3
चोशा चढ़ेशो
1 मिनु इस्राएली आंम आन गाउं गाउंमी नेल्ल गारपा बाक्ने थुम्शो बाक्तेक्म। आन बाक्शो ७ महिना दुम नोले मुर नेल्ल थुं का ङा दुम्शा, यरूसलेममी बुक्तेक्म। 2 मेना योसादाक आ तौ येशुआ नु मेको आ वारच चढ़ेब, शाल्तीएल आ तौ जेरूब-बाबेल नु मेको आ खिं ङा मुर नेल्लेमी इस्राएली आन परमप्रभु कली चढ़ेतीके सेल्तेक्म। परमप्रभु आ मुर मोसामी आ अरेशो लोव़म दोपा ब्रेक्शो बाक्मे, मोपा चोशा चढ़ेचा कली मेको चढ़ेतीक सेल्तेक्म। एज्रा २:२; प्रस्थान २७:१; लेवी ६:२ 3 मेकोपुकीमी चढ़ेतीक ङोंइती ते बाक्मे मेकेर लेंशा चढ़ेतीक सेल्तेक्म। मारदे हना मेको आन एर ओंथ ङा अर्को जात ङा मुर आन कली तशा हिंशा, सुनी नु नाक्नाक्दो परमप्रभु यावे कली चढ़ेतीकेम चोशा चढ़ेतीक चढ़ेम्तेक्म।
4 मिनु मेकोपुकीमी गोठ सेल्शा बाक्तीक चाड मानेम्तेक्म। मिनु दोपा पतीके ब्रेक्शो बाक्मे, मोपा नाक्त किंत किंत ङा पचा माल्शो चोशा चढ़ेतीके दोशो चढ़ेचा माल्मा, मोशो चढ़ेम्तेक्म। लेवी २३:३४-४३ 5 मिनु नाक्त किंत किंत ङा चोशा चढ़ेतीके, औंसी नाक्त ङा चढ़ेतीके नु परमप्रभु यावेमी देंशो चाड ङा चढ़ेतीके चढ़ेम्तेक्म। सु सुमी आन ग्येरशो थुं रे परमप्रभु यावे कली चढ़ेचा दाक्तमे, मेको चढ़ेम्तेक्म। 6 मिनु परमप्रभु यावे आ खिं ङा जग मवोइश्शो बाक्त हना यो, ७ महिना ङा ङोंइती ङा नाक्त रे परमप्रभु यावे कली चोशा चढ़ेतीक चढ़ेचा गोम्तेक्म।
7 मिनु मेकोपुकीमी गारो प्रोव़ब नु शी के गेय पाइब आन कली क्येट गेम्तेक्म। मिनु पारसी ङा पिप कोरेसमी देंशो खोदेंशो पा सीदोन नु टायर ङा मुर आन कली लेबानोन ङा लाइश्शो रवा आ शी समुन्द्र रे पा योप्पा सम्म चाक्चा कली जचा तूचा थोव़क नु तेल गेम्तीमी। १राजा ५:१६-२५
परमप्रभु आ खिं लेंशा सेल्शो
8 मिनु मुरपुकी यरूसलेममी बाक्शो परमप्रभु आ खिं जाक्शो बर्स निक्शी नु महिना निक्शी दुम्माक्त। मिनु शाल्तीएल आ तौ जेरूब-बाबेल, योसादाक आ तौ येशुआ नु मेको आस लीशो लोक्ब, चढ़ेबपुकी, लेवीपुकी नु बेबीलोन रे लेश्शा यरूसलेम जाक्ब नेल्लेमी परमप्रभु आ खिं लेंशा सेल्चा गोम्तेक्म। मिनु परमप्रभु यावे आ खिं सेल्तीक गेय कोव़चा कली २० बर्स जाक्दीश्शो नु मेको क्येङा लाक्शो लेवी आन कली योव़शा वोइक्तीमी। 9 मिनु परमप्रभु आ खिं सेल्तीक गेय पाइब आन कली कोव़ब येशुआ नु आ तौपुकी नु आ लोक्ब, कदमीएल नु आ तौपुकी, बिन्नुइ नु होदावीयाह नु हेनादाद आ तौपुकी नु लेवी आन तौ नु खिं ङा मुर नेल्ल गेय पाइब आन कली कोव़ब दुम्तेक्म।
परमप्रभु आ खिं ङा जग
10 मिनु परमप्रभु यावे आ खिं सेल्बपुकीमी जग वोइक्तेक्म। चढ़ेबमी आन वा फेक्शा तुराही ताप्तेक्म। आसाफ आ तौ लेवीपुकीम बुप्केल ताप्तेक्म। इस्राएल ङा पिप दाऊदमी अरेशो खोदेंशो पा परमप्रभु यावे कली ठेयब सेल्चा कली आन आन बाक्तीकेमी राप्तेक्म। 11 मिनु मेकोपुकीमी पालो पालो पा कुम्सो पाम्तेक्म। परमप्रभु यावे कली ठेयब सेल्ना सेल्न “गे रिम्शो पाइब बाक्नीनी” दे मान पा कुम्सो पाम्तेक्म। मेकोपुकीमी “परमप्रभु यावे रिम्शो पाइब बाक्ब, नु आ गेना हना यो दाक्तीक इस्राएली नु लीब” दे कुम्सो पाम्तेक्म। परमप्रभु यावे आ खिं ङा जग वोइश्शो बाक्तीके मुर नेल्लेमी ठेयब सेंदा पा परमप्रभु यावे कली ठेयब सेल्तेक्म। २इतिहास ५:१३; भजन संग्रह ११८:१
12 परमप्रभु यावे आ ङोंइती ङा खिं तशो चढ़ेबपुकी, लेवीपुकी नु आन खिं खिं ङा ठेयब मुर नु अरु खाल्पापुकी परमप्रभु यावे आ खिं ङा जग वोइश्शो तशा, ठेयब सेंदा पा ङाक्तेक्म। मिनु अरु मुर चहिं ग्येरशा ठेयब सेंदामी रेयके पाम्तेक्म। हाग्गै २:३ 13 मिनु नेंब मुरपुकीमी ग्येरशा ग्रीशो नु ङाक्शो मार बाक्मे मारेइ मरुबेम। मारदे हना मुर आन रेयके पशो सेंदा थम ठेयब बाक्त। मेको रेयके पशो ङोन ङोन सम्म नेंसे बाक्त।