1 Jakorõ tomo, imepỹ Jezu poetory tyyrypyry poko toehse ahtao, mokyro maro oturutoko. Ritonõpo zuzenu omipona awahtao xine, mokyro maro oturutoko tyyrypyry rumekatohme ropa eya. Yrome mokyro onuromara ehtoko. Tuaro ehtoko roropa, oorypyrykõ poko oripopyra xine joroko tamuru ehtohme. 2 Oenupunatoko imehnõ poko, toto etuarimary eneryhtao oya xine. Mame akorehmaryhtao oya xine Kyrixtu omipona exĩko matose. 3 Yrome ynara kananõ nae, “Tuisamehxo ywy. Morara exiryke imehnõ akorehmary se pyra ase, tuisame jexiryke,” ãko repe, ajohpe. Osenekunohnõko rokẽ mã tuisame toexiry poko. 4 Osenetupuhtoko ãmoreme xine zae oexirykõ poko. Zae nymyry awahtao xine Kuesẽkõ nyripohpyry poko, tãkye exĩko matose onyrihpyrykõ poko. Mame ynara kara roropa ehtoko, “Ynyrihpyry rokẽ kure. Imehnõ nyrityã motye,” kara ehtoko onyrihpyrykõ poko. 5 Mame akĩme pyra roropa ehtoko emero porehme, oerohtohkõ poko.

6 Tamorepase awahtao xine Ritonõpo omiry poko, ãmorepanekõ epehmatoko omõkomorykõ ke. Morara awahtao xine toto akorehmãko matose.

7 Osenekunohpyra ehtoko. Ritonõpo onenekunohsaromepyra matose. Otyro tarykase oya xine ahtao, mororomero epery apoĩko ropa matose. 8 Moro saaro oorypyrykõ poko awahtao xine oorypyrykõ epehpyry apoĩko ropa matose. Orihnõko matose jũme. Yrome Ritonõpo zuzenu omipona awahtao xine, orihpỹme exĩko matose jũme, Ritonõpo zuzenu poe. 9 Naeroro penekehpyra sehtone imehnõ riry poko kure. Morarame poremãpyra kuahtao xine kurã apoĩko sytatose imeĩpo. 10 Morara exiryke imehnõ poko enupunakehpyra sehtone. Jezu poetory tõ poko roropa senupunatone kuhse.

11 Sero etyhpyry merõko ase, jemary ke rokene. Inũmehme sã ynymerohpyry nase. 12 Ãmorepanekõ mokaro, aĩkõ potapihpyry sahkapory satokomo, orẽpyra toexirykõ se toh mã repe. Imehxo toexirykõ se roropa toh mana. Morara exiryke ynara kary se pyra toto, “Jezu Kyrixtu poe rokẽ orihpỹme exĩko sytatose, toorihse exiryke kymyakãkõme, kyyrypyrykõ epehpyryme,” kary se pyra toh mana. Oty katohme? Tuhkãkõ morohne kary etary se pyra exiryke. 13 Yrome mokaro jaĩkõ potapihpyry isahkatyã Moeze nymerohpyry omipona pyra ro toh mana. Mame aĩkõ potapihpyry sahkapory se toto, imeĩpo toepyryparykõ se toexirykõke. “Yna omiry totase ahtao, tuhke tyaĩkõ potapihpyry tysahkapose,” kary se rokẽ toto imehnõ netaryme. 14 Yrome ase epyrypara kure jexiry poko, toiro jatãkyematoh nae exiryke. Jezu Kyrixtu Kuesẽkõ exixihmatopõpyry poko rokẽ atãkyemãko ase. Ynara exiryke, toorihse Jezu exiryke, josenetupuhtoh tyrisenã sã toehse. Jezu onenetupuhpynõ penetatoh se pyra ase. Morararo Jezu onenetupuhpynõ mã ysã se pyra roropa toto, enara. 15 Jezu Kyrixtu omipona kuahtao xine, ai potapihpyry tysahkase ahtao, oty kara. Onysahkara ahtao, oty kara roropa. Toiro rokẽ kure. Kuosenetupuhtohkõ tyrisenã sã toehse ahtao, moro mã kure kuhse. 16 Õsenetupuhtohkõ tyrisenã sã mana. Naeroro ynara se ase Ritonõpo a. Opoko xine Ritonõpo enupunary se ase. Torẽtyke pyra oexirykõ se roropa ase Ritonõpo a. Morara se roropa ase emero Ritonõpo poenõ nymyry poko, emero pata tõ po.

17 Taroino oseosezuhno etary se pyra ase, ai potapihpyry sahkary poko. Upũ poko piũmero nase, jetapatopõpyry topu ke. Ypipohtopõpyry otara exipyra ro nase. Jezu epe tõ kara a, typitypipohse ywy. Moro eneryke Jezu poetoryme jenetupuhnõko imehnõ mana.

18 Jakorõ tomo, ynara ãko ase Jezu Kyrixtu kuesẽkomo a, “Karaxiapõkõ pyno exikehpyra exiko,” ãko ase. Enara rokene.