Àŋwàꞌànə̀
JƆN
yìi a yweꞌe ji tarə aà
ǸJIꞌÌNNǓ AŊWÀꞌÀNƏ̀ YÛ
A aŋwàꞌànə̀ yû aa a lɛ ŋŋwàꞌànə Jɔn ǹdɨ̀ɨ̂ ǹdânwì yìi mə à lɛ ŋkɨ ŋwaꞌanə 2 Jɔn aà. À lɛ Ŋŋwàꞌànə̀ aa a mbô ǹsûkàꞌâ yì Gaius. À lɛ ŋŋwàꞌànə a ntsisə ɨnnù jìi mə ɨ lɛ mfɛ̀ꞌɛ̀ ǹloŋ ŋgǎŋswoŋ ntoo yì ǹsɨgɨ̀nə̀ jìi ɨ lɛ sɨ təə ŋkarə ndɨꞌɨ nɨ̂ ànnù Nwî a ŋghotə jìi mə ɨ lɛ ntswe a ɨdɨgə ɨdɨgə aà. Bə̀ tsiꞌì tsǒ ma bû, bɨ̀Krisèn lɛ ntswe nɨ̂ ŋ̀kwɛ̀rə̂ waa a mɨlaꞌa bo, ɨ kɨɨ kɨ kwɛtə a waa (6-8). La Diotrephes, ǹtsyàsə̀ yìi mə à lɛ ntswe maa ŋghotə aa, à lɛ ntuu ŋkwɛrə̀ waa, m̀fiꞌisə nɨ̂ bɨ̀Krisèn bìi mə bɨ kwɛrə nɨ̂ waa laa a ŋghotə̂. Ma yû a ghɨrə̀ mə tâ Jɔn à ŋwaꞌanə a mbo ǹsûkàꞌâ yì Gaius mə tâ à ka ŋkwɛtə ŋgǎŋtoo Nwî ma jû jìi mə ɨ fàꞌà ǹloŋ aa ŋkwîtu Kristo aà (9-11). Jɔn a swoŋ mə yumbɔŋ yu ka zi lèntə annǔ Diotrephes yìi mə a tuu adaꞌâ yi, m̀fa nɨ̂ ŋ̀gɨꞌɨ a mûm ghòtə aà (10).
Àŋwàꞌànə̀ ma yû a dɨ̀ꞌɨ̀ nɨ mə a bɔŋ ŋkɨ mbə annù yî tɨ̀nsə̀ a ŋkwɛtə bə̀ bìi mə bɨ ghɛ̀ɛ ntoò Nwì aà. A kuꞌunə mə bǎŋghotə bɨ̀tsɨ̀m ka ŋkwɛtə a nsɛ̀ɛ̀nsə̂ ǹtoo yì ǹsɨgɨ̀nə̀. Ŋù yìi mə a fa njoo ŋkwɛtə nɨ̂ ŋ̀gǎŋtoo ghu aa, bo kɨɨ mfaꞌa aa bo bɨ̀ ŋgǎŋntoo mà jyâ, m̀bə aa ŋgàŋakòrə̂ jyaa (7-8).
Bɨ yatə̂ àŋwàꞌànə̀ yû aa laà:
1. Ǹjiꞌìnnǔ aŋwàꞌànə̀ yuà 1-4
2. Jɔn a beentə Gaius 5-8
3. Jɔn à fâ àfɨ̀rə Diotrephes 9-10
4. Jɔn à beentə Demetrius 11-12
5. Ɨ̀nnù jìi mə Jɔn à lɛ nswoŋ a nlwìꞌìsə aà 13-15
1
Àtsàꞌàtə̀
1 Àŋwàꞌànə̀ yû a lo aa a mbo mə̀ ǹdɨ̀ɨ̂ ǹdânwì, ŋghɛɛ nɨ a mbo ǹsûkàꞌâ ghà, Gaius yìi mə mə̀ kɔ̀ŋ tsiꞌǐ annù nɨ̂ŋkoŋə aà.
2 Nsûkàꞌâ ghà, mə tsàꞌàtə̀ Nwî mə tâ ɨ̀nnù tsɨ̀m ɨ̀ ka ŋghɛɛ ɨ sɨgɨ̀nə̀ a mbo wò tâ ò kɨ ŋka ntɨnsə; ǹloŋ mə mə̀ zi mə ǹtɨɨ̀ gho ɨ tswê ǹtɨ̀ɨ̀. 3 Mə̀ kɨ̀ nàŋsə dorɨtə a nyuꞌu a mbo bɨ̀lɨ̂m bìꞌinə̀ bî mɔꞌɔ bìi mə bɨ kɨ̀ zi nswoŋ ajàŋ yìi mə o naŋsə ntswe nɨ̂ ǹtswêntɨ̀ɨ̀ yò ɨ yoŋə̀ nɨ̀ mâŋjì Nwì yî ànnù nɨ̂ŋkôŋ a ajàŋ yìi mə o gaansə mɨtɨ̀ɨ̂ mo nyoŋə nɨ̂ ànnù nɨ̂ŋkoŋ aà. 4 Kaa annû tsu sɨ̀ ghu tswê mə mbə a ghɨrə̀ mə̀ tswe nɨ̀ nɨ̀dorə ntsyàtə̀ nìi mə mə̀ tswe nɨ nu a nyuꞌu mə bɔɔ ba yòŋə annù nɨ̂ŋkoŋə aà.
