1 मिनु बर्स निक्‍शी नोले फाराओमी ङोमु निक्‍शी तवा बाक्‍त। मिनु ङोमुमी मार तवा बाक्‍त देंशा हना, आंम कली नील खोला आ नेक्‍थान राप्‍शा बाक्‍शो तवा बाक्‍त। 2 मिनु नील खोला रे ७ ओटा दारशो दोम्‍शो बी ग्रूशो तवा बाक्‍त। मेको बीपुकीमी बुदी मीलु घांस ब्‍वामे बाक्‍त। 3 मिनु नोले नील खोला रे ७ ओटा अर्को काइ मदारशो ग्‍येंशो बी ग्रूशो तवा बाक्‍त। मिनु मेकोपुकी अर्को बी नु नील खोला आ नेक्‍था राप्‍शा बाक्‍मा बाक्‍त। 4 मिनु काइ मदारशो ग्‍येंशो बीपुकीमी दारशो दोम्‍शो बी आन कली ब्‍वामे बाक्‍त। नोले फाराओ सेंसे बाक्‍त। 5 मिनु फाराओ लेंशा निन्‍द्रा पवानु, लेंशा अर्को ङोमु तवा बाक्‍त। मार तवा बाक्‍त देंशा हना, चेरब बोट कामी शुश आख पाइश्‍शो ७ ओटा ग्रेल्‍शो बाला सिश्‍शो तवा बाक्‍त। 6 मिनु नोले पूर्ब ङा फशेम बुश सेल्‍शो ७ ओटा सोप्‍पीक्‍च आइक्‍च बाला तवा बाक्‍त। 7 मिनु मेको आइक्‍च बालामी मेको शुश आख पाइश्‍शो ७ ओटा बाला आन कली दाक्‍ग्‍मे बाक्‍त। नोले फाराओ सेंशा, आ ङोमु तशो तुइक्‍ता बाक्‍त। 8 मिनु आ थुं मनुथु सुनी कना इजीप्‍त ङा जादू पाइब नु जोक्‍ब तुइक्‍ब नेल्‍ल आन कली ब्रेत्‍थ सोइक्‍तीमी बाक्‍त। मेको जाक्‍मानु, आ ङोमु मेको आन कली शेंदीमी बाक्‍त। तन्‍न सुइमी फाराओ कली मेको ङोमु आस अर्थ देंने मचाप्‍मे बाक्‍त। दानीएल २:३

9 मिनु फाराओ कली तूचा गेब आन ठेयब मुरुमी आ पिप कली “मुलाक्‍ती आं मरिम्‍शो पशो मिम्‍ताक्‍ङ। 10 फाराओमी आ गेय पाइब आस पर्बम चुरमेनु, गो नु शोब्‍ले चोइब आन ठेयब मुर नेल्‍ल क्‍येङा ठेयब गेय पाइब आ जेल्‍खानम चोक्‍सीशा बाक्‍स्‍कुनु, 11 गो निक्‍शीम काबु नाक्‍दो ङोमु ताइतस्‍कु। मेको ङोमु निक्‍शी के अर्थ निक्‍शी बाक्‍सा बाक्‍त। 12 मेना हिब्रू रागी ङा ठिटा का यो जेल्‍खानम बाक्‍त। मेको इन नेल्‍ल क्‍येङा ठेयब गेय पाइब आ गेय पाइब बाक्‍त। गो निक्‍शीमी तशो ङोमु मेको कली माइक्‍स्‍कुनु, योसेफमी ङोमु आ अर्थ नेल्‍ल आंस कली शेंताक्‍स्‍की। आं तशो ङोमु आ अर्थ शेंताक्‍यी। मिनु अर्को मुर आ तशो ङोमु आ अर्थ यो शेंताक्‍व। 13 दोदेंशो पा शेंदा, मोदेंशोन दुम्‍त। आं गेय आं कली लेंशा गेतीनी। अर्को कली चहिं क्‍याइश्‍शा साइक्‍तेक्‍म” देंमाक्‍त।

