1 जोक्‍ब तुइक्‍ब तौमी आ आफ आ शेंशो दाक्‍ब। तन्‍न शुक्‍शी पाइबमी हुइश्‍शो मनेंब। हितोपदेस १:८; १२:३ 2 आन लोव़म पतीके मुरपुकीम मारेइ मारेइ रिम्‍शो ताइनीम। तन्‍न थमा मसुइक्‍चा ङा मुरपुकी दूली पचा ला दाक्‍नीम। 3 मिम्‍शा लोव़ पाइब मुरुम आंम कली ब्रोंइपाइक्‍नीम। तन्‍न ममिम्‍थु ब्‍वाक्‍बपुकीमी आंम कली खतम सेल्‍नीम। हितोपदेस १२:१८; हितोपदेस २१:२३ 4 अल्‍सेपुकी वाल्‍नीमी। मिनु मारेइ मताइनीम। तन्‍न शुश गेय पाइब मुरपुकीमी मारेइ मारेइ ताइनीम। 5 ठीक पाइब मुरुमी जोल मदाक्‍नीम। तन्‍न परमप्रभु यावे आ अरेशो मटीब मुरुमी मुने दोक्‍चा ङा नु दोस तचा ङा गेय ला पाइनीम। 6 ठीक पतीकेमी रिम्‍शो थुं पाइश्‍शो मुर आन कली कोव़ब। तन्‍न परमप्रभु यावे आ अरेशो मटीब आन पाप पतीकेमी मेको आन कली खतम सेल्‍ब। 7 का निक्‍शी मुर प्रुङग बाक्‍शा यो “क्‍येट थीब नङ” देंखु पाइनीम। का निक्‍शी मुर चहिं क्‍येट थीब बाक्‍शा यो “प्रुङग नङ” देंखु पाइनीम। प्रकाश २:९; प्रकाश ३:१७ 8 शुश शोंप बाक्‍शो मुरुमी आंम कली प्रोंइने चाप्‍ब। तन्‍न प्रुङगपुकी हिंच कोंइचा मपुंइसीनीम। 9 ठीक पाइब मुर बत्ती खोदेंशो छेङछेङ पा ब्राइनीम। तन्‍न परमप्रभु यावे आ अरेशो मटीब आन बत्ती काप्‍शा लाइब। अय्‍युब १८:५-६ 10 ठेयब लेश्‍शो नु सुइ कली ममिम्‍ब मुर जिचा पोक्‍‍ब बाक्‍ब। तन्‍न अर्ती नेंब मुर तुइक्‍तीके नु बाक्‍ब। हितोपदेस १:५ 11 मरिम्‍शो पा चेम्‍शो शोंप नुप्‍शा लाइब। तन्‍न इच्‍का इच्‍का पा चेम्‍शो शोंप बारना बारन लाइब। 12 शुश आस पा यो मदुम्‍त हना, थुं लुक्‍च लाइब। तन्‍न आ मिम्‍शो गाप्‍त हना, ब्रोंइचा गेब रवा बाक्‍ब। 13 अर्ती ङा लोव़ मदाक्‍ब मुरुम आंम कली श्‍येत चाक्‍ब। तन्‍न अरेशो टीबपुकीमी इनाम ताइनीम। 14 जोक्‍ब तुइक्‍ब मुर आन शेंशो ब्रोंइचा गेब ब्‍वाक्‍कु बुक्‍तीके खोदेंशो बाक्‍ब। मेको रे पा मुर मबेक्‍नीम। 15 रिम्‍शो मिम्‍ब मुर कली नेल्‍लेमी दाक्‍नीम। तन्‍न खराप मुर आन लां हिंचा ङा बाक्‍ब। 16 जोक्‍ब तुइक्‍ब मुरुमी निप्‍स खाप्‍शा नेल्‍ल गेय पाइब। तन्‍न मूर्खमी आंम मूर्ख दुम्‍तीके कोंइब। 17 मरिम्‍शो लोव़ कुरबमी श्‍येत चाक्‍ब। तन्‍न थमा सुइक्‍चा ङा लोव़ कुरब मुरुम थुं नाइक्‍चा ङा लोव़ चाक्‍ब। 18 सुमी अर्ती मनेंबा, मेको प्रुङग नु सुइम मदाक्‍शो मुर दुम्‍ब। तन्‍न हुइश्‍शो नेंब मुरुम मान ताइब। 19 मुर आंम दाक्‍शो तामेनु, आन थुं कली रिम्‍शो दुम्‍ब। तन्‍न मूर्खमी आन मरिम्‍शो पतीके रे लेत्‍चा मदाक्‍नीम। 20 सु जोक्‍ब तुइक्‍ब नु गाक्‍बा, मेको जोक्‍ब तुइक्‍ब दुम्‍ब। तन्‍न मूर्ख नु गाक्‍ब श्‍येत जाइब। 21 मरिम्‍शो पाइब आन कली श्‍येतम खोइक्‍‍ब। तन्‍न ठीक पाइब आ माल्‍शो मारेइ मारेइ जाक्‍दीप्‍ब। हितोपदेस २८:८; अय्‍युब २७:१३-१७; उपदेसक २:२६ 22 रिम्‍शो मुरुमी आ चच युइ आन कली शोंप हेंशा वोइक्‍ब। तन्‍न मरिम्‍शो पाइब आन शोंप ठीक पाइबपुकीम ताइनीम। 23 प्रुङग आन रूमी शुश अन्‍न ख्रेल्‍ब। तन्‍न ठीक मपाइबमी मेको रोइश्‍शा लाइक्‍ब। हितोपदेस २२:१५ 24 सुमी आ तौ कली शेंशा मतुप्‍बा, मेकोमी आ तौ कली मदाक्‍ब। तन्‍न सुमी आ तौ कली दाक्‍बा, मेकोमी आ तौ कली शेंब। 25 ठीक पाइबमी रूत्री जचा ताइनीम। तन्‍न परमप्रभु यावे आ अरेशो मटीब शोव़लुन बाक्‍चा माल्‍नीम।