1 गो परमप्रभु यावे आ वाइल नु येसु ख्रीस्‍त आ सोइश्‍शो, थमा सुइक्‍ब पावल नङ। परमप्रभु यावे आ योव़शो मुर आन कली थमा सुइक्‍चा आ पर्बम शेंतीक नु मेको तुइश्‍शो रे रिम्‍शो गेय पचा माल्‍ब, दे शेंब दुम्‍ती। 2 मोदेंशो दुम्‍मेनु, गो नेल्‍ल गेना हना यो परमप्रभु यावे नु बाक्‍शा ब्रोंइनय, दे आस पाइनय। २तिमोथी २:१३ 3 आ दाक्‍शो ना मुर आन कली आ लोव़ तुइक्‍पाइक्‍तु। दोपा तुइक्‍पाइक्‍तु देंशा हना, इं मरिम्‍शो गेय रे प्रोंइब परमप्रभु यावेम “आं लोव़ शेंदीमी” देंत। एफिसी १:९-१० 4 तीतस, एको चिठी इ कली ब्रेक्‍ताक्‍ङ। गो निक्‍शी इस के थमा सुइक्‍तीक का दुम्‍शा, गे आं तौ खोदेंशो दुम्‍ते। इं आफ परमप्रभु यावे नु इं पाप रे प्रोंइब येसु ख्रीस्‍तमी इ कली शिशी नु थुं नाइक्‍चा गेम्‍सेक्‍ल। १तिमोथी १:२

5 गो इ कली क्रेट टापुमी मारदे वोइक्‍तन देंशा हना “गे थमा सुइक्‍ब आन दातेमी ठीक मदुम्‍शो गेय ठीक पपतो। मिनु सहर सहर ङा ग्रुम्‍तीकेमी शेंब खाल्‍पापुकी वोतो” दे इ कली अरेतन। प्रेरित१४:२३ 6 मिनु ग्रुम्‍तीक खिं ङा शेंब खाल्‍पापुकी सु सु दुम्‍ने चाप्‍नीमी देंशा हना, काइ दोस गेचा मपुंइसीब नु मीश का ला पाइश्‍शो वोंइश मुर बाक्‍चा माल्‍ब। मेको आ तमी तौ थमा सुइक्‍ब बाक्‍चा माल्‍नीम। हेंथे गाक्‍ब नु मटीब आल आन आफ ग्रुम्‍तीक खिं ङा शेंब खाल्‍पा दुम्‍ने मचाप्‍नीम। १तिमोथी ३:१-७ 7 मोदेंशो थमा सुइक्‍ब आन कली कोव़ब परमप्रभु यावे आ खिं ङा गेय पाइब दुम्‍शा, दोस गेचा मपुंइसीब बाक्‍चा माल्‍ब। मिनु ठेयब लेश्‍शो, शुश गाइक्‍ब, राकसी शांबु तूशा दुक्‍ब, चुरशा गुइ प्रोंइब नु शिंम मुरुम मेको गेय पने मचाप्‍नीम। १कोरिन्‍थी ४:१; २तिमोथी २:२४ 8 थमा सुइक्‍ब आन कली कोव़ब चहिं बास गेब, रिम्‍शो गेय दाक्‍ब, रिम्‍शो नु मरिम्‍शो तुइक्‍ब, ठीक गेय पाइब, थमा पा परमप्रभु आ गेय पाइब नु आंम रां चलेस जोक्‍ब मुर बाक्‍चा माल्‍नीम। 9 मोदेंशो पाइब मुर परमप्रभु यावे आ लोव़ ङा शेंतीक तुइश्‍शा पचा माल्‍नीम। मोपा मेकोपुकीमी थमा सुइक्‍ब आन कली रिम्‍शो शेंशा, अरेने चाप्‍नीम। मिनु परमप्रभु यावे आ लोव़ दूली शेंब आन कली यो रिम्‍शो सेल्‍ने चाप्‍नीम।

10 परमप्रभु यावे आ शें‍शो लोव़ मटीबपुकी शुश बाक्‍नीमी। शोर गाक्‍‍शो लोव़ पाइब नु हेंथे लां शेंब बाक्‍नीम। मेको शुश ख्रोइक्‍तीक चिनु पाइश्‍शो इस्राएली बाक्‍नीम। 11 मोदेंशो मुर आन कली ब्‍वालेइ पपाइक्‍चा माल्‍नीम। मारदे हना खिं खिं ङा मुर नेल्‍ल आन कली जिपाइक्‍नीमी। मिनु क्‍येट चेम्‍चा कली शेंनीमी। 12 क्रेट टापु ङा शुश जोक्‍ब मुरुमी आंम मुर आन पर्बम मार लोव़ पवा बाक्‍त देंशा हना, मेकोमी “क्रेट ङा मुरपुकी गेना हना यो जोल पाइब, मरिम्‍शो पाइब जन्‍तु, शुश जाइब ब्‍वाइब नु अल्‍सी अल्‍से बाक्‍नीमी” दे लोव़ पवा बाक्‍त। 13 मेको आ देंशो थमा बाक्‍ब। मोपतीके गे मेको आन कली शुश अरेवो। मोपा ला आन थमा सुइक्‍तीके ठीक दुम्‍ने चाप्‍ब। २तिमोथी ४:२ 14 मिनु थमा सुइक्‍बपुकीमी यहूदी आन कथा नु मुरुम सेल्‍शो अरेशो लोव़ नेंचा मदुम्‍ब। मेको थमा लां प्रोंइब बाक्‍नीम। १तिमोथी ४:७; २तिमोथी ४:४ 15 रिम्‍शो मुर आन कली मारेइ मारेइ रिम्‍शो बाक्‍ब। ग्रांग्रा दिचा ङा मुर नु थमा मसुइक्‍ब आन कली चहिं मारेइ मारेइ रिम्‍शो मबाक्‍ब। मेको आन थुं नु मिम्‍तीके मरिम्‍शो बाक्‍ब। मत्ती १५:११; रोमी १४:२० 16 मिनु मेकोपुकीमी “गो परमप्रभु यावे कली तुइक्‍नुङ” देंखु पाइनीमी। तन्‍न आन पतीकेमी मतुइक्‍ब बाक्‍नीम, दे तुंइसीब। मोपा मेकोपुकी ग्रांग्रा दिचा ङा मुर बाक्‍नीम। मिनु मटीब दुम्‍शा, रिम्‍शो गेय यो पने मचाप्‍नीम। २तिमोथी ३:५