21
1 Úpí ꞌbã ásị́ ĩꞌdi Úpí ꞌbã drị́lẹ́ gá,
Úpí la ĩꞌdi tị ují ãngũ ĩꞌdiní lẽlé rĩ gá cécé ĩꞌdiní ị̃yị́ tị ujílé rĩ áni.
2 Gẹ̃rị̃ pírí ꞌbá ꞌbá ru rĩ drị̂ kí indré ĩꞌdi mịfị́ gá múké,
wó Úpí la ị́jọ́ ꞌbá ásị́ gá rĩ amá nĩ.
3 Ị́jọ́ mgbã rĩ ngajó ãzíla ị́jọ́ lịjó pịrị rĩ;
ĩꞌdi ị́jọ́ Úpí ꞌbã ãꞌị̃lé ídétáŋá ní ãndânĩ rĩ ꞌi.
4 Ãfó kí ị́pị́pị́ŋá be kí ꞌbá ũnzí rĩ drị̃ ují nĩ,
wó ꞌdĩ ị́jọ́ ũnzí la.
5 Ụ̃tị̃táŋá múké rĩ ãzíla ãzị́ ngaŋá ũkpó sĩ rĩ la fẽ míní acálé kụ́rẹ́nị́;
wó ꞌbá kápa ịsụ́lépi gẹ̃rị̃ ũnzí sĩ rĩ la acá lẽmẽrí.
6 Málĩ ịsụ́lé ĩnzõ sĩ rĩ la nga ũfú áni háwu;
ãzíla ĩꞌdi mãtégõ drã ãni la.
7 Adrã ꞌbá ũnzí rĩ ꞌbadrị̂ la kí drị̃ ce ãmvé
ãꞌdusĩku gã kí ị́jọ́ mgbã rĩ idélé úmgbé.
8 Gẹ̃rị̃ ꞌbá ị́jọ́ ꞌbã ndẽlé rá rĩ ꞌbã sĩ acị́jó rĩ góní-góní ru;
wó ꞌbá ị́jọ́ kóru rĩ la acị́ gẹ̃rị̃ kpị rĩ gâ sĩ.
9 Míní uꞌájó jó ꞌbã kónã gá lótré gá ꞌdãá rĩ ĩꞌdi múké;
ndẽ míní uꞌájó ũkú ãwãlépi unzí rĩ be jó ãlu gá rĩ rá.
10 ꞌBá ũnzí rĩ ꞌbã ásị́ la lú ị́jọ́ ũnzí rĩ lẽ áyụ;
ĩꞌdi ꞌbã jĩránĩ ịsụ́ kí ĩꞌdidrị́ ásị́ ị̃gbẹ̃ ku.
11 Údrĩ ꞌbá ꞌbá kí idelépi rĩ ní drị̃rịma fẽ, ꞌbá ũndũwã kóru rĩ la ũndũwá ịsụ́ rá;
údrĩ ꞌbá ũndũwã trũ rĩ ímbá ĩꞌdi ímbátáŋá ãꞌị̃ rá.
12 Ãdróŋá ĩꞌdi ãlá ru, nị̃ ị́jọ́ ru idélépi ꞌbá ũnzí rĩ ꞌbadrị́ jó agá rĩ kí cé,
ãzíla ĩꞌdi ꞌbá ũnzí rĩ kí ị̃lị̃kị̃ rá.
13 ꞌBá ꞌbá lẽmẽrí rĩ ꞌbã áwáŋá arelépi ku rĩ;
ĩꞌdi ꞌbã ãmgbã rĩ drĩ áwá rá, ícó ĩꞌdi ꞌbã áwáŋá arelé ku.
14 Fẽtáŋá fẽlé ũní-ũní ru rĩ la ũmbã ịgbẹ;
ꞌbá mịfị́ sajó ãko ãzí sĩ rĩ la adrã sị́ ịgbẹ.
15 Údrĩ ị́jọ́ lị pịrị ĩꞌdi ãyĩkõ fẽ ꞌbá múké rĩ nî;
wó ĩꞌdi ũcõgõ ají ꞌbá ũnzí rĩ ásị́ gá.
