Bafut 1 BaTesalonika 1

Àŋwàꞌànə̀ Paul yi ntsyàmbìì a mbô ŋ̀ghòtə̂

BaTESALONIKA

ǸJIꞌÌNNǓ AŊWÀꞌÀNƏ̀ YÛ

A aŋwàꞌànə̀ yû aa a lɛ ŋŋwàꞌànə Paul. Tesalonika à lɛ mbə njɔ̀ꞌɔ̀ àlaꞌa yì ǹtsyàmbìì a mbùꞌù Macedonia, ŋkɨ ghaꞌa tsyatə njɔꞌɔ alaꞌà tsɨ̀m ghu. Bə̀ lɛ ntswe ghu tsǒ 200,000. Bə̀ bî ghàꞌàtə̀ bɨ zî ǹtaŋə nɨ̂ mɨtaa ghu. Bo tswê nɨ̀ byaa bɨ̂saꞌa bɨ alaꞌà.

A nɨ̂ ǹtoo yì ǹsɨgɨ̀nə̀ a Tesalonika aa a lɛ nzì Paul nɨ Silas a ajàŋ mə bo lɛ màꞌàtə Filipi aà. Bô zì mə̂ ǹswoŋə annù Kristo ghu aa, baYuda bìi mə bɨ lɛ ntswe ghu aa bɨ tuù ànnǔ yaa, ntotə bə̂, bɨ furə̀ waa, bo tɨgə̀ ǹlo waa ŋghɛɛ a Berea (Ɨ̀fàꞌà 17.1-10). Bo lɛ ntswe a Tesalonika aa tsiꞌì a nɨ mû àtɨɨ noò, tsǒ ŋgyà ji tarə̀ (Ɨ̀fàꞌà 17.2). Lâ, m̀bɔŋ tâ bɨ̀ furə waa aa boŋ bə̀ bî mɔꞌɔ, nɨ baGrikia bî ghàꞌàtə̀, bɨ bìì mə̂ ǹtoo yì ǹsɨgɨ̀nə̀ yâ (Ɨ̀fàꞌà 17.4). Bɔɔ bɨ Kristo ma bû bɨ lɛ tswe a mûm ŋgɨꞌɨ nloŋ mə bɨ lɛ sɨ naŋsə ntsɔꞌɔ nɨ̂ àkòrə̂ yaa aà. Ka mə bɨ lɛ sɨ tsɔꞌɔ nɨ̂ àkòrə̂ yaa aa, àbìintɨɨ̀ yaa a lɛ ŋkwe ŋghɛɛ nɨ̂ m̀bìì, bo biì nɨ̂ ŋ̀gɨꞌɨ ya nɨ̂ àtàŋəntɨɨ, ŋ̀kɔŋə nɨ̂ waa bo nɨ bo, ǹsɛɛnsə nɨ̂ ǹtoo yì ǹsɨgɨ̀nə̀ yâ.

Timoti à lɛ ŋghɛ̀ɛ̀ ǹswoŋə annù yìi mə a lɛ tswe a ŋghotə̂ baTesalonika aa a mbo Paul. À yùꞌù mə̂ ǹtɨgə ŋŋgwaꞌanə aŋwàꞌànə̀ yû a mfâ m̀bɨꞌɨkə a mbo bo, ɨ dɨ̀ɨ̀ntə̀ waa wa mûm ŋ̀gɨꞌɨ, ɨ dɨꞌɨtə waa, ɨ kɨɨ kwiꞌi ɨnnù jî mɔꞌɔ jìi mə bo lɛ sɨ betə nii ghu aà. À lɛ ŋghàà a mbo bo nloŋə bə̂ bìi mə bɨ kwokə a mûm Kristo aa, nswoŋə nɨ̂ àjàŋ yìi mə a ka yǐ bə wa noò mə Kristo à ka yǐ bǔ bɨ̀ɨ̀ aà (4.3-5.11). Ǹdɨꞌɨtə waa nswoŋ annù yìi mə Nwì a lɔ̀ɔ̀ ǹloŋ ŋgaà yàà aa (4.3; 5.16-18). Paul à lɛ sɨ naŋsə lɔɔ mə tâ bo ka ŋeꞌesə nɨ̂ waa, nyoŋə nɨ̂ àkorə̀ nɨzî yaa. Ǹtsaꞌatə nɨ̂ Nwî a atu bo mə tâ bo naŋsə mfa mɨbɨ̀ɨ̀mɨnû mya a mbo Nwì tâ à naŋsə nləə waa bɨ̀ laa, mbə njoo ɨfàꞌâ ji (4.9-12; 5.12-25).