14 मिनु फाराओमी योसेफ कली ब्रथ सोइक्‍ता बाक्‍त। मेकोपुकीमी योसेफ कली रीब पा जेल्‍खान रे ग्रुंइपदमे बाक्‍त। योसेफ कली चां प्रेक्‍शा, नक वा फेक्‍पा, फाराओ आ बाक्‍तीके चाक्‍ग्‍मे बाक्‍त। 15 मिनु फाराओमी योसेफ कली “गो ङोमु निक्‍शी ताता। सुइमी मेको आस अर्थ शेंने मचबेम। मिनु गो इ पर्बम लोव़ नेंता। गे मुर आन तशो ङोमु आ अर्थ शेंने चाप्‍नेवे ने” देंमाक्‍त। 16 मिनु योसेफमी फाराओ कली “गो ङोमु ङा लोव़ मतुइक्‍नुङ। परमप्रभुमी फाराओ कली थमा पा थुं नाइक्‍चा ङा लोव़ तुइक्‍पाइक्‍ब” देंमाक्‍त। उत्‍पत्ती ४०:८ 17 मिनु फाराओमी “गो आं ङोमुमी नील खोला आ नेक्‍था बाक्‍ती। 18 मिनु नील खोला रे ७ ओटा दारशो दोम्‍शो बी ग्रूतेक्‍म। मिनु बुदी मीलु घांस ब्‍वाम्‍तेक्‍म। 19 मिनु नोले ७ ओटा मदारशो ग्येंशो बी ग्रूतेक्‍म। गो इजीप्‍त रागी नेल्‍लेमी मोदेंशो मदारशो बी गेनायो मतङमी। 20 मिनु मदारशो गेयशो बीपुकीमी ङोंइती ग्रूशो दोम्‍शो बी आन कली ब्‍वाम्‍तेक्‍म। 21 मिनु मेको आन कली ब्‍वशा यो, गेयशो बी मदोम्‍म। ङोंइती ङा खोदेंशो पा गेयस ङा गेयस बाक्‍तेक्‍म। बी ब्‍वाम्‍तेक्‍म, दे सुइमी थमा मसुदेम। मिनु नोले गो सेंसाक्‍यी। 22 मिनु लेंशा इप्‍ती। मिनु ङोमु तङानु, चेरब बोट का रे ७ ओटा ठेयब रिम्‍शो बाला पाइश्‍शो तातामी। 23 मिनु नोले अर्को बोट रे ७ ओटा पूर्ब ङा फशेम सोव़शो इम्‍चीली सोप्‍पीक्‍च बाला ताता। 24 मिनु इम्‍चीली सोप्‍पीक्‍च बालापुकीमी मेको ७ ओटा रिम्‍शो बाला आन कली दाक्‍तेक्‍म। गो एको आं ङोमु जादू पाइब आन कली माइक्‍तामी। मेकोपुकीम एको ङोमुमी मार दुम्बा, दे देंने मचबेम” दे योसेफ कली देंमाक्‍त। 25 मिनु योसेफमी फाराओ कली “इन ङोमु निम्‍फा कांइचीक खोदेंशो बाक्‍ब। परमप्रभुमी मार पचशो बाक्‍मे, मेको इन कली ङोमुमी कोंइताक्‍व। 26 मेको ७ ओटा रिम्‍शो बी ७ ओटा बर्स बाक्‍नीम। मिनु मेको ७ ओटा रिम्‍शो बाला यो ७ बर्स बाक्‍नीम। ङोमु निक्‍शी कांइचीक खोदेंशो बाक्‍नीस। 27 मिनु मेको आ नोले ग्रूशो ७ ओटा ग्‍येंशो बीपुकी ७ ओटा बर्स बाक्‍नीम। मिनु मेको ७ ओटा गेडा मसिश्‍शो, पूर्ब ङा फशेम सोव़शो सोप्‍पीक्‍च बाला यो ७ ओटा बर्स बाक्‍नीम। मेको ७ बर्स ङा अन्‍काल बाक्‍नीम। 28 आं देंशो मार बाक्‍ब देंशा हना, परमप्रभुमी मार पचा चिक्‍शो बाक्‍मे, मेको इन कली कोंइताक्‍व। मोदेंशो बाक्‍ब। 29 नेनीन, इजीप्‍त रागी नेल्‍लेमी ७ बर्स सम्‍म शुश बाली नाली ग्रेल्‍शा, रिम्‍शो बर्स दुम्‍चा चिक्‍शो बाक्‍नीम। 30 मिनु आ नोले ७ बर्स सम्‍म अन्‍काल दुम्‍ब। मिनु मेको मरिम्‍शो ७ बर्सम इजीप्‍त रागीमी अन्‍न ग्रेल्‍शो नेल्‍ल प्रेंनीम। मिनु मेको अन्‍कालमी रागी कली थुम्‍पाइक्‍ब। 