Bibeli Luayãtaalá Yáasiↄ 4

4

Gbɛ̃zↄ̃ↄ lɛdama

1 Ma nɛ́ↄ, à gbɛ̃zↄ̃ↄ lɛdama ma,

à á laai kpálɛ kɛ́ à e àↄ dↄ̃a vĩ.

2 Dↄ̃a súsu málɛ daɛ́,

ásu pãkpa ma yãdanɛio.

3 Kɛ́ má kú nɛ́ ũ ma mae ↄzĩ,

má busɛ ma da nɛ́ mɛ̀ndona ũ.

4 Ma mae yãdàmɛɛ à mɛ̀:

Ǹyↄ̃ ma yã́ kũa n sↄ̃u,

ma yãdilɛnɛↄ da, n kua iↄ na.

5 Ɔ̃nↄkũ, ǹyↄ̃ dↄ̃a vĩ,

asu sãngu ǹ pãalɛ ma yã́ɛo.

6 Ńsu pãkpa ↄ̃nↄio, a n dↄ̃́a,

ǹyↄ̃ yeaàzi, a ↄkunla.

7 Ɔ̃nↄkũ, ↄ̃mɛ yã́pii mi ũ,

dↄ̃a wɛɛlɛ ń àizɛɛ pↄ́ ń vĩ píio.*

8 Ǹ aà kṹ gbã́ugbãu, a n kã́fĩ,

didiwà ↄplapla, a n kpɛla.

9 Aↄ dɛ fùa maa ũ n miwa,

àↄ dɛnɛ kíafua gawide ũ.

10 Ma nɛ́, swã́kpa ma yã́i,

yã́pi da, n wɛ̃ni aↄ gbã̀a.

11 Ma ↄ̃nↄ zɛ́ ↄ̀lↄnɛ,

ma n da yãmaa zɛ́wa.

12 Tó ńlɛ táa'ou, pↄe a kpanɛo,

tó ńlɛ bàalɛu, ńyↄ̃ gɛ̃nalɛo.

13 Ǹyↄ̃ ma lɛdama kũa, ńsu gbaɛo,

didiwà gbãa, asa ↄ̃mɛ n wɛ̃ni ũ.

14 Ńsu vãikɛnaↄ zɛ́ sɛo,

ńsu tɛ gbɛ̃vãiↄ zɛ́io.

15 Ɛ̃nɛ́, ńsu namáo,

kɛ̃́má, ǹ n gɛa kɛ.

16 Tó aai vãi e kɛ̀o, aali i'oo,

tó aai gbɛ̃́ e kàaũo, i lí gɛ̃ ń wɛ́uo.

17 Asa vãikɛa mɛ́ ń pↄblea ũ,

gbɛ̃́ↄ wɛtãa mɛ́ ń imia ũ.

18 Gbɛ̃maaↄ zɛ́ dɛ lán gudↄlɛiawa,

a gupua ìↄ dɛdɛ lán ĩatɛ̃ dɛdɛawa.

19 Vãikɛnaↄ zɛ́ dɛ lán gusia níiniiwa,†

aali pↄ́ pↄ́ tò wàlɛ gɛ̃nalɛ dↄ̃o.

20 Ma nɛ́, laaidↄ yã́piↄwa,

swã́sɛ ma yã'onɛi.

21 Ńsu kpá swã́ao,

ǹyↄ̃ kũa n sↄ̃u.

22 Asa a dɛ wɛ̃ni ũ gbɛ̃́ pↄ́ le kũ̀ↄnɛ,

a dɛ mɛ̀ bṹu aafia ũ.

23 Azaiasa laaidↄ n sↄ̃ yã́wa,

asa wɛ̃ni zĩ́na bↄ̀ sↄ̃ kĩ́iɛ.

24 Bↄ yãbɛ̃ɛ'oau,

mikɛ̃ yãkpaanla'oawa.

25 Wɛdↄ n aɛ,

gugwa n kuu súsu.

26 Zɛ́ sɛ́ súsu,

n yãkɛaↄ píi a bↄ maa.‡

27 Ńsu yɛɛlɛ ↄplaai ge zɛɛio,

ńsu gbápɛlɛ vãi zɛ́uo.

*4:7 Mat 13.44-46

†4:19 1Zãa 2.11

‡4:26 Ɛbɛ 12.13