1 Neebee nokaa yuwa, eto ko mee wodoo kisiino menaa gaayu ko inii kaa sembahyang mée yataai. Idukaa inii Tuhan me menaa ikii paagoo kiiweganaaka too ikii me kuwa ebo menaa yoka naadi peneasemea. Kuwa see see bedaa inii eto apanaa bagee paagoo kuwa menaa moga eeweganaa siyaa naaki okoo miya kuwa ebo menaa yoka naadi daamaa peneata doowoo see bagee eebaa kedaasi naadi sembahyang mée yasegee taai. 2 Bedaa dimi koopoo, dimi pedeo see bagee kuwa mée yapekataasi naadi miya sembahyang mée yataai. Yesus mikee se gaayaa bagee agoo yoka naadi kisege. 3 Kisee bagee agoo kiya Tuhan Wa me taa ma taa ikii dimi mena pesee kikiyaata kaama Iblis mee kiwasitagaa siwoo taapi. Yoh 17:15, 1Yoh 5:18 4 Ikii Tuhan ma dimi aagadi-maagadi taa see bagee yoka inii me kisiyaa menaa yuwa ikii daamaa ukuwataakea, bedaa kisee too ukuwawoo taapea ii see kuwa miya inii kigaage. 5 Inii Tuhan paagoo kiaseekee menaa kuwa ko Ogatamee me epa mée gaataa see dimii mee Wa me ikii daamaa ipi kikiyaasi naadi kiasege. Bedaa Kristus Waa mée me wegee-wegee seta kiya makii taa see kaa toowoo seta see see ikii miya makii taa see kaa kituyaabuu siwoosi naadi kiasege.

6 Neebee nokaa yuwa, inii epoo Mée Tuhan Yesus Kristus mee ekaa yago Mée yoka inii Wa me pesee kaa kisiino ko kisee: Ikii paagoo Yesus mikee gaayaa bagee kiya ukuwaano agiyoo se ukuwataa, aii totaa, inii me kitopegee see menaa yuwa si yeetaa, kisee bagee kuwa wigineai. 7 Idukaa inii ikii paagoo kiitoogeeka too ukuwata-ukuwata kuwa ikii miya ipi. Kuwa mokoo ikii miya ukuwawoo, umiwoo taano gaano pedeo. Kuwa ko inii me agiyoo omaago ma ukuwagee seta, inii otoopa kiitoono taa. 8 Mée me niinuyaa agiyoo kuwa inii aii kisee yamasegee taano taa. Ikii me mée manegee segee taano kuwa kana kaapea yoka naadi inii me too egapi yaato miya, daatooyiba yaato miya inii me gaano pedeo agiyoo edaano see naadi kaama agiyoo kana ma, kana ma too ukuwagee seta. 1Tes 2:9 9 Inii me kisee omaago ma ukuwagee seta kuwa ko inii me gaano pedeo agiyoo kiidimaano mee pedeo yoka see gaata kuwa me se kiya inii me agiyoo omaago ma ukuwagee seta see see ikii me agiyoo miya kisee omaago ma ukuwawoosea naadi ikii paagoo omaago ma ukuwagee seta. 10 Inii ikii paagoo kiitoogee seta kaboo inii me kiseme menaa ena mee ko kisee: "Ukuwaano agiyoo ukuwaano be kiyaa bagee kuwa okoo naano agiyoo miya se eenaai" kisee menaa kitopegee seta.

11 Ikii paagoo mée noonaa aii toogeekea, okoo me agiyoo, okoo me menaa kuwa ekeata apanaa bagee me menaa yuwa too otoopa yayeenaakea, see menaa kuwa doodoota inii paagoo niiwegagea. 12 Kuwa bagee yuwa nekeensi naadi inii me Tuhan Yesus Kristus pesee kaa okoo omaago ma asiino menaa ko kisee: "Ikii me naano agiyoo yuwa too noogee taano see yoka agiyoo daamaa koogo ukuwawoo taai see kisegea" see naasii. 1Tes 4:11-12

13 Neebee nokaa yuwa, ikii me "Anii daamaa agiyoo ukuwagee taano kana, be" see dimii mee se gaai. 14 Inii me mee kapogee kaa kiebeage menaa kuwa yiino be see bagee agoo kiyu ko kuwa bagee yuwa nekeenii. Okoo ego weda kisi naadi okoo sekaataa se peenaa taai, se eetooi. 15 Kisee kiya okoo miya Yesus mikee gaayaa bagee yoka okoo yape bagee mokoo ekee see se kiya daamaa ase-manee taai.

16 Eto ko dimi koogo mée adumiyaayaa Mée Tuhan Wa me ikii me ukuwayaa, peeyaa yuwa uduma yiba koogo adumeta dimii mee kineewoosi naadi kiasege. Tuhan mee ikii ma enaataa kiitoowoo taapi. 17 Eto ko anii Paulus me ni me yagaa kaa mee mena ponee to mee too kiebeataaka. Mee kiebeataaka mena ponee to mee ko Paulus me kapogee ii see nanekeensea naadi mena ponee to. Ni me kapogee yuwa uduma wodopasi yaato kuwa ni me yagaa da me ebeataaka mee see see too anii ebeagee siyaa.

18 Inii epoo Mée Tuhan Yesus Kristus Ogatamee Wa me aii kiepa dimii mee ikii ma epo enaataa kiitoowoosi naadi kiasega. Kiyoo too.