Ŋ̀ghòtə̂ baTesalonika ɨ̀ nɨ̂ àlènsə nghotə̂, m̀bə fɨgɨ̀ a mbo bə̀ bɨtsɨ̀m a nɨ̂ àbìintɨɨ̀ yaa, bo bɨ̀ a ajàŋ mə bo lɛ mbii ŋgɨꞌɨ nɨ̂ àtàŋəntɨɨ, ǹsɛɛnsə nɨ̂ ǹtoo yì ǹsɨgɨ̀nə̀ ya ghu, m̀bî ǹtsɨ̀m ɨ tɨgə̀ ǹyuꞌu nɨ̂ ànnû yaa aà (1.7-10). Paul à lɛ naŋsə ndorɨtə nloŋ ŋgaà ŋ̀ghòtə mà yû, ǹtɨɨ̀ yi ɨ luu nɨ̂ àkɔ̀ŋnə̀ ǹloŋ ŋgaà yàà.

Bɨ yatə̂ àŋwàꞌànə̀ yû aa laà:

1. Ǹjiꞌìnnǔ aŋwàꞌànə̀ yuà 1.1

2. Àjàŋ mə Paul mfa mbɨꞌɨkə ŋghaꞌasə nɨ̂ Nwî aà 1.2—3.13

3. Àdɨꞌɨtə̀ mə bɨ̀ ka nzi akòrə̀ nɨzî yaa a mum Kristo 4.1-2

4. Àdɨꞌɨtə̀ ǹloŋ annǔ a ajàŋ mə Kristo à ka yǐ bǔ bɨ̀ɨ̀ aà 4.13—5.11

5. Ɨ̀dɨꞌɨtə̀ ji nlwìꞌìnjɨ̀m 5.12-22

6. Ɨ̀nnù jìi mə Paul à lɛ nswoŋə a nlwìꞌìsə aà 5.23-28

1 Àŋwàꞌànə̀ yìi mə a lo a mbo Paul, Silvanus, nɨ Timoti, ŋghɛɛ nɨ a mbo bə̀ bɨ Nwîŋgɔ̀ŋ Tà, nɨ Mmàꞌàmbi Yesu Kristo, bìi mə bɨ tswe a ndânwì a Tesalonika aà. Tâ ɨ̀bɔ̀ŋ Nwî nɨ̂ m̀bɔɔnə̂ yì ɨ̀ tswe a mbo bù.

