OZEJA
Oséias
Ekarotopo
Urutõ Ozeja a Ritonõpo omiry tokarose Izyraeu tomo a, inikahpoẽkomo a. Urutõ Amoxi mykapo Ozeja kynexine, pata Samaria onyporemãkara ro ahtao axirio tomo a, jeimamyry 721mã po oehpyra ro Jezu Kyrixtu ahtao. Ozeja nekarohpyry: Izyraeu tõ wãnohnõko Ritonõpo mana tyneponãmarykõ eahmaryke eya xine. Yrome jũme toto onurumekara mana, eraximãko mana toto pynanohtohme ropa.
Sam tykase Ozeja typyty pokoino imeimehnõ orutua poko se aexiryke. Orẽpyra sã Izyraeu tõ turuse eya typyty sã Izyraeu tõ ehtoh poko; zae Ritonõpo nexiase repe Izyraeu tõ niome, yrome zae pyra Izyraeu tõ nexiase tyneponãmarykõ eahmaryke eya xine. Morara exiryke Izyraeu tõ zehno toehse Ritonõpo mana, toto wãnohnõko mana. Yrome jũme toto pyno exikehpyra mana. Ynara tykase Ritonõpo: Izyraeu tomo, orumekary se pyra ase! Orumekasaromepyra xine ase! Opyno xine jexiryke oenahkaposaromepyra xine ase. Opyno xine jehtoh exikehpyra mana.
Sero pape ao
Ozeja, ipyty maro, ipoenõ roropa 1.1—3.5
Izyraeu popyra ehtoh poko 4.1—13.16
Eramatoko Ritonõpo a, opyno xine 14.1-9
1
1 Sero nase Ritonõpo omiryme, inekarohpyry Ozeja a, Peeri mũkuru, Juta tõ tuisaryme Uzia ahtao te, Jotão roropa te, Akaze roropa te, Ezekia roropa, enara; Izyraeu tõ tuisaryme Jeropoão ahtao, Joaxi mũkuru.
Ozeja pyty, imũkuru tomo, enara
2 Mame tõturupitose Ritonõpo ahtao Ozeja ae Izyraeu tomo a ynara tykase ynororo Ozeja a:
— Ytoko nohpo apoise opytyme; imeimehnõ poko exĩko mana; omũkuru tõ roropa tysekõ sã exĩko mã toto. Ynara exiryke, Izyraeu tõ imeimehnõ poko exikety sã toehse mã toto. Jomiry omipona pyra toehse toto, turumekase ywy eya xine.
3 Naeroro toytose Ozeja pytase Komea maro, Tipiraĩ ẽxiry ke. Mame imũkuru osemazupu tonuruse ahtao, 4 ynara tykase Ritonõpo Ozeja a:
— Poeto esehpako Jezereume, okynã pyra Izyraeu tõ tuisary wãnohnõko ase tuhkãkõ totapase tuisa Jeu a exiryke pata Jezereu po. Izyraeu tõ tuisary tõ enahkapõko ase. 5 Mame jakanahmã Jezereu po Izyraeu tõ soutatu tõ jamitunuru enahkapõko ase.
6 Imeĩpo Komea toemũkuase ropa Ozeja ẽxiryme, ynara tykase Ritonõpo Ozeja a:
— Oẽxiry esehpako “Ipyno pyra”, Izyraeu tõ pyno toehkehse jexiryke, iirypyrykõ onykorokara toehse jexiryke roropa. 7 Yrome Juta tõ pyno exikehpyra exĩko ase. Ywy roro Ritonõpo Oesẽkõ toto pynanohnõko ase. Yrome moro onyripyra ase etonatoh ke: taky ke pyra, pyrou tõ maro, tapema ke pyra, kawaru tõ ke pyra, kawaru po ytoketõ ke pyra, enara.
8 Imeĩpo suhsu turumekapose tõxiry a ahtao, poetoẽme toehse ropa Komea, toemũkuase ropa orutuame. 9 Mame ynara tykase Ritonõpo Ozeja a:
— Mose poeto esehpako “Wekyry karame”, ynara exiryke: Izyraeu tõ ypoetoryme pyra toehse mana, toto Esẽme pyra toehse roropa ywy.
Izyraeu Imehxo ehtoh poko imeĩpo
10 Ẽmepyry oehnõko mana Izyraeu tõ tuhke exĩko mã toto isawã samo tuna konõto ehpio; emãnõko mã toto ikuhpỹme samo. Mame moroto “Ypoetory tõ karame matose,” katopõpyry po Ritonõpo a, moroto, “Ritonõpo isene Exikety poenõme matose,” ãko mana. 11 Juta tomo Izyraeu tõ maro oximõnõko mã toto. Oximõme toiro tuisa menekãko mã toto tutuisarykõme. Ahno tõ jamihme exĩko ropa mã toto, tymõkomoke roropa. Moro ẽmepyry toehse ahtao Oseahmatoh konõtome exĩko mana, Jezereu ẽmepyryme.