1 यूहन्ना
यूहन्ने री लिखी री पईली चिट्ठी
भूमिका
यूहन्ने री पईली चिट्ठिया रे दो खास मकसद ए: (1) आपणे पढ़ने वाल़ेया खे परमेशर और तेसरे पुत्र यीशु मसीह साथे जिन्दगी बिताणे खे उत्साहित करना। (2) तिना खे चूठी शिक्षा खे मानणे, जेते साथे ये सहभागिता नाश ऊई जाणी, रे खलाफ चेतावणी देणा। ये चूठी शिक्षा एते तारणा पाँदे आधारित थी कि बुराई भौतिक दुनिया रे सम्पर्को रे आऊणे रा नतीजा ओई और इजी री खातर यीशु, परमेशरो रा पुत्र, सच्ची एक मांणू ऊई नि सकदा। इना शिक्षको रा दावा था कि उद्धार पाणे खे एक मांणूए खे एसा दुनिया ते जुड़ी री गल्ला ते आजाद ऊणा पड़ना और सेयो ये बी सिखाओ थे कि अच्छा चाल-चलण या आपणे पाईए साथे प्यार राखणे जेड़ी गल्ला रा उद्धारो ते कोई रिश्ता निए।
एसा शिक्षा रे खलाफ लेखक स्पष्ट रूपो रे ये बताओआ कि यीशु मसीह एक असली मांणू था और से एते गल्ला पाँदे जोर देओआ कि सेयो जो यीशु मसीह पाँदे विश्वास करोए और परमेशरो साथे प्यार राखोए, जरूर एकी-दूजे साथे बी प्यार राखो।
रूप-रेखा
भूमिका 1:1-4
जोति और न्हेरा 1:5; 2:29
परमेशरो री ल्वाद और शैतानो री ल्वाद 3:1-24
सच और चूठ 4:1-6
प्यारो रा फर्ज 4:7-21
विजयी विश्वास 5:1-21
1
जिन्दगिया रा वचन
1 आसे एक एड़े मांणू रे बारे रे लिखणे लगी रे जो जीवनो रा वचन ए। जो सृष्टिया रे शुरूओ ते था। से आसे सुणेया और आसे आपणी आखी ते देखेया, बल्कि से आसे त्यानो साथे देखेया और आपणे ई आथो साथे छूँयां। 2 से जो जीवन देओआ, तरतिया रे आया और आसे से देखेया और तिजी री गवाई देऊँए और तुसा खे तेस अनन्त जीवनो रा समाचार सुणाऊँए, जो पिते साथे था और आसा पाँदे प्रगट ऊआ। 3 जो कुछ आसे देखी राखेया और सुणी राखेया, तिजी रा समाचार तुसा खे बी सुणाऊँए, ताकि तुसे बी आसा साथे शामिल ओ। आसा री ये शामलता पिते साथे और तेसरे पाऊ प्रभु यीशु मसीह साथे ए। 4 इना गल्ला आसे इजी री खातर लिखूँए, ताकि म्हारी खुशी पूरी ऊई जाओ।
प्रयासे रे चलणा
5 जो समाचार आसे यीशुए ते सुणेया और तुसा खे सुणाऊँए से ये कि परमेशर जोति ए और तिजी रे कोई बी न्हेरा निए। 6 जे आसे बोलिये कि परमेशरो साथे आसा री संगति ए और फेर न्हेरे रे चलूँ, तो आसे चूठे ए और सच्चो पाँदे नि चलदे। 7 पर जेड़ा परमेशर जोतिया रे ए, तिंयाँ ई आसे बी जोतिया रे चलिए, तो आसे एकी-दूजे री संगतिया रे शामिल ए और तेसरे पुत्र प्रभु यीशु मसीह रा खून आसा खे सारे पापो ते शुद्ध करोआ।
8 जे आसे बोलिये कि आसा रे कुछ बी पाप निए, तो आपणे आपू खे तोखा देऊँए और आसा रे सच निए। 9 जे आसे आपणे पापो खे मानी लऊँ, तो से म्हारे पाप माफ करने और आसा खे सारेया पापो ते शुद्ध करने रे विश्वासो जोगा और तर्मी ए। 10 जे आसे बोलिये कि आसे पाप निए कित्ते रा, तो परमेशरो खे चूठा ठराऊँए और तेसरा वचन आसा रे निए।