Ka Sulat no Impaalap to mgo
Hibriu
Tongod to Soini no Sulat dio to mgo Hibriu
Ka soini no sulat, ingkapaalap dio to mgo nigtuu to mgo Hudiu no songo ogkohingaranan no mgo Hibriu su ian kinagian dan ka Hinibriu. Waro ki nangoni ko hontow ka nakasulat. No ka tuud to nasulatan ka soini su oyow ogkohogot ka pogtuu ran. Ian su ka mohon-ing no mgo Hudiu, waro nigtuu ki Hisus. No ka waro nigtuu, nigbayadbayad to sikan no mgo duma ran no nigtuu on. Ligkat to sikan, duon mgo nigtuu no magaan poron og-ongkod to pogtuu ran ki Hisus, no oglibongon dan poron ka pogtuu to mgo duma ran no Hudiu no ogsalig dod to pogtuman dan to mgo Balaod no imbogoy to Magboboot dongan ki Moisis.
Sikan ian to duon tatolu no innangon to soini no sulat oyow ogkohogot ka pogtuu ran. An-anayan, igkapohitaga to, si Hisus ka anak to Magboboot no waro kabinunsuran din woy songo waro katamanan din. Sikan ian to dakoldakol ka ngaran ni Hisus to mgo diwata no suguanon to Magboboot woy songo dakoldakol ka ngaran ni Hisus ki Moisis. No to igkaruwa, ingkapohitaga to sulat to, si Hisus on ka nakaliwan to mgo talagpanubad to mgo Hudiu woy dakoldakol ka pulus to nohimu rin. No to igkatolu, igkapohitaga to, si Hisus ka nigtuman to tibo no ingkapanag-ilingan to sikan no mgo batasan no impabogoy to Magboboot kandan dongan.
Pogkaponga, mohon-ing ka imbatbat tongod to sikan no nohimu dongan to mgo otow no nigtuu lagboy to Magboboot. No agad to mohon-ing ka kandan no igkabaybayari, di waro dan ongkori ka pogtuu ran. No ka tuud to innangonnangon su oyow ogkohogot ka pogtuu to sikan no mgo nigtuu no Hudiu oyow kono ogpakasuwoy to pogtuu ran.
Ka Ignangon to Soini no Sulat
Si Hisu Kristu on ka igpohitaga kanta to Magboboot 1:1-3
Si Hisus, dakoldakol to mgo diwata no suguanon to Magboboot 1:4 – 2:18
Si Hisus, dakoldakol ki Moisis woy dakoldakol ki Husui 3:1 – 4:13
Si Hisus on ka madmaroyow no talagpanubad kanta 4:14 – 7:28
Si Hisus ka nohimu to madmaroyow no dalan ta dio to Magboboot 8:1 – 9:28
Ka ingkatubad ni Hisus, madmaroyow to sikan no ingkatubad to dongan no mgo talagpanubad 10:1-31
Ka mohuri, to og-awoson to og-ilingon ta ka pogtuu to dongan no mgo otow no nigtuu to Magboboot 11:1 – 12:25
1
Ka Anak din no si Hisus ka Igpohitaga Kanta to Magboboot
1 Dongan, nigkagian to Magboboot ka kaap-apuan ta no ian ka mgo Hudiu. No ka mgo talagnangon to kinagian din ka impakagi rin kandan. Di ka batasan din to igpohitaga rin kandan to kinagian din, nigloinloin. 2 Di kuntoon to soini no mohurian no allow, ka Anak din ka impohitaga kanta to kinagian to Magboboot. Ka soini no Anak din ka nigpohimu to Magboboot to soini no kalibutan, no si Hisus dod ka nig-alam din woy nigbootan din to oyow ian on tagtuun to tibo. 3 Ka tibo no karoyawan to Magboboot, duon to Anak din, no ogsosokod lagboy ka goinawa ran. Oggongonan to Anak din ka kalibutan woy ka langit su ligkat to kabogbogan to kagi rin. Ko nigpakimatoy to lawa rin oyow ogkaawo on ka mgo salo ta oyow ogmalinis on ka goinawa ta, nig-uli dio to langit no nigpinpinnuu on dio to kawanan to Magboboot no ian mabogbog.
