1 Ne Paulu iniyegi ne lewarik kele kuneng mabiyeng pangka pangka mizibene kelegele yei. Keya ne Kilisi ngezebokko mizagelikmekke yelakkelek yei. Kapura iniyaga nawili ngoluk pelik kisi, Paulu koweige puwekkerik kapiya puguyengke ngagoyeng kozang kai kapura pi kanda pelege puwekkerik pi ngagoyeng kozang kaiyagirikki kazi, kisi. 2 Ne pulogo lewagela puwekke nerau mak kozang sara wizimowei yamek nangeli mizibek purikki waligeleyiweki miza nagani. Ini neyegi ne ngizi kumuli onowiligu mizilik korikwekko keliyeng mizibek kisi puwiliyegi nogo yamek nangeli wizimowei keleyagi sawiya pobura miza nelegi ne kiyebuk.

3 Ne ngizi kumuli onowiligi tepekke yolu kisi purik wameik kapura ne ngizi kumuli onowiligu kazing miziyeng weiya logo kaileyeng neneng ngeli ono. 4 Nogo watabi weiya logo kaileyeng neneng ngeliweki mizi piyeng ngizi kumuli ono puwiligi watabiyeng ono kapura ne Anotogi watabi kozanda kilingyeng weiya logo piyengko Sadangko ngai yolu piyeng neneng ngeli. 5 Anotogi watabiyeng ngalik kela yongomo mizi piyeng ngela meliyeng keya Anotoyegi lewege miziweki kisi piyeng kawiye walibene keleyiyeng keya Kilisi keriya nelegi lemeng wezamek ula wazamiya piyendau. Logo watabi piyengki nagerewiyi mizi puwili kebangkela logo Anotoyegi nogo iza orowei yogi logo ya puwiligiyeng kowita wizigeya ngereke yombanu Kilisigu kairagi kerewiyiweki keliwili miziweki. 6 Kapura were inuwago neyegi inuwa Kilisigu kaiyengki kerewiyiwili miziweki pulaga tonuwago nagerewiyi mizara yolu puwiliyegi ngangang yanirik kele.

7 Inuwago neyegi pakelarik ne kozandarau onobek mizi purik inuwa yeik yeke ngalege maburikki pakela kopong kapura inuwagorau yenge negi yungke lemengki pakela ono. Logo tamizeige inuwayaga nakko pi Kilisigibek kai mabura yeik ngezebekyegi langai mawinda kumuli pani purik pugu pi Kilisigibek kai mabilik nerau mabilik wizinda legi. 8 Logo keriyiwekkerik neyegi Anotogo inigi ngizi kumulira kozang kelemiweki pangka nana puragi lewege kaiya meli nobiyeng mizagi kapura purikku ini ngangang yanagi ono yeik iniyegi saweliwekirikku kapura wameiktago ne ne makngezeyegi langai kai pera wameik mamizi nangine logo ne lewege kaiya meli purikki ne kendek ono. 9 Kapura kapiya nogo lende miziyengko ini kazi mizibene keleyagirikki ne kiyebuk.

10 Purik nawiligu pelik kisi, Paulugu kapiya miza meliyengkirik ngagoyeng kozang keya kunengke kapura pi teni kilingwekke purik pi kozang ono keya ngago pugu kaiyeng yeik ulak kaiya meli, kisi. 11 Legi pilik puwiliyegi yei mabura ne pulogo onowekke kapiyayengki lende mizi piyeng ne pulogowekke inigi wirege ngizi mizagiyeng kani yei.

12 Wameik, nogorau ne yombanu mabek ngezewiliyegi langai puwili yombiyangaiwili kisi puwili kelikpek kaiyagi ono. Puwili kangkayendau onowili. Purik puwili nakko nakyegi keriya koyimowei pi pilikpek keya ne pilikpek mizi, logo kangka ngezewiligiyengki kiriwei. 13 Kapura neyegirik ne Anotogorau nana onoragi langai lewege kaiyagi ono kapura pangka inuwayegi sawelagiragi kele nogo lewege kaiyagi. Anotogo wale nana purikki pangka keke ne lewege kaiyagi logo puragi yungke negi yawe inigi tepekke mizageya purarau wiziyagi.

14 Ne Anotogo pangka nana puragi pangka yawe mizi kapura ne inuwayegi pangkara kiling purik nogo solo panu inuwayegi ngago Kilisiyegi langai Kilisi yombanu yaliya wazayibek kai pura orowei kayima legi. 15 Keya Anotogo ne pangka nani puraga yeke ngalege nararau nogo mizi ono logo nawiligu miza piyengki ne lewege kai ono legi. Segeya ngizi kumuli inigi puraga ini yemane sagi purikki nogo wilekpek keya ngai yuke yolu keya inuwagi tepekke yawe yemane nara mizagi purikki. Logo wok mabiyeng pilik mizagi purik Anotogo ne pangka nana puragi pangka yawe mizagi. 16 Pulaga yereng nayengkerau Kilisigu yombanu yaliya wazayi puragi ne kozak kaiweki, wale nawiligurau yawe mizi ono piyengke. Pulaga nogo miza wezalik ne nawiligu mizaragi lewege kai kisagi ono. 17 Kapura Anotogi Kapiya Walektikku kai pelik,