22
1 Fye fa ku fye dengeg i satu to, di nun bong knunan,
na i kafye dengegan mabtas fa di salafì na blawen.
2 Nun gusalngad i dad to nun knun na i dad to landè,
du slame Dwata mimò dale.
3 I to fulung mebe i kton, tagadean i samuk fan kel, taman funanniwas,
bay i to kulang i kfulungan faldam, laan niwas i samuk,
2 tatì fadlug kel di kagdawatan i flayam bunge i nimoan.
4 Ku nun klikoam di Dwata, na fdanaam i ktom di kenen,
mlé kenen i dad knun, dengeg, na klawil.
5 I to kmabas i kton, fawag di dalan nun fawel,
i fawel i dad to sasè.
6 Tdoam i tingà ku tan kiboan mebe i kton,
du fye di ktuan laan glifet dun, klon mnè di tah tanà ani.
7 I to nun knun gal mebe i to landè,
na i to gal mdem flifan di to gumdeman.
8 I to mla sasè, kamtu i kaflayam,
na i kabkutan i dad to, nun gusenan.
9 Nun kafye di to too mlé,
du nalelan i knaanan di dad to landè.
10 Falwaam i to gal madoy, du fye matlag i ksamuk,
na matlag i kaswè talù na kasablé salà.
11 I to too mayè ku matlu nawan na fiten i kafean fagu di fyetaluan,
gasgalak kenen i harì.
12 I kaglut gal man i to, too nifat Dwata,
fagu di kablabalan i kakakéng gal sanman i to là gsalig.
13 I to là mayè mimò dee balibadan, du fye là mimò,
du manan kun ku lamwà kenen di gumnean ken kanfè i lmanaf liyun,
na knaanan.
14 I klafà yaan, salngad i fawel,
na i dad to fanlabè Dwata, ale i mfawel.
15 Én kagkah i dad ngà, gal ale mimò klandè ldam,
bay ku tdoam fagu di kbadas dale di gugsalàla, tnagakla i klandèldamla.
16 I to mkut i dad to landè, du fye matnù i knunan,
demen mlé di dad to nun, mbaling kenen to landè.
I tlu falò dad mabtas fngewe
17 Ani man i to fulung faldam, manan, Fanlingemagu na tdògu ge i dad gman i to fulung faldam,
na toom fkah di nawam i tdògu,
18 du too fye ku gafaldamam,
na fakayam tulen di dademe.
19 Kayègu ku too ge smalig di Dwata,
taman ani tdògu ge.
20 Smulat agu tlu falò dad fye gman, du tulengu ge,
na gakuf déén dad fye kafngewe na gnadè,
21 na dad gman ani gugmadeam i kaglut,
du fye fulung ge tmimel i glut timel di to mdek ge dini.
22 Nang ge mlimbung i dad to landè du landè ale,
na nang ge mkut dale di gumusay,
23 du Dwata i msen dale,
na fanlayaman i to mkut dale.
24 Nang ge sgalak di to mlal malbut,
na nang ge magin i to mlal flabè,
25 du ken mlalò ge i kenen ldam,
na là ge fakay samfulê di fye.
26 Nang ge makang
na ge mayad dad uteng i demem to,
27 du ku là ge gambayad
balù i gumileam snabàla na nwè di ge du bayad dun.
28 Nang ge mili ilè gusableng i tanà
gfun i dad muna tom i fkahla déén di muna fa.
29 I to too fulung mimò,
mbaling kenen mdengeg na ise ku di mdanà to i gumimoan,
bay di harì fakayan gumimò.