Si Hisus, Dakoldakol to mgo Diwata to Magboboot
4 Sikan ian to nohimu on ka Anak din no mamabogbog to mgo diwata no suguanon din woy nigbogayan to Magboboot sikandin to ngaran no dakoldakol to mgo ngaran dan. 5 Nataga ki to soini su ka kagi to Magboboot ki Hisus, waro mog-unawa to kagi rin to mgo diwata rin. Ian su duon impasulat din dongan to kagi rin to Anak din. Kagi rin to,
“Sikoykow ka Anak ku, no kuntoon no allow, sikanak on ka amoy nu.”
Di agad kon-u, waro din innangon to agad hondoi no diwata no suguanon din to,
“Sikanak ka amoy rin woy sikandin on ka Anak ku.”* Ogkabasa to Salmo 2:7.
6 No ko ogkatuman on ka allow to Magboboot no magaan din on igpohondini ka panganoy no Anak din kai to soini no kalibutan, duon dangob no kagi rin tongod to Anak din to,
“Og-awoson to ogsayoon sikandin to tibo no mgo diwata no suguanon ku.”
7 Di tongod to mgo diwata to Magboboot, soini ro atag ka kagi rin. Kagi to sulat to,
“Ka pogsugu din to mgo diwata din, ogkoiling to kalamag woy ko logdog no hapuy.”† To Ginirigu, songo kuwo ko ogkalituk to, ka lawa to mgo diwata ogkoiling to kalamag woy ka oglogdog no hapuy, woy ko ian lituk to kagi rin ko ka pogsugu din to mgo diwata no suguanon din, ogkoiling to kalamag woy ko ka oglogdog to hapuy. Ka sikan, ogkabasa to Salmo 104:4.
8 Di tongod to Anak din, soini atag ka innangon to Magboboot. Kagi,
“Taman to waro katamanan, Magboboot, waro katamanan to pogpangatondanan nu. Woy ogkaayun lagboy ka pog-alap nu to sikan no katondanan nu.‡ Ogkabasa to Salmo 45:6.
9 Indakoli nu to goinawa nu ka maroyow di og-usigan nu to goinawa nu ka maroot. Sikan ian to, sikanak no ian Magboboot woy Magboboot nu, nig-indanan ku sikoykow oyow ogkabogayan ka to dakol no igkarago nu no ogdakoldakol to sikan no igkarago no igkabogoy to mgo duma nu.”
10 Duon dod dangob no kinagian to Magboboot to Anak din. Kagi,
“Sikoykow, Lagboy no Igbuyag, ka nighimu to soini no kalibutan dongan. Agad ka tibo no dio to langit, ka koykow ro no bolad ka nighimu.§ Ogkabasa to Salmo 102:25.
11 Ogkaawo doka tibo no nighimu nud, di sikoykow, waro katamanan nu. Tibo no nighimu nud, ogkabuyag on no ogkounawa to manggad no ogkamolu do.
12 Ian su ogkoongkoran nud on ka tibo, unawa to tahan no manggad no songo ogkoongkoran no ogkaliwanan on to iam. Di sikoykow atag, kono ka ogkahalin no waro katamanan nu.”
13 Di agad kon-u, waro nangoni to Magboboot ka agad hondoi no diwata no suguanon din to,
“Kai kad on to kawanan ku ogpinpinnuu taman to ogdoogon ku ka tibo no mgo usig nu.”* Ka sikan no innangon to Magboboot to Anak din, ogkabasa to Salmo 110:1.
14 Nokoy naan ka mgo diwata no suguanon din? Ka lawa ran, ogkoiling to mgo gimukud no kono ogkakitaan. Di talagbulig sikandan to Magboboot no ogsuguon din dio to sikan no mgo otow no ogtuu on kandin to oyow ogkapangabangan on to mgo salo dan.
*1:5 Ogkabasa to Salmo 2:7.
†1:7 To Ginirigu, songo kuwo ko ogkalituk to, ka lawa to mgo diwata ogkoiling to kalamag woy ka oglogdog no hapuy, woy ko ian lituk to kagi rin ko ka pogsugu din to mgo diwata no suguanon din, ogkoiling to kalamag woy ko ka oglogdog to hapuy. Ka sikan, ogkabasa to Salmo 104:4.
‡1:8 Ogkabasa to Salmo 45:6.
§1:10 Ogkabasa to Salmo 102:25.
*1:13 Ka sikan no innangon to Magboboot to Anak din, ogkabasa to Salmo 110:1.