Bafut 2 Timoti 1

Àŋwàꞌànə̀ Paul yî àyòŋtə̀ a mbo

TIMOTI

ǸJIꞌÌNNǓ AŊWÀꞌÀNƏ̀ YÛ

A aŋwàꞌànə̀ yû aa a lɛ ŋŋwàꞌànə Paul mbo Timoti a noò yìi mə à lɛ ntswe a atsaŋ a Roma aà (1.8,16; 2.9) ǹzi nɨ mə kaa yu aa waꞌa wa atsaŋ fɛ̀ꞌɛ̀, ŋkɨ nzi nɨ mə nòò yìi mə bɨ ka zwitə yi ghu aa à kùꞌù mə̂ (4.6). A tɨgə̀ ŋ̀ŋwaꞌanə nswoŋ nɨ a mbo Timoti mû yi (2.1-2) ɨnnǔ ntɨɨ yi, tsǒ mə ŋǔ dɨꞌɨ nɨwô ni a mbo mû yì aà. Ǹswoŋə ghu mbo mə bə̀ bɨtsɨ̀m bɨ maꞌatə yi (1.15; 4.10,14,15). Ka mə yu yə ŋgɨꞌɨ nloŋ ntoo yì ǹsɨgɨnə̀ ya aa (2.9) yu zi yu wa yìi yu nɨ̂ŋ ǹtɨɨ̀ yi ghu nu aà, à ka yǐ tsɔꞌɔ ɨfàꞌâ yi (1.12,; 4.17 2.11-13; 4.6-8).

Ma mùu ajàŋ Paul ŋwaꞌànə̀ ǹdɨꞌɨtə nɨ̂ Timoti nswoŋ nɨ mə bə̀ bɨ̀tsɨ̀m bìi mə bɨ swoŋə nɨ̂ ǹtoo yì ǹsɨgɨ̀nə̀ ya, ŋ̀ghɨrə nɨ̂ ànnù yìi mə a tsinə̀ aa bɨ ka kɨ tsɔꞌɔ akòrə̂ yaa. Ǹswoŋ mə tâ à ka ntaŋntɨɨ mum àfaꞌa yu (2.3; 4.5), ndɨꞌɨ nɨ̂ ànnù ya yìi mə à lɛ yəgə a mbo yu aa a mbo bə̀ bî mɔꞌɔ (2.2), ŋka nstsyɛsə nii nloŋ ŋgǎŋndɨꞌɨnǔ mbweꞌesə̀ (4.3) bo bə̀ bìi bɨ ka yǐ kɨ tɨgə tuu nɨ̂ Nwì (3.1-9). La tâ Timoti a yə mə yu nɨ ŋ̀gàŋàfàꞌà yìi mə à kùꞌùnə, bɨ beentə̀, a naŋsə̀ ntswa nɨ nɨ̀ghàà nɨ Nwì nya mə nɨ yweensə bə̂ aa, ǹsiꞌi yi nlaa nɨ̂ àkòrə̀ nɨzî yi bo bɨ bə̀ (2.15,22), ǹnaŋsə nlii a ajàŋ mə̂ ǹtswêntɨ̀ɨ̂ yì Paul ɨ̀ bə aa, ŋka ŋŋeꞌesə (3.9-11,14-17).

Bɨ yatə̂ àŋwàꞌànə̀ yû aa laà:

1. Ǹjiꞌìnnǔ aŋwàꞌànə̀ yuà 1.1-2.

