1 मिनु मेको नेल्‍ल पने थुम्‍शो नोले का निक्‍शी योव़चा पुंइसीशो मुरपुकी आं बाक्‍तीकेम जाक्‍शा “इस्राएल ङा मुरपुकी, चढ़ेब नु लेवीपुकीमी, कनानी हित्ती, परिज्‍जी, यबुसी, अम्‍मोनी, मोआबी, इजीप्‍ती नु एमोरी आन ग्रांग्रा दि‍शो गेय रे ङोन मदुम्‍शो बाक्‍नीम। 2 मेकोपुकीमी मेको आन तमी आंम कली नु आन तौ आन कली मीश चाक्‍शो बाक्‍तेक्‍म। मोदेंशो पा परमप्रभु आ आंम मुरपुकी अर्को रागी ङा मुरपुकी नु खाल्‍साक्‍म। मिनु योव़चा पुंइसीशो ठेयब मुर नु सासन पाइब आन परमप्रभु आ देंशो मपथु, शुश दोस ताइब बाक्‍नीम” देंतेक्‍म। ब्‍यवस्‍था ७:३; ब्‍यवस्‍था २३:३; गन्‍ती ११:१७-२५; नेहेम्‍याह १३:२३ 3 मिनु गो मेको लोव़ नेंशा आं फेक्‍शो वा खाक्‍ता। आं चां नु गल शोक्रे तुल्‍ता। मारेइ लोव़ पने मचाप्‍थु, सिक्‍सी पा बाक्‍ती। 4 मेको ग्‍याइश्‍शा लाइक्‍चा पुंइसीब आन मरिम्‍शो पतीके आ पर्बम इस्राएली आन परमप्रभु आ लोव़ कली मान पा हिंबपुकी आं बाक्‍तीकेम एर ओंथ बुक्‍तेक्‍म। मेकेर रे गो नाक्‍दो ङा चढ़ेतीक सम्‍म मारेइ लोव़ पने मचाप्‍थु, सिक्‍सी पा बाक्‍ती।

5 मिनु नाक्‍दो ङा चढ़ेतीक दुम्‍मेनु, आं खाक्‍शो वा फेक्‍शा, गो पोक्‍च थेक्‍शा, आं गुइ परमप्रभु यावे, आं परमप्रभु गे दिंशा 6 “आं परमप्रभु, गो इन कली आं कुल कोंइचा थाम्‍पा मुने पाता। मारदे हना आंइ मरिम्‍शो पतीके आंइ पिया क्‍येङा यो लाक्‍शो बाक्‍ब। मिनु आंइ दोस सरीङ सम्‍म जाक्‍दीशो बाक्‍ब। दानीएल ९:७-८ 7 गो आंइ किकी पिपी रे मुलाक्‍त ङा नाक्‍त सम्‍म आंइ दोस थम ठेयब बाक्‍ब। आंइ काइ मरिम्‍शो पतीके आंइ पिप नु चढ़ेबपुकी अर्को रागी ङा पिप आन गुइमी साइक्‍चा, चोक्‍चा, मारेइ मारेइ रोइक्‍चा पुंइसीचा नु शुश मुने तोक्‍चा पुंइसाक्‍म। मिनु गोपुकी यो सिनाक्‍त मुलाक्‍त मोदेंशो दुम्‍शो बाक्‍नीकी। 8 तन्‍न मुल परमप्रभु यावे, आंइ परमप्रभुमी आंइ कली का निक्‍शी लीशो मुर गेतीनी। आंइ वाइल दुम्‍तीक रे इच्‍का नाक्‍त कली नाइक्‍चा गेतीके आंइ परमप्रभु आ बाक्‍तीकेमी बाक्‍चा ताइतक। याम का कली आंइ कली शिशी पा ग्‍येरपाइक्‍तीनी। 9 गो वाइलीम वाइल बाक्‍तक हना यो, आंइ परमप्रभुमी आंइ कली मप्रोंइशो बाक्‍ब। पारसी रागी ङा पिप आ ङोंइती इन गेना हना यो दाक्‍तीके कोंइशो बाक्‍तीनी। आंइ कली नक ब्रोंइचा गेशा, आंइ परमप्रभु आ खिं लेंशा सेल्‍चा कली नु ब्रेश्‍शो नेल्‍ल लेंशा सेल्‍चा कली नु यहूदा नु यरूसलेम एर ओंथ गारो प्रोव़चा गेतीनी।

10 मोदेंशो बाक्‍त हना यो, आंइ परमप्रभु, मुल गो मार देंने चाप्‍नीकी? गोपुकीमी इन शेंशो मटिथु, प्रोंइतक। 11 गे इन लोव़ पाइब रे मार लोव़ पपाइक्‍तीनी देंशा हना ‘इन के सेल्‍चा कली ओव़शो रागी ग्रांग्रा दि‍शो बाक्‍त। मारदे हना मेको रागी ङा मुर आन ग्रांग्रा दित्‍चा ङा गेयमी मेको रागी ङा कुना कुना नेल्‍ल ब्रीशो बाक्‍त। लेवी १८:२४-२५ 12 मोपतीके गेपुकीमी इन तमी मेको आन तौ आन कली ग्‍युंबे पा मगेन। इन तौ आन कली मेको आन तमी नु ग्‍युं‍बे पा मचाक्‍कीन। मिनु गेपुकीमी मेको आन कली रिम्‍शो दुम्‍चा नु दारचा कली वारच मपने। मोपा गेपुकी शुश बोल्‍यो दुम्‍शा, मेको रागी ङा रिम्‍शो थोव़क जचा ताइ‍नीनी। मिनु गे मेको रागी इन चच युइ आन कली गेना हना यो आन के दुम्‍पाइश्‍शा वोइक्‍नीनी’ दे लोव़ पपाइक्‍तीनी। 13 गोपुकीमी आंइ मरिम्‍शो पतीके नु आंइ ठेयब दोस आ पर्बम श्‍येत जशो बाक्‍तक। मो हना यो आंइ परमप्रभुमी आंइ तचा माल्‍शो क्‍येङा इच्‍का ला सजाइ गेतीनी। मिनु आंइ कली ब्रोंइचा गेतीनी। 14 गो लेंशा इन शेंशो लोव़ मटिथु, मेको ग्रांग्रा दिशो गेय पाइब नु ग्‍युं‍बे पाइनीकी ङा? गे गोपुकी नु चुरशा, आंइ कली मसाइक्‍नीनी ङा? मिनु ब्रोंइशा बाक्‍ब सुइ मलीब। 15 परमप्रभु यावे, इस्राएली आन परमप्रभु गे ठीक पाइब बाक्‍नीनी। मुल गो इच्‍का खोइ लीशो बाक्‍नीक। गो आंइ मरिम्‍शो पतीकेमी इन ङोंइती बाक्‍नीकी। मो हना यो गो इन ङोंइती पिया पोक्‍ने मचाप्‍नीकी” देंती।