Bibeli Luayãtaalá 1 Tɛsalonideↄ 5

1 Gbɛ̃́ↄ, a gↄↄ ge a zaa oaɛ́ zɛvĩo, 2 asa á dↄ̃ sã́asã lá kpã́i ì mↄ gwã́, màa aↄ dɛ Dii mↄgↄↄ.* 3 Tó gbɛ̃́ↄ lɛ́ o wa aafia, wa ku dↄdↄa, kaalɛ a mↄ́má kã́ndo lá nɛ'iwãwã ì mↄ nↄsindeewawaɛ, aa bↄo. 4 Ápiↄ sↄ̃ gbɛ̃́ↄ, á kú gusiau kɛ́ gↄↄpi á le lán kpã́iwao, 5 asa gupua gbɛ̃́ↄn á ũ, fãanɛ gbɛ̃́ↄn á ũ ápii. Gwãasĩna ge gusia gbɛ̃́ↄn wá ũo. 6 Ayãmɛto wásuli i'o lán dãↄwao. Wà itɛ̃kɛ, wíↄ kú ń laaio. 7 I'onaↄ ì i'o gwã́, mɛ́ wɛ̃dɛnaↄ ì wɛ̃dɛ kɛ gwã́, 8 wápiↄ sↄ̃, lá fãanɛ gbɛ̃́ↄn wá ũ, wàↄ kú ń laaio, wí luanaaikɛa ń yeakↄ̃io da mↄ̀ ula ũ, wí wɛdↄa zia'ea yã́i kpá mↄ̀ fùa ũ.† 9 Asa Lua i wá dilɛ à pↄkũmabↄbↄwáo. À wá dílɛ à wá suaba ń wá Dii Yesu Kilisi gbãaoɛ. 10 Ɔ̃mɛ gà wá yã́i kɛ́ wàↄ kuanↄ, wá bɛ̃́ɛ ge wa i'òn nò. 11 Ayãmɛto à lɛdakↄ̃wa, í kↄ̃ gba gbãa, lá álɛ kɛwa.

Pↄlu yãdilɛa Tɛsalonideↄnɛ

12 Gbɛ̃́ↄ, wa wabikɛ̀wá, à bɛɛɛ dↄ̃ gbɛ̃́ pↄ́ aaì zĩkɛ á guu, aa iko vĩwá an zĩkɛa Diiɛ guu, aalɛ á dazɛwaↄnɛ. 13 À ń kpɛla maamaa, íↄ yeńzi zĩ pↄ́ aalɛ kɛ yã́i. Àↄ na ń kↄ̃o. 14 Gbɛ̃́ↄ, wa lɛdàwá à faasaideↄ dazɛwa, à gbɛ̃́ pↄ́ an kúsu kwɛ́ↄ gba sↄ̃, à laaidↄ gbãasaideↄwa, í mɛnakɛ ń gbɛ̃́piio. 15 À laaika á gbɛ̃e suli vãi fĩabo ń vãioo. À zɛwɛɛlɛ àↄ maakɛkↄ̃ɛ ń gbɛ̃́piio gↄↄpii.

16 Àↄ ku pↄna guu gↄↄpii. 17 Àↄ wabikɛ Luawa láasai. 18 Àↄ Lua sáaukpa yã́ píi musu. Bee mɛ́ dɛɛ́ aà pↄeã ũ naa Kilisi Yesuwa. 19 Ásuli kpá Lua Nisĩnaɛo, 20 ásuli saka ãnabikɛguo. 21 À yã́pii tàasika, íↄ a maa kũa, 22 í mikɛ̃ vãi bui píiwa.

23 Lua aafiade to à ázĩa kpawa míↄmiↄ, i á nisĩna ń á wɛ̃nio ń á mɛo dↄ̃́aɛ́ aafia tàaesai e wá Dii Yesu Kilisi mↄ́zĩ. 24 Lua pↄ́ á sisi à á sɛ́ náai vĩ, a yã́pi kɛɛ́.

25 Gbɛ̃́ↄ, à wabikɛwɛ̃ɛ. 26 À fↄkpa wá gbɛ̃́ↄwa píi ń Lua gbɛ̃́ↄ lɛ́pɛakↄ̃wao. 27 Ma naɛ́ Diizi à láɛ bee kyokɛnɛ́ ḿpii.

28 Wá Dii Yesu Kilisi gbɛ̃kɛkɛɛ́.

*5:2 Mat 24.43-44, 2Piɛ 3.10

†5:8 Isa 59.17, Ɛfɛ 6.14-17