2 Bìꞌi fa nɨ̂ m̀bɨꞌɨkə a mbo Nwì a ŋgɔ̀ŋ bɨ̀nòò bɨ̂tsɨ̀m ǹloŋ ŋgaa yùù, kaa waꞌà kaà a nnɨŋə̀ ghuu a mum àtsàꞌàtə̀ Nwî yiꞌi, ntsaꞌatə nɨ̂ Nwìŋgɔ̀ŋ Taà yiꞌ inə̀ 3 Ŋ̀waꞌatə nɨ̂ àfàꞌa abìintɨɨ̀ yuu, bo bɨ̀ ànwùgɨ̀nə akɔ̀ŋnə̀ yuu, bo bɨ̀ àjàŋ yìi mə nɨ̀ tɛ̀ꞌɛ atû yuu nyuꞌutə nɨ̂ M̀màꞌàmbi Yesu Kristo ghu nɨ̂ àtàŋəntɨɨ aà. 4 Bìꞌì zi tsiꞌì sɨgɨ̀nə̀, bɨlɨ̂m biꞌi bìi mə Nwìŋgɔ̀ŋ à kɔ̀ŋ aa, mə nɨ̀ nɨ bɔɔ̀ bi bìi mə bɨ ntsɔꞌɔ; 5 ǹloŋ mə kaa Ntoo yì ǹsɨgɨ̀nə̀ ya mə bìꞌì lɛ nzi nɨ yu a mbo bù aa, kaa ɨ̀ lɛ ŋwaꞌà aa tsiꞌì nɨ̀ nɨ̀ghàà nɨ tsù zî bə̂, ɨ̀ lɛ ŋkɨ nzi aa nɨ̀ mɨ̀dàꞌà bo bɨ̀ a mûm Àzwì Nwî, kaa ànnǔ ajɨ̀ŋkə̀ kaa a waꞌà ghu tswê. Nɨ̀ zî ɨ̀jàŋ bə̂ bìi mə bìꞌì lɛ mbə ghu a tɨtɨ̀ɨ bù, ǹloŋ aà ŋ̀gaa yùù. 6 Nɨ lɛ sɨ tɨgə ŋŋeꞌesə nɨ̂ yiꞌi ŋkɨɨ ŋŋeꞌesə nɨ̂ M̀màꞌàmbî, nloŋ mə nɨ lɛ ŋkwɛrə ntoo yì ǹsɨgɨ̀nə̀ ma yû aa a mûm ŋ̀gɨꞌɨ yì ŋ̀wè, lâ Àzwì Nwî a bâŋnə̀ ŋ̀ghɨrə nɨ̀ kwɛrə nɨ̀ nɨ̀dorə̀; 7 ma mùu ajàŋ nɨ̀ tɨgə̀ m̀bə fɨgə̀ a mbo bə̀ bìi mə bɨ lɛ mbii Kristo a Macedonia bo ɨ̀ Achaia aà. 8 Ǹloŋ mə kaa à sɨ tsiꞌì ntoò M̀màꞌàmbi ya bə̂ a ajàŋ yìi mə nɨ̀ sɛɛnsə ɨ ghɛɛ̀ a Macedonia bo bɨ̀ a Achaia aà, àjàŋə mə nɨ̀ nɨŋ ntɨɨ̀ ghuu a nu Nwì aa, a kɨ̀ mə̂ sɛɛnə ŋghɛ̀ɛ̀ a adɨgə tsɨ̀mə̀, maa ajàŋ, a tɨgə̀ m̀bə ayəfə yuu, kaa bìꞌì waꞌà nɨ̂ ànnû tsu bû ǹtswe a nswoŋə nloŋ ŋgaa yùù. 9 Ǹloŋ mə bo bɨmbɔŋ bɨ swoŋə nɨ̂ ànnù ajàŋ yìi mə nɨ lɛ ŋkwɛrə yiꞌi aa, bo bɨ̀ àjàŋ yìi mə nɨ̀ lɛ mbəŋkə ghuu mmaꞌatə a mmii mɨ̀ŋkobə, ntɨgə mfaꞌa nɨ a mbo Nwìŋgɔ̀ŋ yìi mə à tswe ntɨ̀ɨ̀ ŋ̀kɨ mbə yî ànnù nɨ̂ŋkoŋ aà. 10 Ŋ̀kɨɨ ntɨgə nyuꞌutə nɨ̂ Mû yì Yesu, mə tâ à lo a aburə mbu mbɨ̀ɨ̀, làꞌà yu wa yìi mə Nwì à lɛ mbɨ̀ɨ̀nsə̀ a nɨwo aà, m̀bə Yesu yìi mə a fiꞌisə nɨ̂ yiꞌinə̀ a mûm àlwintɔŋə Nwî yìi mə a ka yǐ zì aà.