2 i nɛn ɡɑri nɔɔwɔ.

Ì n wurɑ i mɑn swɑɑ dɑki, i mɑn nukuru yɛmiɑsiɑwɑ mi.

3 I de n ɡɑri ɡere.

Nɑ̀ n ɡɑri ɡeruɑ nɑ kpɑ, ko i kpĩ i mɑn yɛ̃ɛ.

4 Tɔnuwɑ nɑ weeweenu koosimɔ?

Nɡe mbɑn sɔ̃nɑ kon tɛmɑnɑ.

5 I mɑn mɛɛrio, kpɑ biti yu bɛɛ mwɑ

kpɑ i bɛɛn nɔsu kɔre.

6 Nɑ̀ n nɛn wɑ̃ɑru bwisikɑ,

nɑ rɑ nɑndewɑ, nɛn wɑsi yi n diirimɔ.

7 Mbɑn sɔ̃nɑ Gusunɔ u rɑ de tɔn kɔ̃so u n wɑ̃ɑ,

kpɑ u n dɑm mɔ sere kɑ win tɔkɔrɔ.

8 U rɑ bibu mɑ kpɑ be, bu mɑɑ se bu mɑ.

Kpɑ u n be kpuro mɛɛrɑ bɑ n kuurɑmɔ win nɔni sɔɔ.

9 Bɔri yɛndɑ wɑ̃ɑ ben yɛnusɔ, bɑ ǹ bɛrum mɔ.

Gusunɔ kun mɑɑ bu sɛɛyɑsiɑmɔ pɑi.

10 Sɑɑ kpuro, ben kɛtɛ kinɛru tɑ̀ n ben nɛɛ yɔɔwɑ yi rɑ mɑwɑ.

Yi ku rɑ nukuru yɑri.

11 Bɑ rɑ ben bibu deri bɑ n duki mɔ̀ nɡe yɑ̃ɑnu,

kpɑ bɑ n dweebu mɔ̀,

12 bɑ n bɑrɑ kpɑ̃nu kɑ mɔrɔkunu soomɔ, bɑ n womusu mɔ̀,

kpɑ bɑ n nuku dobu mɔ̀, bɑ n ɡuunu soomɔ.

13 Bɑ rɑ ben wɑ̃ɑru diwɑ nuku dobu sɔɔ,

kpɑ bu ɡbi subɑru sɔɔ.

14 Wee bɑ rɑ rɑɑ yellu Gusunɔ sɔ̃ bu nɛɛ,

ɑ ɡɛɛro min di, sɑ ǹ kĩ su wunɛn swɛɛ ɡiɑ.

15 Wɑrɑ rɑ n Gusunɔ Dɑm kpuroɡii

su kɑ sere nùn yoru diiyɑ.

Arufɑɑni yerɑ̀ sɑ kon mɔ sɑ̀ n nùn kɑnɑmɔ.

16 Tɔn ben bweseru, bɑ ǹ doo nɔɔru mɔ ro?

Adɑmɑ nɛ, nɑ ǹ tɔn kɔ̃sobun bwisi kɛ̃ru kĩ.

17 Kɑ mɛ, ɑ rɑ wɑ mi tɔn kɔ̃sobun yɑm bururɑm mu ɡbimɔ?

A rɑ wɑ bɑ nɔni sɔ̃ɔre?

Gusunɔ u rɑ bu sɛɛyɑsie win mɔrun sɔ̃?

18 A rɑ wɑ bɑ sɑ̃ɑ nɡe yɑkɑsu,

ǹ kun mɛ nɡe doo sɑkosu si woo ɡɑ kɑ doonɑ?

19 Bɛɛ i ɡerumɔ i mɔ̀,

tɔn ben bibun bweserɑ Gusunɔ u rɑ sɛɛyɑsie.

Adɑmɑ nɛ, nɑ nɛɛ, ben tiiwɑ n weenɛ u sɛɛyɑsiɑ,

kpɑ bu ɡiɑ mɑ beyɑ bɑ torɑ,

20 kpɑ ben tii bu ben kɑm kobu wɑ.

Nɡe mɛyɑ bɑ koo kɑ Gusunɔn mɔru dendɑ bu wɑ.

21 Domi bɑ̀ n ɡu bɑ kpɑ,

ben bɑɑye kɑ ye yɑ koo ben bibu deemɑ.

22 Sɑ ko kpĩ su Gusunɔ keu sɔ̃ɔsi,

wi, wi u sɑ̃ɑ win ɡɔrɑdobɑn siri kowo?

23-24 Gɑbun wɑ̃ɑrɑ rɑ dorewɑ, bɑ n wɑ̃ɑ bɔri yɛndu sɔɔ.

Kpɑ bɑ n wɑsi bwɑ̃ɑ do, bɑ n dɑm mɔ nɡe ɑluwɑɑsi

sere bu dɑ bu kɑ ɡbi.

25 Adɑmɑ ɡɑbu bɑ rɑ ɡbiwɑ wɑhɑlɑ sɔɔ,

bɑ kun doo nɔɔru wɑ bɑɑ fiiko.

26 Be kpurowɑ bɑ koo ɡbi, kpɑ bu ko kɔkɔnun dĩɑnu.

27 I bɛɛn tii lɑɑkɑri ko,

nɑ bɛɛn bwisikunu yɛ̃ kɑ kɔ̃sɑ ye i mɑn mɑnimɔ.

28 Domi i nɛɛ, mɑnɑ tɔn bokon yɛnu ɡɑ wɑ̃ɑ,

ɡè sɔɔ tɔn kɔ̃sobɑ wɑ̃ɑ.

29 Adɑmɑ i ǹ be bɑ sɑrɔ swɑɑɔ bikiɑre?

I kĩ i sikiwɑ ye bɑ bɛɛ sɔ̃ɔwɑ tɔn kɔ̃son sɔ̃?

30 Wɑhɑlɑ yɑ̀ n tɔn kɔ̃so deemɑ u rɑ yɑriwɑ ye sɔɔn di.

Bɑɑ Gusunɔ ù n kɑ nùn mɔru kuɑ,

u rɑ kisirewɑ ye sɔɔn di.

31 Ǹ n mɛn nɑ, wɑrɑ u koo mɑɑ nùn ɡerusi.

Wɑrɑ u koo nùn win kɔ̃sɑ kɔsie.

32 Domi ù n ɡu, siki wɔruɔrɑ bɑ kɑ nùn dɔɔ.

Kpɑ bɑ n siki te kɔ̃su.

33 Tɔn dɑbirɑ tɑ koo win ɡoru swĩi bu kɑ dɑ siku yerɔ.

Kpɑ u kpin yee burɑru wɑ temɔ.

34 Ǹ n mɛn nɑ, nuku yɛmiɑ birɑ̀ i mɑn kuɑ.

Bɛɛn ye i mɑn wisɑ mi kpuro,

yɑ ǹ sɑ̃ɑ dee dee. Weesɑ i mɔ̀.