1 Jakorõ tomo, Jezu poetory tõ amorepananõ mã iirypyryme toehse ahtao, toto wãnohnõkohxo Ritonõpo mana. Naeroro tuhke pyra Jezu poetory amorepananõme ehtoko. 2 Kymarokõ emero azahkuru sytatose. Toitoine rokẽ pyra. Kuomirykõ poko iirypyryme exĩko roropa sytatose. Kuomirykõ poko iirypyryme pyra kuahtao xine, kure rokẽ sytatose. Orẽpyra sytatose exĩko. Kyyrypyrykõ poko pyra roropa sytatose exĩko. 3 Kawaru mytaka kurimene pitiko rĩko ahno, tõmipona xine kawaru ehtohme. Moro kurimene pitiko rokẽ repe. Yrome ike kawaru panahmãko mã toto, tõmipona xine toto ytotohme. 4 Morararo wapu konõto. Mame tyryrykane konõto wapu arõko, yrome ãpuitoh pitiko ke wapu ãpuine ãpuĩko mana, tõmipona wapu ytotohme. 5 Morohne sã kunurukõ mana, pitiko rokẽ repe. Yrome epoe tuhke kuomirykõ tũtãko mana. Tuhke roropa kuepyrypatohkõ tũtãko kunurukõ poe.

Enetoko ke apoto pitiko repe yrome emãnõko mana. Itu zahkãko mana. Wewe zahkãko roropa itamurume, kõme itu exiryke. 6 Moro saaro kunurukõ pitiko repe. Yrome kunurukõ poe omi rypyry itamurume tũtãko mana. Mame omi xihpyry tũtaryhtao kunurukõ poe, kuosenetupuhtohkõ roropa iirypyryme exĩko mana. Apoto pokõ zatyry sã roropa omi xihpyry tũtaryhtao kunurukõ poe. Poetome ro kuahtao xine omi rypyry tũtapitõko mana kunurukõ poe. Zumo toehse kuahtao xine omi rypyry tũtãko ro mana kunurukõ poe. Apotoimo konõto oepyry sã kyzahkase xine, moro sã kuomirykõ mana. 7 Mame onokyro erẽnanopyry waro sytatose zehno pyra toto ehtohme. Ituhtaõkomo nakuaõkõ roropa. Toto torẽnanohse ahno a zehno pyra toto ehtohme. 8 Yrome kunurukõ onukuremasaromepyra sytatose kure ehtohme. Kunurukõ okoi sã mana, popyra. 9 “Kure mase Papa, yna esẽme mase,” ãko sytatose repe. Yrome kunurukõ ke ro imehnõ kerekeremãko sytatose, popyra. Tysaaro tyrise sytatose Ritonõpo a. 10-12 Tuna enatyry wino tuna kurã maro tuna itũ exikety oehpyra mana. Morararo tuna inehsãme exikety mã kure exipyra mana. Tyoro poe rokẽ kurã tũtãko mana. Morararo wikeira toperyme ro rokẽ eperytãko mana. Imepỹme eperytara mana, irimawame eperytara. Murukuhja roropa toperyme ro rokẽ eperytãko mana. Tyotyorõme eperytara mana. Kunurukõ toiro repe. Yrome ipoe asakoro tũtãko omi kurano, omi rypyry, enara. Jakorõ tomo, morara ahtao popyra mana.

13 Metatou? Menetupuhtou? Tonetupuhse oya xine ahtao, kure imehnõ tyritoko. Imehnõ motye se pyra ehtoko roropa. Morara awahtao xine imehnõ ynara ãko opoko xine, “Tuaro mose nase,” ãko toto opoko xine. 14 Yrome imehnõ zumoxike awahtao xine, imehnõ kure riry poko typenekehse awahtao xine, osepyno rokẽ awahtao xine roropa, popyra matose ipunaka. “Kure ase, imehnõ sã pyra,” kara ehtoko. Morara karyhtao oya xine ajohpe rokẽ matose, iirypyryme ro oexirykõke. 15 Morara tuaro exiry Ritonõpo poe pyra mana. Seropõkõ poe rokẽ morara tuaro ehtoh mana. Morara awahtao xine, Ritonõpo zuzenu poe pyra tuaro matose. Joroko poe osenetupuhnõko rokẽ matose. 16 Imehnõ zumoxike awahtao xine te, tuisamehxo oexirykõ se awahtao xine roropa, ajoajohpe itamurume exĩko matose iirypyryme ipunaka. 17 Yrome Ritonõpo poe tuaro kuahtao xine osemazuhme kyyrypyrykõ se pyra exĩko sytatose. Morarame imehnõ poko enupunãko sytatose. Tomeseke roropa exĩko sytatose imehnõ maro, zae rokẽ toto ezuhnõko sytatose. Imehnõ pyno sytatose, imehnõ onyhxiropyra roropa sytatose. Kure rokẽ imehnõ rĩko sytatose roropa, osetyoro imehnõ onyripyra sytatose. Onekunohtõkõ sã pyra roropa sytatose. 18 Tupito pona otyro puhturu tarykase ahtao kyya xine, otyrome ro emãnõko mana. Moro saaro oxiehno pyra exiketõ imehnõ amoreparyhtao, tuhkãkõ oxiehno pyra exĩko mana.