Jɔŋ à bììntə Gaius
5 Ǹsûkàꞌâ ghà, wa o naŋsə mfaꞌa nɨ̂ ǹtɨɨ̀ ghô tsɨ̀m a ajàŋ yìi mə o fàꞌa a mbo bɨ̀lɨ̂m bìꞌinə̀, ka mə bo bə aa bɨ̀gɨ̀ɨ̀ aà. 6 Àa bo bìi mə bɨ kɛꞌɛnə àkɔ̀ŋnə̀ yìi mə ò dɨ̀ꞌɨ a mbo bo aa a nsî ŋ̀ghòtə̂. A kuꞌunə mə tâ ò ghɛɛ nɨ̂ mbìì ŋ̀kwɛtə waa, mfa njoo jìi mə bo lɔ̀ɔ̀ a ŋghɛ̀ɛ nɨ̀ m̀bìì nɨ̂ àkòrə̀ nɨtəə̀ yaa a nɨ mânjì yìi mə à kùꞌùnə a mûm àfàꞌà Nwì aà. 7 Ǹloŋ mə bɨ ghɛ̀ɛ̀ a nɨghaa mà nû aa a nloŋ ɨkum Kristo, kaa waꞌà bii mə mbə bo kwɛrə ayoò tsu a mbo bɨ̀tɨ̀biì Nwî. 8 Maa ajàŋ, a kuꞌùnə̀ mə tâ bìꞌinə̀ ka ŋkwɛtə ɨjàŋ bə̂ ma bû tǎ kɨɨ bə bə̂ bî mɔꞌɔ a tɨtɨ̀ɨ bo ma mùu mûm àfàꞌa annù nɨ̂ŋkoŋ aà.
Diotrephes bo Demetrius
9 Mə̀ ŋwàꞌànə̀ mə annù yî mɔꞌɔ a mbô ŋ̀ghòtə̂; lâ Dotrephes, yìi mə a kɔ̀ŋə̀ aa tsìꞌì ŋ̀ka ntəə a mbìì, ǹlɔɔ naa mə bɨ̀ ka ŋkwɛrə aa tsiꞌì a mbo yu aa, a tsaꞌa annù yìi mə mə̀ ŋwàꞌànə aà. 10 Ma mùu ajàŋ, nòò yìi mə mə̀ aa zì aa, mə̀ aa fiꞌisə ɨnnù ma jû mə a ghɨ̀rə̀ aà, ǹtswɛɛ nɨ̂ ɨ̀bǎŋnənnù ŋkɨɨ ŋghaa nɨ̂ ɨbɨ atu mə. Kaa ma juù ɨnnù mə à ghɨ̀rə̀ aa kaa ɨ waꞌà ghu mbo kùꞌù, a kɨɨ ntuu nɨ̂ ŋ̀kwɛrə bɨ̀lɨ̂m biꞌinə̀ a nda yu, ŋkɨɨ ŋkɨŋə nɨ bə̀ bìi mə bɨ lɔ̀ɔ̀ ŋ̀kwɛrə nɨ̂ waa a nda bo aa, mfiꞌisə nɨ̂ waa a mûm ŋ̀ghòtə̂.
11 Ɨ̀kàꞌâ jâ, nɨ̀ tsuu ɨnnù jî bɨ kɨ ŋèꞌèsə̀, m̀baŋnə ŋka ŋŋeꞌesə bə̂ ɨ̀nnù jî sɨgɨ̀nə̀. Ŋù yìi mə a ghɨ̀rə ɨnnù jî sɨgɨ̀nə̀ aa, à lò aa a mbo Nwì; ŋù yìi mə a ghɨ̀rə ɨbɨ aa, kaa à lɛɛ̀ ŋ̀kɨꞌɨ̀ a Nwî yə̂. 12 Lâ ŋ̀ghɛɛ nɨ ŋgaa Demetrius, bə̀ bɨ̀tsɨ̀m bɨ beentə annù yi, annù nɨ̂ŋkoŋ yìi mə a ghɨ̀rə̀ aa a kɨ̂ m̀fɛꞌɛ nlaa; bìꞌì bɨ̂mbɔŋ, bìꞌì kɨ̂ m̀beentə annû yi ǹloŋ mə nɨ̀ zi mə ànnù yìi mə bìꞌi swoŋ aa à nɨ̂ ànnù nɨ̂ŋkoŋə̀.
Àtsàꞌàtə nlwìꞌìsə̂
13 Mə̀ kɨ̀ tswe nɨ̀ ɨ̀nnù jî ghàꞌàtə̀ a ŋŋwàꞌànə a mbo wò, la kaa waꞌà kɔ̀ŋ mə mə ŋwàꞌànə nɨ̂ ŋ̀kɔ̀ŋəŋwàꞌànə̀. 14 Mə yə̀ꞌə̀tə̀ a ŋwàŋsə nzǐ yə ghô tǎ tâ sɨ̀ ghaa ɨnnù jî ghàꞌàtə̀ nɨ̂ ǹsi nɨ̀ ǹsî.
15 Tâ Nwì à bɔrɨsə ghô. Ɨ̀kàꞌâ jiꞌò tsɨ̀m ɨ tsàꞌàtə̀ noò. Kɨ ntsàꞌàtə ɨkàꞌâ jiꞌò tsɨ̀m fyaa yî mɔ̀ꞌɔ yî mɔ̀ꞌɔ̂.