JEREMIA
Jeremias
Ekarotopo
Jeremia urutõme kynexine, tonuruse oturukety mũkurume. Ritonõpo omiry tokaropitose eya jeimamyry 627me oehpyra ro Jezu Kyrixtu ahtao. Tõturuse Jeremia popyra ehtoh enehpory poko Ritonõpo a, Izyraeu tõ poremãkary poko te, toto wãnohtoh poko iirypyrykõ pokoino. Morara toehpitose isene ro Jeremia ahtao. Moroto kynexine ynororo Napukotonozo tooehse ahtao pata Jerusarẽ enahkase, Ritonõpo Tapyĩ zahkase, Juta tõ arose ituisary tõ maro Papironia pona. Morarame tõturuse Jeremia Izyraeu tõ oepyry ropa poko tynonorykõ pona ropa imehxo aehtohkõme ropa tosake exiketõme.
Izyraeu tõ pyno Jeremia kynexine ipunaka. Ritonõpo omiry Izyraeu tõ wãnopyry poko ekarory se pyra nexiase repe, yrome apoto sã Aomiry nexiase ikurohtao. Naeroro mynyhme ehsaromepyra nexiase (Jer. 20.9). Aomiry etary se pyra tuisa tõ toehse. Jeremia tyyryhmase eya xine, ãpuruhpyry taka tõmase ynororo eya xine.
Jeremia ekarõko imeĩpo tõmiry kasenato etapõko Ritonõpo mana typoetory tomo a. Omipona exĩko mã toto Aomiry tymerose exiryke ikurohtao xine.
Sero pape ao
Jeremia kohmatopõpyry urutõme 1.1-19
Ritonõpo omiry Juta tomo a 2.1—25.38
Jeremia ehtopõpyry poko 26.1—45.5
Imeimehnõ wãnohtoh poko 46.1—51.64
Jerusarẽ poremãkatopõpyry 52.1-34
1
Jeremia menekatopõpyry urutõme
1 Sero pape Jeremia omihpyryme mana, inyrihpyry poko roropa ekarõko mana. Oturukety Hiukia mũkurume kynexine ynororo. Moroto imehnõ oturuketõ kynexine pata Anatote po, Pẽjamĩ nonory po. 2 Ritonõpo omiry totapitose Jeremia a 13me jeimamyry taropose ahtao Joxia a tuisame toexiry poko Juta tõ esẽme. Joxia kynexine Amõ mũkurume. 3 Ritonõpo omiry tooehse ropa Jeremia a Jeoakĩ, Joxia mũkuru tuisame ahtao Juta tõ esẽme. Moromeĩpo tuhke rokẽ tõturuse Ritonõpo Jeremia a Jerusarẽ põkõ arotopõpyry pona tynonorykõ poe Papironia tuisary namotome. Morara toehse nuno 5mã po, jeimamyry 11mã po tuisame Zetekia Joxia mũkuru tuisame ahtao Juta tõ esẽme.
Jeremia kohmatopõpyry
4 Kuesẽkõ Ritonõpo ynara tykase ya:
5 — Enurupyra ro awahtao, asa wakuru ao awahtao ro, kymenekase, kuapiakase urutõme oehtohme imehnõ nonory põkomo a.
6 Mame ynara tykase ywy:
— Ritonõpo, yna Esemy, jotururu waro pyra ase, poetome ro jexiryke.
7 Yrome ynara nase Ritonõpo ya:
— “Poetome ro ase,” kara exiko. Ytoko imehnõ zuruta, aaroporyhtao eya xine. Toto zuruko emero ynekarory oya ekarotohme eya xine. 8 Imehnõ zuno pyra exiko, amaro jexiryke oewomatohme. Ywy ase Ritonõpo, amaro oturukety.
9 Mame tomary ke ypotapihpyry tapose Ritonõpo a, ynara nase ya:
— Eneko ke! Jomiry ekarõko ase oya, imehnõ zurutohme. 10 Seroae yjamitunuru ekarõko ase oya, orẽpyra oehtohme imehnõ nonory põkõ maro, toto tuisary tõ maro, imity tõ oũko mase, akohnõko mase, enahkãko mase, ipahnõko roropa, tyrĩko roropa mase, arykãko roropa.
Asakoro enepotoh tonomo
11 Tõturupose Ritonõpo ya:
— Oty enẽko mah?
— Wewe eperytakety amoriry enẽko ase, ase eya.
12 — Zae mase, tykase Ritonõpo ya. — Ywy roropa eraseme sã osenuhmãko ase, jomihpyry ae ro emero ehtohme.
13 Tõturupose ropa Ritonõpo ya:
— Oty ropa enẽko mahno?
— Oripo enẽko ase inikahpoe, ahnõko, ekuãnõko roropa xiaro, ase eya.
14 Mame ynara tykase Ritonõpo ya:
— Inikahpoe enahkatoh oehnõko mana. Ekuãnõko sã mana tarõkõ pona, emero porehme. 15 Enara exiryke, inikahpoe imeimehnõ nonory põkõ kohmãko ase emero. Ituisarykõ oehnõko mã toto xiaro, tuisame tapõkõ rĩko mã toto Jerusarẽ omõtoh etonie te, pata apuru tõ zomye roropa te, imehnõ pata tõ zomye roropa Juta nonory po. 16 Moro pata põkõ wãnohnõko ase popyra toto ehtopõpyry pokoino. Turumekase ywy eya xine, ixtaratu zahkãko mã toto imehnõ neponãmary eahmaryme, tynyrityã tomarykõ ke eahmaryme. 17 Jeremia, atakimako oytotohme. Oturuta eya xine, ynekarory oya emero zuruko toto jomi poe. Enaromyra exiko, mokaro zuno pyra. Enaromỹke awahtao seromaroro, moro motye enaromỹke orĩko ase mokaro ẽpataka awahtao. 18-19 Etako pahne Jeremia! Sero nono põkõ emero oepeme pyra exĩko mã toto: Juta tõ tuisary tomo te, kowenu poko erohketomo te, ymaro oturuketomo te, ahno maro. Yrome seroae yjamitunuru ekarõko ase oya orẽpyra oehtohme mokaro ẽpataka. Pata sã exĩko mase tapuruse exikety topu risẽ kaetoko exikety ke. Kurimene sã roropa mase exĩko xikihme exikety samo. Metau risẽ apurume sã exĩko mase Izyraeu tõ apurume porehme. Oporemãkapopyra mã toto amaro jexiryke oewomatohme. Ywy, Ritonõpo oturuno.