1 थिस्सलुनीकिया दे ना प्रेरित पौलुस दी पेहली चिठ्ठी
जानकारी
पौलुसे नोए भरोसा करणे बालयां जो उत्साहित करणे तांई ऐ चिठ्ठी लिखियो थी, ताकि जड़े लोक मरी गियो थे उना दी अनन्त अवस्था दे बारे च उना जो “प्रभु दे आगमन” (अध्याय 4:15), याद दिलाणे तांई आश्वासन देई सकन। कने उना जो ईश्वरीय जिन्दगी तांई प्रेरित करणा। पौलुसे उना जो शांति ला रेणे दा आग्रह किता। कने उना “सारे हालातां च धन्यवाद” दिया (अध्याय 5:18). थेस्सालोनिकी (वर्तमान थेस्सालोनिकी, ग्रीस) मेसेडोनिया दी राजधानी थी। ऐ जरूरी व्यापारे दे रस्तयां पर था। पौलुस, दो बरी लेखक दे रूपे च पछाणया गिया (अध्याय 1:1-2:18) अपणी दुज्जी मिशनरी यात्रा पर थेस्सालोनिकी दा दौरा किता पर यहूदियां दे बिरोध दिया बजा ला पलायन करणे तांई मजबूर होई गिया। उना तिमुथि जो बडे पैमाने पर होर जातियां दे चर्च सोगी कम्म करणे तांई भेजया, कने तिमुथिऐ उना जो उना दे भरोसे (अध्याय 3:6) दी अच्छी खबर दिती। ऐ पौलुसे दिया पेहलिया चे इक चिठ्ठी है, शायद ई स 51 च लिखया है।
रूप रेखा
अभिवादन 1:1-3
थिस्सलुनीकियों दा भरोसा कने उदाहरण 1:4-3:13
इक जिन्दगी जड़ी परमेश्वरे जो खुश करदी है 4:1-12
जालू परमेश्वर बापस मुड़ी ओए तां क्या उम्मीद करें 4:13-5:11
आखरी निर्देश कने अभिवादन 5:12-28
1
अभिवादन
1 ऐ चिठ्ठी मैं पौलुस, सिलवानुस कने तीमुथियुस दिया तरफा ला थिस्सलुनीकिया शेहर दिया कलीसिया दे ना लिखा दा है, जड़े पिता परमेश्वर कने प्रभु यीशु मसीह च न। मैं प्राथना करदा है की पिता परमेश्वर तुहांजो पर अपणा अनुग्रह कने तुहांजो शांति दे।
थिस्स्लुनीकियां दा भरोसा
2 असां अपणियां प्राथना च तुहांजो याद करदे कने हमेशा तुसां सबना दे बारे च परमेश्वरे दा धन्यवाद करदे न, 3 कने जालू असां अपणे पिता परमेश्वरे ने प्राथना करदे न, तालू असां तुहाड़े उना कम्मा जो याद करदे न, जड़े तुसां भरोसे दिया बजा ला करदे न, कने जड़िया सकत मेहनता ने तुसां मसीह भाईयां दी सहायता करदे न क्योंकि तुसां उना ने प्यार करदे न कने दुख तकलिफा जो सेहन करदे न क्योंकि तुहांजो आस है, की प्रभु यीशु मसीह जल्दी बापस ओणे बाला है।
4 हे मेरे मसीह भाईयो, तुहांजो ने परमेश्वर बड़ा प्यार करदा है, असां जाणदे न, की परमेश्वरे तुहांजो अपणे लोक होणे तांई चुणया है। 5 क्योंकि प्रभु यीशु मसीह दा शुभसमाचार तुहाड़े बाल सिर्फ अखरां च ही नी पर पबित्र आत्मा दिया शक्तिया, कने पूरी मजबुतिया ने तुहाड़े बाल पूज्या है, तुहांजो पता है की तुहाड़े उद्धार तांई तुसां बिच साड़ा चाल चलन कदिया था।
6 तुसां बड़े भरी दुखां च थे पर तुसां पबित्र आत्मा दी दीतियो खुशिया सोगी शुभसमाचार जो अपनाई करी साड़े उदाहरण कने प्रभु दे उदाहरण दा अनुसरण किता। 7 ऐथू दीकर की तुसां मकिदुनिया प्रदेश कने अखाया प्रदेशे दे सारे विश्वासियां तांई आदर्श बणी गे।
8 क्योंकि तुहाड़े ऐथू ला ना सिर्फ मकिदुनिया प्रदेश कने अखाया प्रदेशे च प्रभु दा बचन सुणाया, पर तुहाड़े भरोसे दी चर्चा हर पासे फेली गेई जड़ा परमेश्वरे पर है, हर जगा जिथू असां गे, ओथु सांझो लोक मिल्ले जिना सांझो तुहाड़े भरोसे दे बारे च दसया, जड़ा परमेश्वरे पर है, इस तांई सांझो तुहाड़े बारे च कुछ बोलणे दी जरूरत नी है। 9 क्योंकि सै लोक अपु ही दुज्जयां जो दसदे न की तुसां साड़ा स्वागत किता जालू असां तुहाड़े बाल आऐ; कने तुसां कजो मूर्तियां ला दूर होईकरी परमेश्वरे बाल आये ताकि तुसां जिन्दे कने सच्चे परमेश्वरे दी सेबा करन। 10 कने तुसां स्वर्गे ला परमेश्वरे दे पुत्रे दे ओणे दी आस रखा दे न, जिसयो परमेश्वरे मरयां चे जिन्दा किता, मतलब की यीशुऐ जो, जड़ा सांझो परमेश्वरे दे ओंणे बाले गुस्से ला बचादां है।