2
I kakel i Mtiu Tulus Dwata
1 Na di kakel i duh dnagit Féntikus, tastifun i kdee dad faglut di ku Dyisas di satu gumnè. 2 Na tatì maktola linge bong uni mdà di langit, gambet uni i bong mgal nus, na fnò uni i gustifunla. 3 Kafnge én, teenla gambet i dad dinè lifoh sbalét na mdon di kat satu dale. 4 Na kdeela tafnò i Mtiu Tulus, na tambù ale talù i dad sahal talù, du mdà di gnagan blé Tulus Dwata dale.
5 Na nun dad Dyu mnè di Dyérusalém di bang én too mafè Dwata. Mdà ale di kdee dad sahal banwe di tah tanà. 6 Kaklingela i bong uni ani, too dee di dale stifun déén. Na too ale tikeng, du kat satu dale lingela i dale talù mdà di dad faglut di ku Dyisas. 7 Na én duenla too tikeng, na manla, “Ise kè i dad to talù ani slame mdà di banwe Galili? 8 Na tan ku fulung ale talù i gito talù? 9 Du sahal dad banwe gumdaito. Nun mdà di banwe Farsya, Midya, Ilam, Mésofotamya, Dyudiya, Kafadosya, Fontus, Asya, 10 Fridya, Famfilya, Idyif, na dad banwe di Libya mdadong di Sirini. Na nun dademe dad tlang dini mdà di Roma, 11 i dad Dyu na dad to ise Dyu, mgebe di fnaglut i dad to Dyu. Na dademe di gito mdà di Krit na Arabya. Sahal banwe gumdaito, bay knean, lingeito di gito talù gablà di dad mdatah mgimò Dwata.” 12 Tikeng ale na msamuk i fandamla, taman sasalek ale, manla, “Tan dé gumtatek ani?” 13 Kabay én dademe baling ale smilo i dad faglut, manla, “E talangal ale.”
I ktalù Fiter di dad to
14 Na kafnge én, tadag Fiter magin i dademe dad sfalò satu dek Dyisas, na falbongan i taluan, manan, “E dad demegu Dyu, na kdeeyu dini di Dyérusalém, fye ku glabatyu moon, taman tooyu beg fanlinge i mangu di gamu ani. 15 Man nawayu langal i dad to ani bay là ale langal, du neyeyu, alò tngà mnagad i duh. 16 Kabay ani sa kagdohò i tafakang Dwata fagu di satu tugadan di muna fa dunan Dyol, manan,
17 ‘Ani sa i nimògu kadang di fulé duh,
toogu blé i Tulusgu di kdee dad to.
I dad ngàyu lagi na libun tmugad ale i fgadègu di dale,
na i dad ngàyu sawang lagi nun kanteenla,
na i dad tua lagi di gamu kamna ale.
18 Na balù i dad fasakgu lagi na libun,
banlégu ale i Tulusgu,
na tnugadla i fgadègu di dale.
19 Na di bang én, fitegu di dad to i dad tnikeng mdà di langit,
na dad ilè dini di tah tanà,
dunan litè, na lifoh, na buk too mangfel.
20 Mbaling kmifu i duh
na mbaling fulè i bulen gambet litè.
Ani sa mkel di là fa gdohò i mdatah duh, i duh kukum i Amu.
21 Na di duh én kadang,
balù simto mni tabeng di Dwata i Amu, galwà ale.’ ” Én man Dwata fagu di ku Dyol.
I kték Dwata ku Dyisas
22 Na fadlug talù Fiter, manan, “E gamu dad bel Israél,* Israél ani dunan satu dagit Dyékob, tingà Isaak, tingà Abraham, i dad to gumakang Dwata nimoan ale na dad bella kenen dad to, i dad to nifatan, nalakan, na gumlén kafye. tooyu fanlinge i mangu ani. Tagadèyu gablà ku Dyisas mdà di banwe Nasarét. Tafite Dwata na kenen mdek ku Dyisas, du mdà di gnaganan na dad bong tnikeng na dad ilè fimoan kenen di munayu gufiten i kdatahan. 23 Dyisas ani blé Dwata di gamu di bang i knayean, du én tafandaman di muna. Hae, tablén Dyisas di gamu, na lêyu blé di kagot i dad to gamsalà du fafatiyu kenen di krus. 24 Kabay nték sa kenen Dwata na falwaan mdà di fati, du là gmagan i fati magot kenen. 25 Du ani kagdohò i gman Dabid gablà ku Dyisas, manan,
‘Gadègu Amugu tagnè samnagin deg,
du dini kenen di kwanangu, én duengu là likò.
