kuremỹme samo, pata pona, kure otyryhkatoh pona. Moro Rasea maro atameke pyra.

9 Moroto okyna yna ahtao ytotoh pyra toehse. Naeroro Pauru ynara tykase toto a,

10 —Ytotoh pyra nase. Kuytorykohtao seromaroro, wapu nerỹko mana. Itamurume mõkomo nerỹko. Ahno roropa orihnõko otarãme, tykase Pauru repe.

11 Yrome mokyro sajẽtu, wapu esẽ tõ omipona nexiase, Pauru omipona pyra. 12 Otyryhkatoh moroto popyra exiryke toytorykõ se toh kynexine Penixi pona, moroto toehtohkõme konopo ae, kure moroto exiryke. Tyryry karahko Penixi po, Kereta ahmõta po.

13 Naeroro tyryry tykase ropa ahtao,

—Ehmaropa, tykase toto. Etypohkatoh tanỹse ropa toto a wapu ytotohme ahmõta Kereta ehpikuroko. 14 Yrome okynã pyra tyryrykane tyjamihtase. Tyryrykane esety Euroakirão. 15 Moro a wapu tarose axiny.

—Ah kuakuarotou, ynanase. 16 Ahmõta pitiko kuroko yna ytoryhtao tyryry karahko nexiase. Naeroro ynanerokuase itamurume kanawa anymyry poko wapu aka. 17 Kanawa tanỹkehse ahtao wapu ynanuahmykyase ehmopyra aehtohme. Yna aroryke tyryrykane a Ripia ehpikoxi isawã zuno toehse yna. Morara exiryke wera touse yna a, tywerake pyra rokẽ ytotohme tyryrykane po. 18 Yrokokoro pohkane a anyanymyryhtao mõkomo ynanypapyase nakuaka yna oserepyryke, wapu tẽme hkopyra ehtohme. 19 Yrokokoro wapu mõkomory nymyry ynanypapyase.

20 Tuhke xixi onenepyra ynanexiase, xirikuato onenepyra roropa, konopo itamurume exiryke tyryrykane maro,

—Orihnõko sytatose, ynanase. Ynanoserepyase.

21 Tuhke otuhpyra ynanẽmepyase. Naeroro Pauru ynara nase yna a,

—Jepe tomo, jomipona awahtao xine Kereta po ro sehtory, mõkomo onypahpyra exiry, wapu kure ro roropa exiry. 22 Yrome seromaroro kuetatoko. Emynyhmara ehtoko. Orihpyra matose. Wapu rokẽ nerỹko mana. 23 Morara ãko ase Ritonõpo nenyokyhpyry tooehse exiryke koko ya oturuse. Jesẽme mana, ipoetoryme ase. 24 Ynara nykã ya, “Pauru, torẽtyke pyra exiko. Seza a ytõko mase, Roma tuisary a. Oewomãko mã Ritonõpo. Mokaro roropa ewomãko mana opokoino,” nykã inenyokyhpyry ya josenety. 25 Naeroro sekese ehtoko ropa. Ritonõpo enetupuhnõko ase. Ajohpe pyra mana. Kuewomatorỹko mã inenyokyhpyry nekarohpyryae ro. 26 Yrome ahmõta pona kuarotorỹko mã tyryrykane, tykase Pauru yna a.

27 Morarame 14me tynyhse ahtao tyryrykane jamihme ro nexiase. Xiaxiake wapu tarotarose, Metiteraneu tuna ena. Mame onoa wapu poko erohketõ ynara nase,

—Otarãme nono moe pyra mana, nase toto. 28 Tuna tukuhse toto a, zueme aexiry waro toehtohkõme. Zueme ro tukuhse eya xine. Moino akoxi pitiko tukuhse ropa toto a, zueme hkopyra. 29 Mame topu a wapu etapary zuno toexirykõke 4me etypohkatoh tomapose toto a, wapu ãtykyry wino. Tõturuse toto Ritonõpo a axĩ aẽmehtoh poko. 30 Morarame wapu pokõkõ irumekary se toehse. Kanawae toytorykõ se toh repe. Kanawa tomapose tuna kuaka toto a, etypohkatoh wapu potyry pokona tyritohme sã repe. Yna enekunopyry se rokẽ toh kynexine. 31 Mame Pauru tõturuse sajẽtu tomo a, soutatu tõ maro,

—Wapu rumekaryhtao moxiamo a nerỹko sytatose, tykase ynororo.

32 Morara tykase Pauru exiryke kanawa eary tysahkase soutatu tomo a, kanawa yhtotohme.

33 Aẽmepyryhtao Pauru tõturuse toto a,

—Otuhtokose. Pake oemirykõ rohnõko matose, nyhpyra roropa. 34 Morara exiryke otuhtoko, jamihme oehtohkõme ropa. Torẽtyke pyra ehtoko. Orihpyra matose, tykase eya xine.

35 Morara kaxĩpo wyi apoiase ekamotohme. Noturuase Ritonõpo a mokaro netaryme, wyi ekarotohto. Notukuase ynororo yna maro. 36 Morarame sekese ropa ynanexiase, tõtuhse ropa yna exiryke. 37 Wapu ao ynanexiase atapona 276 me. 38 Morarame tõtuhkehse yna ahtao, tiriiku typahse yna a nakuaka, teme hkopyra wapu ehtohme.

39 Mame tõmehse ahtao nono waro pyra toh kynexine, wapu poko erohketomo. Iporiry tonese ahtao eya xine moro taka wapu arory se toehse toto, isawãme tuna ehpiry exiryke. 40 Naeroro etypohkatoh eary tysahkase eya xine emapotohme nakuaka. Mame ãpuitoh myhty tymyhpokase eya xine. Moromeĩpo wera konõto taunuhmase ropa eya xine apõ pokona, ipotyry wino, tyryrykane a wapu arotohme isawã ehpikoxi repe. 41 Yrome isawã pona tyryhse ipotyry wino wapu. Tũpore tyryhse isawã pona. Pohkane konõto a tãtohkase wapu.

42 —Ãpuruhpyrytaõkõ setapatone epara toto ehtohme, tykase soutatu tõ repe. 43 Yrome Pauru pyno toexiryke onetapapopyra sajẽtu kynexine. Nakuae tãtakuotyry warõkõ taropose eya osemazuhme, ahmõta pona toto ytotohme. 44 Imehnõ taropose roropa eya wewe po wapu epokahkasẽ po. Emero morara rokẽ tãtakuohse ropa toto iratyhpyry po.