1 Yisu Kilisibek Mesiya Anotogo yawe pigi yongkambanuwili yaliya wazayagi pura miziweki sawiyabek purikki ngizi panu kumulibok Anotogo wik keremizabek, legi pilikpok Anotogi marekpek. Logo Peba Anotoyegi kelibok Anotogi yango keya marekngangwiliyegirau kelibokko. 2 Keli inigi Anotoyegi pura keya ngago pugurago miziweki kaiyengki kerewiyi purikku keli inigi pigi yango keya marekngangwiliyegi pura talik miza purik walimizagi. 3 Anotoyegi keli kai purik taliktikki kai, purik ngago pugurago miziweki kai piyeng mizagirikki kai yagenda logo keriyiwekkerik purik yawe yemane mizagirik ono. 4 Purik Anotogo wik keremiza logo pigi yango keya marekngang puwiliyegirik kazing namek wizinda logo pumokkirik Yisuyegi ngizi kumulirikku puwili ngabelakpekke pelege kaileyeng keya kaileyengki kelimok ulagi. 5 Takko ngabelakpekke kaile piyengki kozanda ulagi langai? Yisu Anotogi Marek panubek purikki ngizi panu kumuli pilikpokko pilik mizagi langai.

6 Keya Yisu kayimabok Anotogi Marekpek purik teni iwaka, purik Yisu kaimelawekke Anotogo paka ngilumbekka langai pilik kaiya keya ngereke pi ibengwekke miza ngizige pelik kaiya, ei pilik kaiyarik kaimelagi puwekke keke kaiya ono kapura ibengwekkeriktau pilik kaiya. Keya Kung Walek wameiktagi mangobokkorau pilik kaiya. 7 Tegi kili neyauganarago pelik kaiya, 8 Kili Kung Walek yenge ya tonuguyengki yungke yolubokkirago keya Kilisi kaimelawekke kili paka ngilumbekka purago keya kili Kilisi ibengkine kaiya purago kaiya. Logo kili piyeng mabiyengko kisirik Yisu Kilisi Anotogi Marekpek kisi. 9 Yombanu ngagozak tonuguyengki ngago puwili kiling miza wizigeya puwiligu iwakayengki kozak kisi puwiliyegi tonugu ngizi kumuli. Tegi teni Anoto yombanuwiliyaga lewegebokko kozak kai piyengki teni ngizi kumuliweki purik pugu kai piyeng wameik panuyengko logo pugu kaiyarik Yisu pigi Marekpek. 10 Tegi yombanu Yisu Anotogi Marekpekyegi ngizi kumulibok ya puguraga Yisu Anotogi Marekpek purik pugu wameik mizara wizinda. Tamizeige nak puragi wameik mizi onobok, pilikpok Anotoyegi ikuyogorik kaibek mei yagenda purik Anotogo Yisu pigi Marekpek kai purikki pi ngizi kumuli ono kopong kai yagenda. 11 Peragi Anotogo pelik kaiya, Pugu teni wik koyimagira yana logo wik koyimagi puragi solorik pigi Marekpek. 12 Tegi yombanu Anotogi Marekpek pigi yungke yolubok piyegi wik wizagomagirarau wizinda keya yombanu Anotogi Marekpek piyegi onobok wik wizagomagi purarau piyegi ono.

13 Ini Anotogi Marekpekyegi ngizi kumuli puwili weik teni wik koyimagira kiling mamiziweki ne iniyegi perik lende mizi. 14 Keya teni pobilik purikki iwakagi purik tonugu pi kiling sawela purikka tamizeige teni Anotoyegi watabi nayengki nguk meiya logo watabi piyeng pugurau keliyeng purik tonugu nguk mei piyengki pugu kerewiyi yagenda mizi. 15 Keya tamizeige tonugu ngizi kumularik tonugu nguk mei piyengki pi kerewiyi mabura mabilik tonugu nguk mei piyeng teni yanagi purikkirau ngizi kumuli.

16 Tamizeige ini kiling Yisuyegi ngizi kumuli nak kaile kazing pi kemenak ibeng wizagomagi puragi miza orowei kunagi ono lewengke miza purik mabura ini Anotogo kaile pugu miza pura tumula melibene nguk meizo logo purik Anotogo pilikpokyegi wik wizagomagira managi purik tamizeige pugu kaile kemenak ibeng wizagomagi puragi miza orowei kunagi nara miza ono purik. Kapura kaile yombanuwili kemenak ibeng koyimagi puragi iza orowei kunagi nara wizinda logo tamizeige pi kaile pura miza mabura ini weik mawinda pilikpokki waberek mizagi nariktau ono. 17 Kazing pangka ono yombanuwiligu mizi piyeng mabiyeng kaileyengko kapura kaile yombanuwili kemenak ibeng koyimagi puragi iza orowei kunagi ono nara wizinda, logo pugu kaile pura miza mabura pigi waberek mizizo.

18 Anotogi marekngangwili kaileyeng mawiyengka mizi onowili purik teni iwaka purik Anotogi Marekpokko puwili waberek iza wara yolu logo Sadangko puwili ngangang keleyagi ono.

19 Ngabelakpekke nazuwaga yolu puwiliyegi Sadangko ngai kele kapura teni Anotogiwili purik teni iwaka.

20 Anotogi Marekpokko kanda teniyegi kangka wazono tonugu Anoto wameik panubekyegi iwakagibek yana. Logo teni weik Anoto wameik panubekki yungke koyinda purik teni pigi Marekpek Yisu Kilisigi yungke koyinda legi. Pi Anoto wameik panubek keya wik koyimagiragi mangobek.

21 Ini negi yango keya marekngangwili nobiyeng mizi puwili anoto ikuyogorik puwiliyaga koweige panu koyizo.

Wameik panu.

Ne Yowan kapiya perik lende mizabek.