2 SAMUEU
2 Samuel
Ekarotopo
Sero 2 Samueu ekarõko Izyraeu tõ ehtopõpyry 1 Samueu ekarotopõpyry mykapo. Ekarõko Tawi ehtopõpyry poko tuisame toehse ahtao ikurenae Juta tõ esẽme osemazuhme aporo (2 Samueu 1—4). Imeĩpo Izyraeu tõ emero esẽme toehse ynororo inikahpoẽkõ maro (2 Samueu 5—24). Ekarõko Tawi etonary poko topetõkara maro. Yronymyryme Ritonõpo tonetupuhse Tawi a Tosẽme, toahmase ynororo eya tyjamitunuru ke. Yrome tyyrypyry poko toehse roropa Tawi kynexine, ahno totapapose eya. Morohne otonẽsaromepyra kynexine Ritonõpo wino. Mame urutõ Natã a Tawi turuse ahtao tõsekarose ynororo iirypyryme toehtoh poko. Tyyrypyry wãnohtoh tapoise eya, tyyrypyry rumekary se toehse, ikorokapotohme ropa.
Tawi pyno toehse Izyraeu tõ kynexine. Imeĩpo tamuhpõme toehse Tawi ahtao imũkuru se toh kynexine, Tawi sã exikety tosẽkõme ehtohme.
Sero pape ao
Tawi Juta tõ esẽme 1.1—4.12
Izyraeu tõ esẽme roropa 5.1—24.25
1. Jeimamyry apitorymã 5.1—10.19
2. Pate-Sepa maro 11.1—12.25
3. Tupime ehtopõpyry 12.26—20.26
4. Etyhpyrymãme 21.1—24.25
1
Zuaro toehse Tawi Sauu tõ orihtopõpyry poko
1 Sauu toorihse kynexine. Morarame amarekita tõ etapakehxĩpo Tawi tooehse ropa Zikirake pona. Moroto tehme nexiase asakoro ẽmepyry. 2 Mame yrokokoro orutua tooehse Sauu tõ esahpyry poe. Toemynyhmary enetupuhpotohme tupõ tyxihkase eya, nono tyrise tupuhpyry pona roropa eya. Toytose ynororo Tawi a. Mame tosekumuru po typorohse ynororo Tawi ẽpataka. Tõmyty nono pona tyrise eya “Imehxo mase” katohme Tawi a.
3 — Ozeino moehno? tykase Tawi eya.
— Epano Izyraeu tõ soutatu tõ esary poe, tykase.
4 — Otara toehse? Kuruko emero, tykase Tawi eya.
— Typoremãkase Izyraeu tõ ahtao, toepase yna, etonatoh poe. Tuhkãkõ toorihse. Sauu tõ, imũkuru Jonata roropa toorihse, tykase ynororo.
5 Mame Tawi tõturupose eya:
— Otãto zuaro hma Sauu tõ imũkuru Jonata maro toorihse ehtoh poko? tykase.
Ynara tykase ynororo eya:
6 — Ypy Kiupoa pona toeporehkase jahtao, Sauu enease moroto toepukase tywaratã pona. Epetõkara kanary ameke pyra exĩko nexiase, kawaru tõ po ytoketõ maro. 7 Mame toeramase ynororo ahtao jenease, ykohmase tyya. Ezukuase roropa: “Taro ase, tuisa,” ase eya. 8 “Onoky mahno?” nase ya. “Ywy ase amarekitame,” ase. 9 Mame ynara nase ynororo ya: “Juõ toto, orihnõko ase. Naeroro kuwoko jũme rokene,” nase ya. 10 Naeroro ytoase eya, etapase orihsasaka aexiryke. Mame iparimanỹpyry uuru risẽ apoiase zupuhpyry poe enehtohme oya, apory emepory roropa enehno oya.
11 Mame Tawi a tupõ tyxihkase toemynyhmaryke. Ipoetory tõ roropa morararo toehse toto. Tupõkõ tyxihkase eya xine. 12 Tyxitase roropa toto Sauu tõ poko Jonata maro, Izyraeu tõ maro. Mame otuhpyra toehse toto ikohmamyry pona, toorihse Sauu tõ exiryke.
13 Mame Tawi tõturupose ropa nuasemano a:
— Oty põ hmahno?
— Amarekitame ase, yrome taro jesary amaro xine, tykase.
14 — Oty katohme Ritonõpo nymenekahpyry tuisame etapary poko enaromyra makehne? tykase.
15 Mame toiro typoetory a ynara tykase:
— Mose etapako, tykase.
Mame mokyro totapase eya, toorihse. 16 Apitoryme ynara tykase Tawi amarekita a:
— Mehxirono, azahkuru oehtoh poko: “Sauu, Ritonõpo nymenekahpyry totapase ya,” karyke oya.
Sauu tõ hnamotopõpyry Tawi a
17 Mame eremiatoh tymerose Tawi a Sauu tõ hnamotohme, imũkuru Jonata maro. 18 Mame Juta tomo a tamorepapose eya. (Sero ihnamotoh tymerose, Zae exikety papẽ pokona.)
19 Kutuisarykõ imehxo mã toorihse,
ypy tõ po, Izyraeu tõ nonory po!
Orẽpyra exiketõ soutatu tõ toorihse toto!
20 Kate põkõ onurupyra ehtoko,
Axikerõ põkomo onurupyra ehtoko,
tãkye pirixteu ẽxiry tõ exiryino,
Ritonõpo waro pyra exiketõ ẽxiry tõ atãkyemaryino.
21 Konopo oehpyra exiko ypy Kiupoa pona.
Otyro ahtara exiko tupito tõ po!
Moroto soutatu tõ osewomatoh typahse exiryke, nuriame nono po;
Sauu osewomatoh zemime pyra toehse
oriu maro onykorokara exiryke.
22 Typyreke orẽpyra Jonata nexiase,
tytapemã ke Sauu roropa ekurehpyra nexiase
jamihmãkõ etapary poko,
topetõkara orihmapory poko.
23 Sauu maro Jonata, opyno xine toh nexiase.
Oximaro toh nexiase isene ahtao,
oximaro toorihse toto.
Piano tõ motye axĩ toh nexiase,
reão tõ motye jamihme roropa.
24 Nohpo tomo Izyraeume exiketomo,
oxitatoko Sauu ihnamotoko!
Tuisame Sauu pokoino tymõkomokehxo Izyraeume exiketõ toehse;
upo kurã ke tupohtose mexiatose
kaneru hpoty kamiraramã ke,
kasuru kurã ke, uuru risẽ ke roropa.
25 Soutatu tõ orẽpyra exiketõ toepukase,
toorihse toh nexiase etonatoh po.
Jonata toorihse mana ypy tõ po.
26 Emynyhmãko ase opoko, Jonata urui;
opyno ipunaka exiase!
Ypyno oehtoh kure nexiase,
ypyno nohpo tõ ehtoh motye.
27 Soutatu tõ orẽpyra exiketõ toepukase,
toto pyrẽpyry turumekase,
typahse rokẽ kehko.