गलातियों दे ना प्रेरित पौलुस दी चिठ्ठी
जानकारी
इसा चिठिया दिया शुरुआत ला ही गलातियां दे चर्चां च, पौलुस अपणे पाठकां जो दो गल्लां साफ करदा है: सै इक सच्चा प्रेरित है, कने उदा संदेश इकलोता सच्चा संदेश है। (अध्याय 1:1-2 10) ऐ गल्लां बड़ियां जरूरी थियां, क्योंकि कुछ लोकां दावा कितया था की पौलुस इक गलत संदेश सोगी प्रेरित है। पौलुसे इसा कलीसिया च शुभसमाचार दा प्रचार कितया था। पौलुस असल च इक सच्चा प्रेरित था, कने होर जातियां च शुभसमाचार दा प्रचार करणे दा मिशन परमेश्वरे उसयो दितया था। उनी उना लोकां दा मुकाबला करणे तांई लिखया, जिना सिखाया की अगर मसीही लोक खतना करांगे तां परमेश्वरे उना जो स्वीकार करणा। भरोसा ही इकलोता रस्ता बचया है। पौलुस जोर देईकरी बोलदा है की ऐ अब्राहम तांई पेहले ला ही सच था, जिसयो भरोसे ला परमेश्वरे दा बायदा मिलया था। कने पौलुसे उदे बारे च कोई शक नी छडया है की उदे अपणे भरोसे दा क्या मतलब है: मिंजो मसीह सोगी सूली पर चड़ाया है। मैं मरी गिया है, पर मसीह मिंजो च रेंदा है। कने मैं हुण परमेश्वरे दे पुत्रे पर भरोसा करिके जिन्दा है, जिनी मिंजो प्यार किता कने मेरे तांई अपणी जिन्दगी दिती (अध्याय 2:19-20)।
रूप रेखा
इक सच्चा प्रेरित कने सच्चा संदेश 1:1-10
परमेश्वरे पौलुसे जो प्रेरित बणाया 1:11-24
पौलुसे अपणे संदेशे दी रक्षा किती 2:1-21
भरोसा ही इकलोता रस्ता है बचाये जाणे दा 3:1-4 31
आत्मा कने प्रेम दे जरिये निर्देशित 5:1-6 10
आखरी चेतावनी 6:11-18
1
अभिवादन
1 मैं, पौलुस, तुहांजो ऐ चिठ्ठी लिखा दा है, कने मैं इक प्रेरित है, मिंजो प्रेरित होणे तांई कुनी खास समूह या कुनी माणुऐ नी चुणया, पर यीशु मसीह कने परमेश्वरे पिता दे जरिये चुणया है, जिनी यीशु मसीह जो मरयां चे जिन्दा किता। 2 कने मैं ऐ चिठ्ठी गलातिया प्रदेशे दिया सारिया कलीसिया जो उना सारे मसीह भाईयां दिया तरफा ला लिखा दा है जड़े मेरे सोगी न।
3 मैं प्राथना करदा है की साड़ा पिता परमेश्वर कने प्रभु यीशु मसीह तुहांजो अनुग्रह कने शांति दे। 4 साड़े पिता परमेश्वर दी इच्छा दे अनुसार यीशु मसीहे अपणे आपे जो साड़े पापां दिया बजा ने बलिदान करी दिता ताकि असां इस संसार दे लोकां दे बुरे प्रभाब ला बचाई सके। 5 मैं प्राथना करदा है की परमेश्वर दी महिमा युगां-युगां दीकर होंदी रे। आमीन।
सिर्फ इक ही शुभसमाचार है
6 मिंजो इसा गल्ला दी हेरानी होंदी है, जिनी परमेश्वरे तुहांजो मसीह दे अनुग्रह दे जरिये अपणे लोक होणे तांई सदया है, उसला तुसां इतणी जल्दी फिरी करी कुसी होर ही शिक्षा जो मनणा लगी पे। 7 पर सिर्फ इक ही सच्चा शुभसमाचार है, पर असल गल्ल ऐ है की कुछ लोक मसीह दे शुभसमाचार दी शिक्षा जो बिगाड़ना चांदे न कने उना लोकां ही तुहांजो भटकाई दिता है।
