Ⅰ Sabaa hinni bɩ k'a cem bɩ, hatʊ hinni ʊ wutigʊta m bɩ, Magdalaa Maarii kan Maarii deem bɩ kɩ bʊr, ŋnɩ bɩ dɩga yaa bɩ ma. Ⅱ Tara n nyiŋŋə lɛɛm, Zuuba malɛɛka n a to brama an zer, an bɩ jaa bɩ gərgu an a gʊ yaa bɩ rɛ, an nyɩnta ra. Ⅲ A mɛ n bɔ kʊ ʊ kan brama nyakɩ kɩ, a huu bɩ fu am lajaa hɔ bɩ m. Ⅳ Sʊrdaarɔ wɔɔ da n bɔ ʊ, ŋ mɛ nɩ hinkəm, ŋn'a ba ɩ ʊ, gɩnga ŋ y'a ʊ. Ⅴ Bɩ, malɛɛka bɩ meer ba kan lannɔ wɔɔ kɩ, a ʊ: «A da bɩ bɔ ʊ y. Mɔɔ dɔ mɔɔ ʊ Yeezuu kʊ n y'a wɔ gɔdarkʊra ma bɩ awɔɔ n'a kam ma. Ⅵ A ba naa ʊ dɔ y, a a mɩm bɔ ʊ amba a lɛɛ ka an a hɩ bɩ m, k'a bʊr a dɩga lɛɛ k'a nɩ wʊtaŋ ʊ hɔɔ bɩ ma. Ⅶ Bɩ, k'a ta zɔɔ a yaa hɩ a karɩndanyɩnɔ wɔɔ m, a ʊ: A a mɩm bɔ ʊ, bɩ, a ɩ lɛɛkarɛ awɔɔ lɛɛ Galilee ʊ, lɛɛ bɩ do awɔɔ naa yɩ ʊ, naa do mɔɔ kʊ m a hɩ awɔɔ m.» Ⅷ Lannɔ wɔɔ a hʊr yaa bɩ ra zɔɔ-zɔɔ, kan dabɔʊ kɩ heernyɔɔ gʊta kɩ, ŋn'a si, k'a yaa mim bɩ hɩ karɩndanyɩnɔ wɔɔ m. Ⅸ Bɩ, Yeezuu bʊr an ŋ zɛ ʊ, an a hɩ ŋ nɩ, a ʊ: «Mɔɔ ɩ yaa darɛ awɔɔ m.» Lannɔ wɔɔ n a zɔ ma ŋn'a gannɔ nyɩnnyasʊ, ŋnɩ kukurə zɛ a taa. Ⅹ Yeezuu n a hɩ ŋ nɩ, a ʊ: «A da bɩ bɔ ʊ y. K'a ta a yaa hɩ mɔɔ danyɩnɔ wɔɔ m, ŋnɩ ta Galilee ʊ, ŋ mɔɔ yɩm b'ʊ.» Ⅺ Kʊ ŋn'ɩ tam bɩ, sʊrdaarɔ gɔsɩnnɔ bʊr kʊnɔ ʊ b'ʊ, ŋnɩ bɩ hɔ k'a ba haay bɩ sa, ŋn'a dɩnda wosocɛmannɩbənno jɩtannɔ wɔɔ m. Ⅻ Brɔɔ n a so kʊ ma, kan gʊɔɔgusinno wɔɔ kɩ, ŋnɩ kʊ ma, ŋnɩ busoo ka sʊrdaarɔ wɔɔ ʊ gʊta. ⅩⅢ Ŋ nɩ lɛ ka ŋ ʊ, ŋ ʊ: «K'a hɩ a ʊ, a karɩndanyɩnɔ ɩ bʊr gunuu ʊ, ŋnɩ b'a gər bɩ kʊna, bɩ ma bɩ, wɔɔ hinceem ba. ⅩⅣ Bɩ, kʊ lɛɛzaa b'a ma, wɔɔ y'a dɩndarɛ dɔm, mim b'a nɔrɛ awɔɔ ma y.» ⅩⅤ Sʊrdaarɔ wɔɔ n busoo bɩ si, ŋnɩ hɔ kʊ ŋ y'a dɩnda ŋ nɩ bɩ ba, mim naa do n bɔ lɛɛ haay ʊ zɩɩfʊrɔ wɔɔ bire ʊ, an ta an lee ku her dɔmɩm ʊ.

ⅩⅥ Karɩndanyɩnɔ bueeredeem nɔ wɔɔ n a hʊr, ŋnɩ ta Galilee ʊ, ci kʊ Yeezuu a hɩ ŋ nɩ a ʊ, ŋnɩ ta ra bɩ burə ʊ. ⅩⅦ Kʊ ŋ yaa yɩ bɩ, ŋnɩ kukurə zɛ, bɩ gɔsɩnnɔ sɩnsɩm ka. ⅩⅧ Yeezuu n a zɔ ŋ ma, an a hɩ ŋ nɩ, a ʊ: «N paŋŋa do haay ka mɔɔ ʊ, brama kan tara kɩ burə ʊ. ⅩⅨ Bɩ, k'a ta doro haay zi, a yaa gʊɔɔ wɔɔ ba mɔɔ karɩndanyɩnɔ, a batɛm ka ŋ ʊ, Zɩ kan Nyɩ kɩ Sɛnt-Ɛspri kɩ tɔ ma. ⅩⅩ A hɔ kʊ mɔɔ dɩnda awɔɔ m haay bɩ dɩnda ŋ nɩ, kʊ ŋ nɩ zu ʊ. Bɩ mɔɔ ba n bɩr kan awɔɔ kɩ dɔmɩm haay nɔ ʊ, k'an ta an durnya nyarɛ ku.»