Ikiavɨra Itir God uan gumazamizibar akuraghsɨ, bizir igharagha garibar amightɨ da otivam
9
(Sapta 9--14)
God Kantrin Igharazibar Gumazamiziba, ivezir kuram me danɨngam
1 Aisaia 17:1-3; Jeremaia 49:23-27; Amos 1:3-5 Aisaia 23:1-18; Esekiel 26:1--28:26; Joel 3:4-8; Amos 1:9-10; Matyu 11:21-22; Luk 10:13-14Ikiavɨra Itir God kamaghɨn uan akam na ganɨga ghaze, Ikiavɨra Itir God, Distrik Hadrak ko, Damaskusɨn nguibar ekiam daperagh avughsɨ ikiam. Guizbangɨra, a uan damazimningɨn Israelian anababar gari moghɨn, a kantriba bar dar gumazamizibar gari. 2 Egha uaghan a Hamat, a nguibar ekiar Distrik Hadrakɨn boroghɨn itim, ko, Tairɨn nguibam ko, Saidonɨn nguibamɨn gari. Tair ko Saidonɨn gumaziba ti ghaze, me fofozir aghuir avɨriba iti. Ezɨ Ikiavɨra Itir God guizbangɨra uaghan men gari. 3 Tair, a nguibar ekiar gavgavimɨn oto. Ezɨ an gumazamiziba uari bagha dɨvazir mɨtiar bar gavgavimɨn ingarigha uan nguibar ekiam avɨni. Me uaghan uari bagha silvan avɨriba geghufi, da nguazir mɨnezibar mɨn iti. Ezɨ me golɨn bar avɨriba itima, da men damazibar pura bizir kɨnibar mɨn iti. 4 Ezɨ puvatɨ, Ekiam men bizir aghuiba bar da batuegham. A Tairɨn biziba ko, an dɨvazir mɨtiar bar gavgaviba, a bar da isɨ ongarim da kunigham. Eghtɨ apaniba izɨ men nguibar ekiam daborogh bar a gasɨghasigham.
5 Aisaia 14:29-31; Jeremaia 47:1-7; Esekiel 25:15-17; Joel 3:4-8; Amos 1:6-8; Sefanaia 2:4-7Eghtɨ Askelonɨn nguibar ekiamɨn gumazamiziba bizir kamɨn ganigh bar atiatigham. Me uaghan kuram iniam, eghtɨ men nguibam, gumazamiziba gɨn an ikian kogham. Eghtɨ Gasaba uaghan bizir kamɨn gantɨ, osɨmtɨzir ekiam me batogham, mati amizim borim batamin mɨzazim a bato. Eghtɨ men atrivim aremegham. Eghtɨ Ekronba uaghan bizir kamɨn ganɨva osɨmtɨzir ekiar kam iniam, mati amizim borim batasa mɨzazim isi. Me kamaghɨn nɨghnɨsi, Tairba ti men akuragham. Ezɨ puvatɨ, me bar ikuvigham. 6 Eghtɨ gumazir pura tighɨn itir igharaziba izɨ Asdotɨn nguibar ekiamɨn ikiam. Ikiavɨra Itir God kamaghɨn mɨgei, “Filistian kaba, me gumazir uari fa akaba batoziba, kɨ bar me dɨkabɨragham. 7 Eghtɨ Filistian ikiavɨra itir varazira, me nan gumazamizibar mɨn otivigh Judan anababar tongɨn ikiam. Jebusia* Jebusia, me Jerusalemɨn nguibamɨn nguazir ghueba. Devit gɨn taun Jerusalem iniam, Jebusia Israelia ko iti. Nɨ Josua 15:63ɨn gan. fomɨram amizɨ moghɨn, Ekronba datɨrɨghɨn nan gumazamizibar ikiam. Kamaghɨn amizɨma, me ghuziba itir asɨzir tuzibar aman koghɨva, uaghan Judaba ataghizir dagheba, me dar aman kogham.† Judaba asɨzim isamsɨ faragh bar deravɨrama an ghuzim rueghɨva gɨn a isamigh aneremam. Ezɨ Filistiaba arazir kam gamir puvatɨgha, Moses osirizɨ moghɨn me Godɨn damazimɨn mɨze. (Nɨ vezɨn kabar gan: Jenesis 9:4; Ofa Gami 3:17 ko 7:26-27; Godɨn Araziba 12:16 ko 15:23.) Ikiavɨra Itir God kagh kamaghɨn mɨgɨa ghaze, me asɨzim ghuziba sara ikɨtɨ me aneman a men anogoroke.
8 “Kɨ uan gumazamizibar garima me mɨzazir ekiam ini. Kamaghɨn amizɨ, kɨ uan kantri geghuv, mɨdorozir gumaziba ateghtɨma, me nguazir kamɨn izeghan kogham. Kɨ uam apaniba ateghtɨ me ua nan gumazamiziba abɨnɨva arazir kurabar me damuan kogham.”
Guizɨn atrivim izam
9 Matyu 21:5; Jon 12:15Ia Saionɨn nguibar ekiamɨn itir gumazamiziba, ia bar akongegh!
Ia Jerusalemɨn itir gumazamiziba, ia bar tiariba akar pamtemɨn dɨm.
Ia gan, ian atrivim mara ia bagha izi!
A ziar ekiam ikiava mɨdorozim gamuava uan apaniba abɨri.
Egha a uabɨ uan ziam fer puvatɨ.
A gumazir kɨnir ziaba puvatɨzir mamɨn mɨn donkin mam gaperagha izi.
