Bibeli Luayãtaalá Amↄsi 6

Waiyoo Isailiↄ kía namablenaↄ

1 Waiyoo á gbɛ̃́ pↄ́ á kú niɛniɛ Siↄnaↄ

ń á gbɛ̃́ pↄ́ á kú dↄdↄa Samali sĩ̀sĩpↄlɛuↄ,

á gbɛ̃́ pↄ́ á dɛ buiↄ mide kíaↄ ũ

gbɛ̃́ kĩniↄ wɛ́ ìↄ dↄáziↄ!

2 À gɛ́ Kalenↄ à gwa!

Bↄa we í gɛ́ Amata mɛɛwiau,

í gɛ́ Gata, Filitɛ̃ mɛɛwiau.

An wɛ̃́lɛpiↄ maa dɛ wɛ̃́lɛ pↄ́ á kíaↄ kuulae?

An bùsu zↄ̃ↄ dɛ á pↄ́ae?

3 Lá álɛ e Lua ĩadaawá gↄↄ zã̀,

kía pãsĩ gbãableawá kãikũ̀.

4 I wúlɛ á wesa swaa liiↄwa,

i ↄli ázĩau á wúlɛkĩipiↄwa.

I sãnɛbↄlↄ ń gáaena mɛkpaao só.

5 I mↄↄnalɛ lán Davidi lɛ̀wa,

i lɛ̀ dafu da ń pↄ́'ↄbↄnaↄ.

6 I vɛ̃ɛmi à a dàa bↄ,

i nísi ↄde dↄↄ,

kási ili ↄ́ↄlↄ Yosɛfu buiↄ kaalɛa yã́ musuo.

7 A yã́i tò áↄ ku gbɛ̃́ pↄ́ wa táńnↄ káauↄ guuɛ,

á lalasi wiiↄ i midɛ.

8 Ma Dii Lua Zĩgↄ̃de

ma lɛgbɛ̃̀ ń ma kuao ma mɛ̀,

má ye Yakↄbu buiↄ ĩ́andãa gĩyãio,

má za an zɛgikĩiↄu.

Má ń mɛɛwia na ń ibɛɛↄnɛ ń ↄzĩ

ń pↄ́ pↄ́ kú a guuↄ píiɛ.

9 Baa tó gↄ̃ɛↄ gↄ̃̀ uae gbɛ̃ↄn kwi, aa gagaɛ. 10 Tó gbɛ̃́ mↄ̀ a daɛ gɛ sɛ́i, àlɛ bↄò à gɛ́ tɛsↄ̃iwà, mɛ́ à gbɛ̃́ pↄ́ ulɛa we là à mɛ̀: Gbɛ̃e kunnↄ we lↄe? Ade a wewà: Gbɛ̃e ku lao. Kɛ kílikili, baa Dii tↄ́, ńsu sio.

11 Asa ma Dii ma yãdìlɛ ma mɛ̀,

má ua zↄ̃ↄ wiɛ kɛ́lɛkɛlɛ,

mí a nɛ́na kɛ yáiyai.

12 Wì sↄ̃́ baa gbɛsi musue?

Wì sapa ń zuↄ wee?

Màa á tò yã́zɛde gↄ̃̀ɛ́ sɛwɛ ũ,

mɛ́ yãkɛa a zɛ́wa gↄ̃̀ɛ́ gↄ̃i ũ.

13 Á pↄ kɛ̀na zĩblea Lodebaawawa,

a mɛ̀ a Kaanaiũ sì ń ázĩa gbãaoɛ.

14 Ma Dii Lua Zĩgↄ̃de ma mɛ̀:

Isailiↄ, málɛ tɛ́kpa buieu à fɛlɛánↄ,

i wɛ́tɛ̃amↄɛ́ za Amata bↄlɛu e Ísida Wisidei.