16 ꞌBá fũlépi ãmvé vãtáŋá agá ꞌdâ rá rĩ la
fũ mụlé uꞌálé ꞌbá drãlépi rá rĩ kí abe.
17 ꞌBá ãyĩkõ ụ̃nọ́kụ́ drị̂ lẽlépi rĩ la acá lẽmẽrí;
ꞌbá íwá kí mvụlépi ãdu be rĩ icó acálé kụ́rẹ́nị́ ru ku.
18 Ála ꞌbá ũnzí rĩ ꞌbaní drị̃rịma fẽ ꞌbá Ãdróŋá rulépi rĩ kí kẹ̃jị́ gá,
ꞌbá múké rĩ kí kẹ̃jị́ gá ála drị̃rịma fẽ ꞌbá ị́jọ́ usúlépi rĩ ꞌbanî.
19 Uꞌájó ãngũ kõtórõ rú rĩ agá rĩ múké ãndânĩ
ndẽ uꞌájó ũkú ãwãlépi, ãzíla unulépi ambamba rĩ be rĩ rá.
20 ꞌBá ũndũwã trũ rĩ drị́ jó gá málĩ ãzíla ãdu kí adru nĩ,
wó ꞌbá azalépi aza-azâ rĩ la ãko ĩꞌdidrị̂ kí iza pírí.
21 ꞌBá ị́jọ́ mgbã rĩ ndrụ̃lépi lẽtáŋá ukólépi ku rĩ be rĩ
la ídri ịsụ́ ị́jọ́ mgbã rĩ be ãzíla ála ĩꞌdiní ãrútáŋá fẽ rá.
22 ꞌBá ũndũwá ru rĩ la táwụ̃nị̃ ãmbógó ꞌbá ũkpõ trũ rĩ ꞌbadrị̂ kí ꞌdụ rá,
ãzíla ĩꞌdi Bõrõ ũkpó ĩꞌbã kí sĩ ásị́ ꞌbãjó rĩ kí andi rá.
23 ꞌBá ru tị tã mbalépi ĩdra be rá rĩ
mba ru tã ị́jọ́ ũnzí gá rá.
24 ꞌBá ãfó trũ ru uꞌélépi ũnzí rĩ, “Rụ́ la idemará ꞌi,”
ĩꞌdi ị́jọ́ kí idé ãfó ru ãzíla ãmbõgõ sĩ.
25 ꞌBá ũvú rĩ la drã ãbị́rị́ sĩ la
ĩꞌdi ꞌbã ãzị́ ngajó ĩꞌdi ꞌbã drị́ sĩ ku rĩ sĩ.
26 Ụ́ꞌdụ́ pírí sĩ ĩꞌdi adru rọ̃mgbọ́ ru ãko ca kí ĩꞌdiní ku,
wó ꞌbá múké rĩ la ãko fẽ ꞌbá ꞌbaní ãzíla aꞌbe ĩꞌdiní ku.
27 Ídétáŋá ꞌbá ũnzí rĩ ní idélé rĩ Ãdróŋá drĩ dó ngụ̃ la ũnzí,
ĩꞌdi dó ídétáŋá idélé ásị́sị́ŋá ũnzí sĩ rĩ ngụ̃ íngõpí!
28 Sãdínĩ ĩnzó rú rĩ la ị̃lị̃kị̃ rá,
wó ála Sãdínĩ ị́jọ́ pịrị rĩ jọlépi rĩ aꞌbe ị́jọ́ vú nzelé rá.
29 ꞌBá ũnzí rĩ idé drị̃nzá sĩ ku,
wó ꞌbá múké rĩ la ị́jọ́ ũrã ị́jọ́ ĩꞌdi ꞌbã lẽlé idélé rĩ drị̃ gá ãnzé ká.
30 Ũndũwá, ị́jọ́ vãŋá jõku ị́jọ́ amáŋá ꞌbá ꞌbadrị̂
icó Úpí ndẽlé ku.
31 Fãrásĩ ãꞌdị́ drị̂ kí ála kí itú bábá ãꞌdị́ drị̃ tẽjó,
wó ãꞌdị́ ndẽjó rá rĩ ũkpõ la la angá Úpí drị́.