31 मिनु मेको ठेयब अन्‍काल दुम्‍शा, ङोंइती अन्‍न ग्रेल्‍शो बर्स नेल्‍लेमी प्रेंनीम। मारदे हना मेको अन्‍काल शुश श्‍येत ङा बाक्‍ब। 32 मिनु इन ङोमु निक्‍शी खेयप ताइतीनी, मेको आ अर्थ मार बाक्‍ब देंशा हना, परमप्रभुमी मेको थमा पा पाइब नु पचा चिक्‍शो बाक्‍ब। 33 मोपतीके फाराओमी निप्‍स पाइश्‍शो मुर का इजीप्‍त रागी ङा ठेयब मुर सेलीन। 34 मिनु आं देंशो पशा, कोव़ब मुरपुकी यो वोइक्‍चा माल्‍नीनी। मेकोपुकीमी फाराओ आ सासनमी रिम्‍शो ७ बर्सम इन रागी नेल्‍ल रे अन्‍न ५ भाग तिरो पोक्‍चा माल्‍नीम। 35 मेको रिम्‍शो बर्स ङा अन्‍न खुप्‍शा, अन्‍काल ङा बर्सम सहर ङा मुर आन कली थुल्‍चा कली उप्‍शा वोइक्‍चा माल्‍नीम। 36 मेको उप्‍शा वोइश्‍शो अन्‍न इजीप्‍त रागीमी अन्‍काल मदुम सम्‍म उप्‍चा माल्‍ब। मोपा वोइश्‍शोनु, अन्‍कालमी मबेक्‍नीम” दे योसेफमी फाराओ कली मदा बाक्‍त।

37 मिनु फाराओ नु आ गेय पाइब नेल्‍लेमी “योसेफ आ देंशो लोव़ रिम्‍शो बाक्‍ब” दे मिम्‍तमे बाक्‍त। हितोपदेस १४:३५ 38 मिनु फाराओम आ गेय पाइब आन कली “गो योसेफ खोदेंशो मुर अर्को सु थिन्‍ने चाप्‍नया ङा? परमप्रभु आ सोक्‍तीम ब्रीशो मुर का थिन्‍ने चाप्‍नया ङा?” दे हिल्‍लो पामी बाक्‍त। प्रस्‍थान ३१:३; हितोपदेस २:६ 39 मिनु फाराओमी योसेफ कली “परमप्रभुमी मेको नेल्‍ल इ कली तुइक्‍पाइक्‍तु। इ खोदेंशो जोक्‍ब तुइक्‍ब मुर सुइ मथिंसीब। 40 इ कली आं रागी ङा मुर आन कली हुकुम पाइब सेल्‍नन। इ देंशो लोव़ मुर नेल्‍लेमी टिचा माल्‍नीम। गे आं सरकार ङा गेय पाइब नेल्‍ल आन क्‍येङा ठेयब मुर दुम्‍नीनी। गो सिरपेचम पतीके ला इ क्‍येङा ठेयब बाक्‍नुङ। भजन संग्रह ११३:७ 41 नेनीन, गो इ कली इजीप्‍त रागी नेल्‍ल ङा ठेयब मुर सेल्‍नन्‍नी” देंमाक्‍त। प्रेरित ७:१०

42 मिनु फाराओम आ छाप क्‍येप्‍तीक औंठी आ ब्रेप्‍चो रे प्रुइश्‍शा, योसेफ आ ब्रेप्‍चोम लिक्‍ता बाक्‍त। मिनु योसेफ कली दारशो बुश वा फेक्‍पाइश्‍शा, सुन के माला रेल्‍दा बाक्‍त। एस्‍तर ३:३०; दानीएल ५:२९ 43 मिनु फाराओमी योसेफ कली आ नोले ङा बग्‍गीमी ङोइक्‍पदा बाक्‍त। मिनु योसेफ आ ङोंइती बाक्‍बपुकीमी “योसेफ आ ङोंइती पोक्‍च थेक्‍शा, सेउ पने” दे ब्रेम्‍मा बाक्‍त। मोपा इजीप्‍त रागी ङा हुकुम पाइब सेला बाक्‍त। एस्‍तर १०:३ 44 मिनु फाराओमी “गो फाराओ नङ। इजीप्‍त रागीमी गे मार पचा देंनी, मेको ला पचा माल्‍नीम” दे योसेफ कली देंमाक्‍त। 