EKEREZIAXTI
Tuaro Exikety Namorepatopo
Eclesiastes
Ekarotopo
Sero Ekereziaxti tuaro exikety tõsenetupuhse isene ahno ehtoh poko te, zae pyra imehnõ ryhmananõ poko te, onekunohtõkõ poko, enara. Mame etyhpyryme: “Emero toiparo rokẽ mana,” tykase ynororo. Ritonõpo waro pyra exiketyme ahtao oturũko mana orẽpyra toehtoh poko, typoremãkatopõpyry poko, tãkye toehtoh poko te, toemynyhmary poko roropa.
Yrome wenikehpyra toehse ahtao Ritonõpo poko, ynara ãko poetohti a: Wenikehpyra ehtoko Ritonõpo Oesẽkõ poko poetome ro awahtao xine, opũkõ motara ro ahtao te, ouzenukõ ytopyra ro Tyrihpõkomo a (12.1,7). Ritonõpo pyno ehtoko Aomiry omipona oehtohkõme. Moro poko kuehtohkõme tyrise sytatose eya. Imeĩpo osekarõko sytatose Ritonõpo ẽpataka kynyrihpyrykõ poko tonẽse ahtao ro, kure kynyrihpyrykõ poko te, popyra kynyrihpyrykõ poko roropa, enara (12.13-14).
Sero pape ao
Oty katohme isene hano? 1.1—2.26
Tuaro ehtoh isene ehtoh poko 3.1-15
Senohne a tamorepase ywy 3.16—6.12
Senohne isene ehtoh poko 7.1—12.8
Aotyhkatopõpyry 12.9-14
1
Isene ehtoh toiparo rokẽ mana
1 Sero nase oturukety omiry, Tawi mũkuru, tuisame exikety Jerusarẽ po.
2 “Toiparo rokene, toiparo rokẽ mana,” ãko oturukety mana. “Emero porehme toiparo rokẽ mana.” 3 Erohnõko sytatose orẽpyra samo, tamuhpõme kuehtohkõ pona, oty apoitohme kuerohtohkõ tamitukõ nahe? 4 Ahno tõ enurũko mã toto, orihnõko roropa mã toto. Yrome sero nono etyorõmara mana. 5 Xixi tũtãko mana. Mame omõnõko ropa mana ytotohme ropa tosaka, tutũtatoh pona ropa. 6 Tyryrykane tyryry ãko ikurenaka, imeĩpo tyryry ãko inikahpozakoxi, eraeramãko mana, mame oehnõko ropa mana toesyryhmatopõpyry pona ropa. 7 Tuna tõ emero yhtõko mã kehko tuna konõto kuaka, yrome tuna konõto zueme exipyra mana. Moro tuna ytõko ropa mana aenatyry pona ropa, yhtotohme ropa. 8 Senohne emero erohnõko mana: etaehnõko sytatose morohne eneryhtao kyya xine. Morohne emero onekarosaromepyra sytatose. Kuenurukõ penekehpyra mã kehko tõsenuhmarykõ poko, kypanarykõ penekehpyra roropa mã kehko etary poko. 9 Pake ehtopõpyry sã exĩko ropa mana. Pake tyrihpyry sã tyrisẽme exĩko ropa mana. Tyrisã kasenato ehsaromepyra mana sero nono po. 10 Tyrisã nae, ipoko ynara kasaromepyra mã exino: “Eneko ke! Sero panõ exipitopyra mana sero nono po?” Arypyra! Emero toehse osemazuhme, enurupyra ro kuahtao xine. 11 Pake ehtopõpyry poko wenikehnõko sytatose. Moro saaro imeĩpo ehtoh poko wenikehnõko mã mokaro, enurupyra ro exiketomo.
Tuaro ahno ehtoh poko
12 Ywy, tuaro exikety, Izyraeu tõ tuisaryme exiase Jerusarẽ po. 13 Jatamorepary se toehse ywy emero riry poko sero nono po. Tyrohmanohpose sytatose Ritonõpo a kuetuarimatohkõme.
14 Ahno nyriry enease emero porehme sero nono po. Ourutorỹko ase: toiparo rokẽ mana, emero. Tururume tyryrykane ekahmary sã mana. 15 Ijome exikety onytopohmasaromepyra mã toto. Onukuhsaromepyra mase atapona waro ehtohme arypyra ahtao. 16 Ynara tõsenetupuhse ywy: “Ywy tuisamehxo toehse, imehnõ tuisa tõ osemazuhme aexityã Jerusarẽ po motye tuarohxo toehse ywy. Tuaro ehtoh poko zuaro ase, emero ehtoh poko zuaro roropa ase.” 17 Naeroro tukuhse ywy enetupuhtohme: emero poko zuaro ehtoh poko te, tuaro nymyry ehtoh poko roropa, putupyra ehtoh poko te, tuaro pyra ehtoh poko ipunaka. Yrome ynara rokẽ tonetupuhse ya: moro poko atamorepatoh tonõ tururume tyryrykane ekahmary sã mana. 18 Tuarohxo ahno ahtao, itamurumehxo torẽtyke exĩko mana. Emero poko zuarohxo awahtao xine, jetuhxo exĩko mana oya xine.