2. Àjàŋ mə Paul ghaꞌasə Nwî, ŋkɨɨ mfaꞌa nɨ̂ àdɨꞌɨtə̀ aa 1.3—2.13

3. Àdɨꞌɨtə̀ bo bɨ̀ àwàꞌàsə̀ 2.14-4.5

4. Paul a ghaa annù ǹloŋ ŋgaà yì 4.6-18

5. Ɨ̀nnù jìi mə Paul à lɛ nswoŋə a nlwìꞌìsə aà 4.19-22

Àtsàꞌàtə̀ Paul a mbo Timoti

1 Àŋwàꞌànə̀ yû a lo aa a mbo mə̀ Paul, ŋ̀gàŋntoò Kristo Yesu nɨ̂ ŋ̀kɔ̀ŋə Nwì yìi mə à lɛ ntwoŋə gha mə mə̀ ka nswoŋ annù a àjàŋə mə à lɛ ŋkàꞌà mə yu ka fa ǹtswêntɨ̀ɨ̀ a mbo bə̀ a mum Kristo Yesu aa, 2 ŋghɛɛ nɨ a mbo Timoti mû ghà yìi mə mə̀ kɔ̀ŋə aa. Tâ Taà Nwì bo bɨ̀ Kristo Yesu, Mmàꞌàmbî yìꞌinə̀, tâ à fa ɨbɔ̌ŋ yi nɨ̂ ŋ̀ko mɨ̀lɨ̀ŋnə̀ bo bɨ̀ m̀bɔɔnə a mbo wò.

Àjàŋ mə Paul à lɛ mfa mbɨꞌɨkə a mbo Nwì ŋ̀kɨ ndɨɨntə abìintɨɨ Timoti aà

3 Mə fa mbɨꞌɨkə a mbo Nwìŋgɔ̀ŋ yìi mə mə fàꞌà ghu mbo nɨ̂ àlaa ntɨɨ aa, tsiꞌì tsǒ mə bɨ̀taà lɛ sɨ ŋkɨɨ mfaꞌa aa, a noò yìi mə mə waꞌatə noo a ŋgaa ŋgaa a nɨtugə nɨ a asinə a mûm àtsàꞌàtə̀ Nwî aà. 4 Àjàŋ yìi mə mə̀ yi ŋwaꞌatə mɨlàâ mo aa, mə̀ yəꞌə̀tə̀ mə mə yə ghô tǎ tâ ǹtɨɨ̀ gha ɨ luu nɨ nɨ̀dorə̀. 5 Àbìintɨɨ̀ yi annù nɨ̂ŋkoŋ ya a zì nɨ atu mə̀, mbə abìitɨɨ ya mə a lɛ mfòò ǹtswe a nu maà ghò Lois, mə a kɨ ntswe a nû ǹdè ghò Eunice tsɨtsɔ̀ŋə̀ aa, mə̀ zi a laa mə a kɨ ntswe a nu wò.