8 पर अगर असां चे कोई या स्वर्गदूतां चे कोई भी इस शुभसमाचार जो छडी करी जड़ा असां तुहांजो सुणाया है, कोई होर शिक्षा दा प्रचार करे तां, परमेश्वरे उसयो सजा देणी। 9 जियां असां पेहले ही बोलया है, तियां ही मैं हुण फिरी बोलदा है, की उस शुभसमाचार जो छडी करी जिसयो तुसां अपनाया है, कोई होर शिक्षा दा प्रचार करे तां, परमेश्वरे उसयो सजा देणी।
10 मैं पक्के तौर पर लोकां दी नी मंदा है पर परमेश्वरे दी मंदा है, मैं लोकां जो खुश करणे दी कोशिश नी करा दा है, पर परमेश्वरे जो खुश करणा चांदा है। अगर मैं हले दीकर माणुऐ जो खुश करदा रेंदा तां मैं मसीह दा सेवक नी होंदा।
पौलुस कियां प्रेरित बणया
11 हे मसीह भाईयो, मैं तुहांजो दसी दिन्दा हे की, जड़ा शुभसमाचार मैं सुणाया है, सै माणुऐ दा बणाया नी है। 12 क्योंकि मैं ऐ अपणे पूर्वजां या धार्मिक गुरुआं ला नी सिखया है, बल्कि खुद यीशु मसीहे शुभसमाचारे जो मिंजो पर प्रगट कितया है।
13-14 तुसां जाणदे न की मैं यहूदी धार्मिक नियमा दे अनुसार जिन्दगी जिन्दा था, तां मेरे मते साथी जड़े मेरिया उमरा दे थे, सै भी यहूदी नियमा दा पालन करदे थे, पर मैं उना सारयां ला जादा बदीकरी कने पुरे दिले ला अपणे पूर्वजां दे रीती रिबाजां जो मंदा था। कने उस बकत मैं यीशु मसीह पर भरोसा करणे बालयां जो सतांदा था कने उना जो मारणे दी कोशिश करदा रेंदा था।
15-16 पर तालू परमेश्वरे ऐ फेसला किता की अपणे पुत्रे जो मिंजो पर प्रकट करे, ताकि मैं होर जातियां बिच यीशु मसीह दा प्रचार करी सके। परमेश्वर ही है जिनी मिंजो मेरे पैदा होणे ला पेहले ही चुणी लिया कने अपणे अनुग्रह ने मिंजो अपणी सेबा तांई सदया। जालू यीशुऐ अपणे आप जो मिंजो पर प्रगट किता, तालू मैं सलाह लेणे तांई कुसी बाल नी गिया, 17 कने ना ही जड़े मिंजो ला पेहले प्रेरित थे, उना जो मिलणे तांई यरूशलेम गिया, पर झट अरब नाऐ दे इलाके जो चली गिया, कने फिरी ओथु ला दमिश्क शेहरे च दुबारा बापिस आई गिया।
18 फिरी तिन्ना सालां बाद मैं पतरसे ने मिलणे तांई यरूशलेम शेहरे जो आया, कने उदे बाल पन्दरा रोज रिया। 19 कने मैं प्रभु यीशु दे भाई याकूब जो छडी करी कने कुसी भी होर प्रेरिते ने नी मिल्ला। 20 परमेश्वर मेरा गबाह है की तुहांजो जड़ियां गल्लां मैं लिखदा है, उस च कुछ भी झूठ नी है।
21 यरूशलेम शेहरे च मैं उना प्रेरितां ला मिलणे बाद सीरिया कने किलिकिया प्रदेशां च आया। 22 पर यहूदिया प्रदेशे च मसीह पर भरोसा करणे बाले लोकां मिंजो कदी नी दिखया था। 23 पर उना भरोसा करणे बालयां मेरे बारे च ऐई सुणाया था, की जड़ा पेहले सांझो मसीह पर भरोसा करणे ने सतांदा था, सै हुण इसी भरोसे दा प्रचार करदा है, इसला पेहले सै उना लोकां जो मारणे दी कोशिश करदा था जड़े मसीह पर भरोसा करदे थे। 24 इस तांई सै परमेश्वरे दी महिमा करदे न क्योंकि उनी मिंजो इक सतांणे बाले ला मसीह दा इक चेला बणाई दिता।