26 Na én duen i nawagu too lehew, na dnayengu Dwata,
na balù mati i lawehgu ani, knean nun fatangu,
27 du laam agu tagak déén di gumnè i dad mati,
na laam faloh ku balok laweh i To Landè Salà i kanbongam nawa.
28 Tafgadeam di deg kibògu mfun nawa landè sen,
na mdà di kasnaginam deg, fananoam agu klehew.’
29 “Dad flanekgu, toogu man ani di gamu ani gablà di tbulito Dabid. Tamati kenen na talbang, na nun fa lbangan kel di duh ani. 30 Kabay kenen satu tugad Dwata na gadean tatoo makang Dwata nun satu to mdà di bel Dabid fanbalingan harì. 31 Du tagadè Dabid i fan mkel, taman nun manan gablà di kték Krayst, i To Mgalék Dwata, di kmanan là kenen tagak Dwata di gumnè i dad mati, na là balok lawehan. 32 Dyisas Krayst i mangu ani tanték Dwata mdà di fati, na kdeemi dini mite dun. 33 Na ani tafdatah Dwata kenen ditù di kwananan. Na tagdawatan i fakang Maan, dunan i Mtiu Tulusan tafeben dini, na kdee teenyu na lingeyu dini slame mdà di kenen. 34 Na là magket Dabid salu di langit, bay knean, manan,
‘Man Amuito Dwata di Amugu,
“Sudeng ge dini gsen di kwanangu,
35 kel di kagfisangu dad dmuen ge,
na i kafkahgu dale di dungan falel bliam.” ’† Salmo 110:1 Tulen Dabid gablà di kafdatah Dwata ku Krayst di kdee dad to mnang nawa kenen.
36 “Taman toogu fbangal i talùgu di kdeeyu dad bel Israél, du fye tooyu gadè, Dyisas i tanlansangyu di krus, fdatah Dwata na fanbalingan kenen Amu di kdee, na Krayst dunan i To Mgalékan galyu fatan.”
I kdawat dad bel Israél i gman Fiter
37 Na kaklingela i gman Fiter, malbà i nawala, na smalek ale ku Fiter na i dademe gal dek Dyisas, manla, “Dad flanek, tan i fye nimòmi?” 38 Na tmimel Fiter, manan, “Kat satu gamu msal na tagakyu dad salàyu, na fbunyag gamu fagu di dagit Dyisas Krayst, du fye nlifet Dwata i salàyu, na blén gamu i Mtiu Tulusan. 39 Du én sa fakang Amuito Dwata di gamu, na dad ngàyu, na balù fa dad to di gumawagan, kel di kdee tamgalékan.”
40 Kafnge én, dee fa man Fiter du faglabat dale i kaglut gablà ku Dyisas, na toon ale fakdo, manan, “Nang gamu makuf di dad sasè nimò i dad to di bang ani, du fye là gamu gakuf di kaflayam blé Dwata dale.” 41 Na i kdee dmawat i man Fiter fbunyag ale. Na di duh én mdadong tlu libu dad to gatnù di dad faglut di ku Dyisas.
I ksasatu nawa i dad to faglut
42 Na too ale flinge i tdò dad to gal dek Dyisas, na sasatu i nawala di klalòla ku Dyisas. Na gal ale stifun du dmasal di Dwata na snatngàla i fan na minum i ninum du fandamla i kfati Dyisas. 43 Na kdeela tikeng gagin i afèla di Dwata, du too dee dad tnikeng na i dad ilè mgimò i dad gal dek Dyisas. 44 I kdee dad faglut sasatu nawala, na too ale sablé. 45 Na fablila i dad knunla na sankatla banlé di dad demela nun klidù. 46 Na fadlug ale stifun klit i duh di Bong Gumnè Dwata na sasatu ale kmaan di dad gumnèla du fye gafaldamla i kfati Dyisas. Na di kastifunla, too ale lehew mdà di kafye Dwata dale. 47 Too ale dmayen Dwata na too ale nafè i dademe dad to. Na klit i duh nun dademe tnù di dad to faglut di ku Dyisas na galwà di dad salàla.