6 Mə̀ tɨgə̀ m̀bu ŋwaꞌatə nɨ a mbo wò mə ò kuꞌusə mbɨ̀ɨ̀nsə̀ mɨtəŋnə mɨ Nwî mya mə mɨ tswe a nu wò ǹyoŋ a ajàŋ mə mə̀ lɛ nnɔ̀ŋsə mbô ma a atu wò aà. 7 Ǹloŋ mə kaa Nwì à lɛ ŋkɨꞌɨ aa Àzwǐ atsɨ̀gɨ̀nə mɨbɛ̀ a mbo bìꞌinə̀ fâ, à lɛ mbàŋnə̀ m̀fa aa Àzwì mɨdaꞌa nɨ yǐ akɔ̀ŋnə̀, nɨ yǐ ntswâ ɨ̀bɨ̀ɨnû. 8 Tsuu kɨ bɔꞌɔ a ŋka nswoŋ annù ǹloŋ Mmàꞌàmbî yìꞌinə̀, kə̀ ǹloŋ ŋgaà yà, ŋ̀gàŋàtsaŋ yì bə̂. Bàŋnə nyə mə ò tswe nɨ̀ àbwarə a ŋkɨɨ nyə̂ ŋ̀gɨꞌɨ nloŋ ntoo yì ǹsɨgɨ̀nə̀ ya nɨ mɨ̀dàꞌà mɨ Nwî, 9 yu wa yìi mə à lɛ nyweensə yiꞌinə̀ ǹtwoŋə yiꞌinə̀ mə tâ àkòrə̀ nɨzî yiꞌinə̀ ghu nsi tâ à tsinə ŋkɨ laa aa, kaa ŋkɨꞌɨ̀ twoŋ nloŋə aa bə̂ ɨ̀fàꞌâ yìꞌinə̀ yî tsu bə, mbaŋnə nloŋ aa bə àtaŋtə̀ yi yumbɔŋ, bo bɨ̀ ɨ̀bɔ̀ŋ Nwî wa yìi mə à lɛ mfa a mbo bìꞌinə̀ a mum Kristo Yesu a ŋguꞌu ŋguꞌu aà. 10 Tsɨ̂tsɔ̀ŋ à fɛ̀ꞌɛ̀sə̀ mə ɨbɔ̀ŋə̂ yi wa ɨ yɛntə nyoŋ a ajàŋə mə Ŋgàŋnyèènsə̂ yìꞌinə̀ Kristo Yesu à zì mə̂ aà, yu wa yìi mə à bwɛ̀sə̀ mə̂ nɨwo, ǹtɨgə nzi nɨ̂ ǹtswêntɨ̀ɨ̀, nɨ̂ ànnù tɨ kwo a mûm ŋ̀kàꞌà, ǹtsya a njɨ̌m ntoo yì ǹsɨgɨ̀nə̀ ya aà. 11 Nwì à lɛ ntsɔꞌɔ gha mə mə̀ bə ŋgàŋntoo ŋka nswoŋə ŋkɨɨ ndɨꞌɨ nɨ̂ ǹtoo yì ǹsɨgɨ̀nə̀ ma yû. 12 A bə̂ ǹjiꞌì ànnù yìi mə mə yə ŋgɨꞌɨ fàa ajàŋ laa, lâ kaa mə̀ sɨ atu dɨ̀rə̀ ǹloŋ mə mə̀ zi ŋû yìi mə̀ nɨ̌ŋ ntɨɨ̀ gha ghu nu aà. Mə̀ kɨ nzi a laa mə à zî àjàŋ yìi mə mbə yu bɛ annù ya mə à lɛ nnɨŋ a mûm ǹtərɨ̀nə̌bo mə̀ aa, ɨ ghɛɛ yweꞌe wa Njwî.

13 Ka nyòŋə mânjì mɨ̀ghàà mî tsìnə̀ mya mə ò lɛ nyuꞌu a mbo mə̀ a mûm àbìintɨɨ nɨ̂ àkɔ̀ŋnə̀ ya yìi mə a tswe a mum Kristo Yesu aà. 14 Ka mbɛ annù nɨ̂ŋkoŋ yì sɨgɨ̀nə̀ ya yìi mə Àzwi Nwî yìi a tswe a mûm nu bìꞌinə̀ aa, a nɨŋ a mûm ǹtərɨ̀nə̌bo wò aà.

15 Ò zi mə bə̀ bɨtsɨ̀m bìi mə bɨ tswe a mbùꞌu Asia aa, bɨ màꞌàtə̀ mə̂ ghâ tsiꞌì bɨ̀tsɨ̀mə̀, Phygelus nɨ Hermogenes bɨ kɨ̀ mə̂ m̀maꞌatə. 16 Tâ Nwìŋgɔ̀ŋ à ko mɨlɨ̀ŋnə̀ ŋ̀gwɛ̀ꞌɛ̀ Onesiphorus ǹloŋ mə a ghaꞌasə ŋghɨrə ntɨɨ̀ gha ɨ fwɛtə̀ aà. Kaa à lɛ ŋkɨꞌɨ̌ atu ŋka ndɨrə nloŋ atsaŋ yìi bɨ koo gha ghu aà. 17 Lâ nòò yìi mə à lɛ nzì ŋ̀kuꞌu a alaꞌa baRoma aa à lɛ nnaŋsə nlɔɔ gha tsiꞌì nɨ̀tɨ̀ɨ̀ ǹyə ghâ. 18 Tâ M̀màꞌàmbi â ghɨrə tâ à yi nyə ŋkomɨ̀lɨ̀nə̀ M̀màꞌàmbi wa njwî ǹtsɔ̀ꞌɔ̀tə mɨ̀saꞌà. Ò kɨ nnaŋsə nzi mbuu mɨfàꞌà mìi à lɛ sɨ fàꞌà a alaꞌa Ephesus aà.