Kar donkin amebamɨn nguzir asem.
10 Onger Akaba 72:8Ikiavɨra Itir God ghaze,
Kɨ karisba ko, mɨdorozibagh amir hoziaba batueghtɨ, da ua Israelɨn tongɨn ikian kogham.
Egh kɨ men bariba bar da apɨrarigham.
Ian atrivim, kantrin ekiaba bar dar amightɨ, da mɨdorozir arazim ategh deraghvɨra dapiagh, navir amɨrizimɨn ikiam.
A nguazir otevibar gumazamiziba bar me gativagh men ganam.
Nguazir kaba, da ongarir ekiamɨn ikegh mangɨ ongarir saghon mar itibar tugham.
Egh Yufretisɨn Faner ekiamɨn ikegh vongɨn amadaghan mangɨ bar saghon mar tugham.
Ikiavɨra Itir God ua uan gumazamizibar dabirabim akɨri
11 Ua Me Ini 24:8Ikiavɨra Itir God ua kamaghɨn mɨgei,
“Kɨ Akar Dɨkɨrɨzir Gavgavir mam Judaba ia ko a gami.
Ian inazir afeziaba ofabar amuasa asɨzibav sozima dar ghuziba ire.
Ezɨ ghuzir kam gavgavim en Akar Dɨkɨrɨzir Gavgavim a ganɨngi.
Kamaghɨn amizɨ, kɨ ia teghtɨma ia kantrin igharazimɨn kalabus ategham.
Kalabuziar kam bar ikufi,
mati me ia isa mozir ekiamɨn ia arɨghizɨ ia damamin dɨpaba puvatɨ.
12 Ia kamaghɨn fo, kɨ ian akuraghasa ifonge.
Kamaghɨn amizɨ, ia uamategh uan nguibamɨn izɨ deravɨra ikiam.
Ia osɨmtɨzir Bar ekiam ateri, ezɨ kɨ ia mɨgɨa ghaze, kɨ arazir aghuibar ia damuam.
Eghtɨ arazir aghuir kam bar osɨmtɨzir kam gafiragham.
13 Judaba, kɨ uan barir pimɨn mɨn men suiragh, egh Efraimɨn adarasi, kɨ uan barir afuzibar mɨn men suiragham.
Eghtɨ Saionɨn gumaziba me mati mɨdorozir sabam, eghtɨ kɨ Grikba ko mɨsogham.
14 “Ikiavɨra Itir God uan gumazamizibagh isɨn azenaram otogh barir pimɨn asam.
Eghtɨ an afuziba onɨmarim mɨn taghtagh zuamɨra mangam.
Eghtɨ Ikiavɨra Itir Godɨn Ekiam sɨgham givigh,
sautɨn amadaghan ikegh, pamtem sueba akun daru, amɨnir bar gavgavim ko, amozim sara izam.
15 Ikiavɨra Itir Godɨn Gavgaviba Bar Itim, oramɨn mɨn deravɨra uan gumazamizibagh eghuvam,
eghtɨ me katapelbar uan apanibav sogh bar me abɨragham.
Me mɨdorozimɨn aven, me mati gumaziba dɨpar onganiba amegha tiariba akara uan apanibav suagharɨsi.
Men ghuziba, mati me ofabar amuasa asɨzir ghuzir itarim inigha, ofa gamir dakozim ginge.
16 “Dughiar kamɨn, Ikiavɨra Itir God men God uan gumazamiziba iniam,
mati laion sipsipbagh asɨghasɨghasava amima, sipsipbagh eghuvir gumazim uam me iniam.
Eghtɨ me bar deraghvɨram an nguazimɨn ikiam,
mati atrivimɨn dapanir asuamɨn itir dagɨar ivezir bar pɨn kozibar mɨn taghtagham.
17 Nguazir kam bar deraghtɨ, me deravɨra ikiam.
Eghtɨ gumazamizir igiaba, me dagher avɨriba ko, wainɨn avɨribar amɨva aghungtɨ,
men ganganiba bar deragham.”
9:1: Aisaia 17:1-3; Jeremaia 49:23-27; Amos 1:3-5
9:1: Aisaia 23:1-18; Esekiel 26:1--28:26; Joel 3:4-8; Amos 1:9-10; Matyu 11:21-22; Luk 10:13-14
9:5: Aisaia 14:29-31; Jeremaia 47:1-7; Esekiel 25:15-17; Joel 3:4-8; Amos 1:6-8; Sefanaia 2:4-7
*9:7: Jebusia, me Jerusalemɨn nguibamɨn nguazir ghueba. Devit gɨn taun Jerusalem iniam, Jebusia Israelia ko iti. Nɨ Josua 15:63ɨn gan.
†9:7: Judaba asɨzim isamsɨ faragh bar deravɨrama an ghuzim rueghɨva gɨn a isamigh aneremam. Ezɨ Filistiaba arazir kam gamir puvatɨgha, Moses osirizɨ moghɨn me Godɨn damazimɨn mɨze. (Nɨ vezɨn kabar gan: Jenesis 9:4; Ofa Gami 3:17 ko 7:26-27; Godɨn Araziba 12:16 ko 15:23.) Ikiavɨra Itir God kagh kamaghɨn mɨgɨa ghaze, me asɨzim ghuziba sara ikɨtɨ me aneman a men anogoroke.
9:9: Matyu 21:5; Jon 12:15
9:10: Onger Akaba 72:8
9:11: Ua Me Ini 24:8