45 मिनु फाराओमी योसेफ कली साफेनाथ-पानेआह, दे नक नें वोदा बाक्‍त। मिनु योसेफ कली पोतीफेरा माइश्‍शो ओन सहर ङा नाक्‍सो आ तमी आसेनाथ नु ग्‍युंबे पाइक्‍ता बाक्‍त। मिनु योसेफ इजीप्‍त रागी नेल्‍ल कोव़थ हिरचा गोवा बाक्‍त। 46 योसेफ फाराओ पिप आ ङोंइती लोव़ पवानु, ३० बर्स दुम्‍शो बाक्‍माक्‍त। मिनु फाराओ आ ङोंइती रे लशा, इजीप्‍त रागी नेल्‍ल हिरथ लमाक्‍त। उत्‍पत्ती ३७:२

47 मिनु मेको रिम्‍शो बाली ग्रेल्‍तीक ७ बर्समी इजीप्‍त नेल्‍ल ङा रूमी थाम्‍पा अन्‍न ग्रेल्‍माक्‍त। 48 मिनु योसेफमी मेको बाली ग्रेल्‍शो ७ बर्स ङा अन्‍न सहर सहरम उप्‍शा, वोदा बाक्‍त। मेको सहरम एर ओंथ सु सु आन रू बाक्‍मे, मेकेर ङा अन्‍न मेको सहरम उप्‍शा वोदा बाक्‍त। 49 मिनु योसेफमी समुन्‍द्र ङा बाल्‍वा खोदेंशो पा अन्‍न उप्‍शा, शुश दुम्‍तीके पुक्‍चा यो प्रोना बाक्‍त। मारदे हना पुक्‍ने मचाप्‍चा ङा पा शुश बाक्‍माक्‍त।

50 मिनु अन्‍काल दुम्‍चा ङोंइती योसेफ आ मीश ओन सहर ङा नाक्‍सो पोतीफेरा आ तमी आसेनाथमी तौ निक्‍शी थि‍माक्‍त। 51 मिनु योसेफमी “ङोंइती श्‍येत जङानु, परमप्रभुमी आं आफ आ खिं ङा मुर आन कली प्रेंपाइक्‍ती” दे मिम्‍शा, आ ङोंइती जरमेशो तौ कली मनस्‍से नें वोदा बाक्‍त। 52 अर्को कली एफ्राइम नें वोदा बाक्‍त। मारदे हना “परमप्रभुमी आं कली रागीमी श्‍येत जङानु, शुश दुम्‍पाइक्‍ती” दे मिम्‍ता बाक्‍त। 53 मिनु इजीप्‍त रागीमी मेको रिम्‍शो अन्‍न ग्रेल्‍शो ७ बर्स नुम्‍माक्‍त। 54 मिनु योसेफ आ देंशो ७ बर्स ङा अन्‍काल दुम्‍चा गोवा बाक्‍त। मेको अन्‍काल रागी रागी नेल्‍लेमी दुम्‍माक्‍त। इजीप्‍त रागीमी चहिं अन्‍न थिंसे बाक्‍त। 55 मिनु इजीप्‍त रागीमी ठेयब अन्‍काल दुम्‍शा, मुरपुकीमी फाराओ कली “अन्‍न गेकी” दे पुन्‍मे बाक्‍त। मिनु फाराओम इजीप्‍त ङा मुर आन कली “योसेफ नु पुंइथ लने। मेकोमी मार देंबा, मेको पने” दे माइक्‍मी बाक्‍त। 56 मिनु मेको अन्‍काल रागी रागी नेल्‍लेमी दुम्‍माक्‍त। मेना योसेफमी अन्‍न वोइक्‍तीक नेल्‍ल रोक्‍चा गेवा बाक्‍त। इजीप्‍त ङा मुर आन कली अन्‍न लेयपदा बाक्‍त। रागी नेल्‍लेमी ठेयब अन्‍काल दुम्माक्‍त। 57 मिनु अर्को रागी ङा मुरपुकी यो इजीप्‍त रागीमी अन्‍न ग्‍याप्‍थ, योसेफ आ ङोंइती जाक्‍मा बाक्‍त। मारदे हना मेको अन्‍कालम रागी नेल्‍ल ग्रोइक्‍माक्‍त।