Bibeli Luayãtaalá Zia yã́ 18

Babɛli gaa

1 Bee gbɛa ma malaika pãle è à bↄ̀ luabɛ. A iko zↄ̃ↄ vĩ mɛ́ aà gawi dṹnia pù. 2 À wii gbãa lɛ̀ à mɛ̀: Babɛli gà, mɛɛwia zↄ̃ↄpi gà.* À gↄ̃̀ zeeↄ kúkĩi ũ, tã́a bui píi tòo ũ, bã pↄ́ wì ń tɛ̃bo wa ye ń gĩyãioↄ bɛ ũ.† 3 Asa bui píi aà vɛ̃ɛ gbãa pↄ́ dɛ aà káaluakaa ũ mìɛ.‡ Dṹnia kíaↄ gbãsĩkɛ̀aànↄ, mɛ́ dṹnia laatanaↄ kɛ̀ ↄdeↄ ũ aà lalasikɛa zↄ̃ↄ guu.

4 Ɔ̃ ma lↄↄ pãle mà à bↄ̀ luabɛ à mɛ̀:

À bↄlɛ a guu ma gbɛ̃́ↄ,

kɛ́ á ↄ su àↄ ku aà duuna guu,

yã́ pↄ́ wa yíawàↄ á leo yã́i.§

5 Asa aà duuna gbã̀ zↄ̃̀ luawaɛ,

mɛ́ aà vãikɛaↄ dↄ̀ Luagu.

6 À fĩaboɛ̀ yã́ pↄ́ a kɛ̀ɛ́wa,

à kɛɛ̀ aà yãkɛawa lɛɛ pla.

À pↄkũma í káuɛ̀ a imibↄu

dɛ pↄ́ pↄ́ a kàunɛ́la lɛɛ pla.

7 À wãwã ń wɛ̃nao kpaaàzi,

lá à tↄbↄ̀ kua lalasikɛa guu lɛ́u.

Asa ì o a sↄ̃ guu,

nↄɛ kían a ũ zↄ̃lɛa a báawaɛ,

gyaa gbɛ̃andon a ũo,

a wɛ̃nakɛ bauo.*

8 A yã́i tò kìsiaɛ beeↄ aà le gↄↄ do,

gagyã ń wɛ̃nao ń nↄanao.

Tɛ́ mɛ́ a kũwà,

asa Dii Lua aà yã́kpalɛkɛna gbãa.

9 Dṹnia kía pↄ́ aa gbãsĩkɛ̀aànↄ aa lalasikɛ̀aànↄↄ, tó aa a tɛ́kũa lu è, aa ↄ́ↄlↄ aa ńzĩa gbɛ̃gbɛ̃. 10 Aa zɛ kãaa vĩa guu wãwã pↄ́ wa kpài yã́i aa mɛ:

Waiyoo, waiyoo, mɛɛwia zↄ̃ↄ!

Mɛɛwia ikode Babɛli!

Yã́ mↄ̀ zↄ̃̀lɛma gↄↄ do gↄ̃̀ↄa!

11 Dṹnia laatanaↄ ↄ́ↄlↄ sↄ̃,† aa wɛ̃nakɛɛ̀, kɛ́ gbɛ̃e a ń laaɛ beeↄ lúmá lↄo yã́i: 12 Vua, ã́nusu, gbɛ̀ bɛɛɛdeↄ, òsoↄ, zwã̀a ↄdeↄ, zwã̀a tɛ̃a ń a gàaluladeↄ, siliki, lí maa bui píi, pↄ́ pↄ́ wì kɛ ń wesa swaaↄ ń lí bɛɛɛdeo ń mↄgotɛ̃o ń mↄsio ń gbɛpuao píi, 13 dopↄↄ, nísi gĩnanaↄ, tulaletiↄ, zↄ̃go lí'ↄↄ, vɛ̃ɛ, nísi, pɛ̃ɛti, pↄ́wɛna, zuↄ, sãↄ, sↄ̃́ↄ ń a góↄ, zↄↄ ń gbɛ̃nazĩna wɛ̃niↄ. 14 Wa oɛ̀: Pↄ maa pↄ́ ni a nidɛↄ làama píi. N nama ń n gawio pìlima píi, wa e bau lↄo.

15 Laatana pↄ́ aa kɛ̀ ↄdeↄ ũ mɛɛwiapi sabaiↄ zɛ kãaa vĩa guu wãwã pↄ́ wa kpài yã́i. Aa ↄ́ↄlↄ aa wɛ̃nakɛ 16 aa mɛ:

Waiyoo, waiyoo mɛɛwia zↄ̃ↄ!

À bàabaa yè yãa

ń zwã̀a gàaluladeo ń a tɛ̃ao.

À vua nↄamblebↄↄ dà yãa

ń gbɛ̀ bɛɛɛdeↄ ń òsoↄ.

17 Aà àizɛɛ píi músikɛ̀ gↄↄ do gↄ̃̀ↄ.

Gó'ilɛna diiↄ ń tagɛnaↄ ń ígbɛ̃ↄ ń gbɛ̃́ pↄ́ aaì zĩkɛ ísiaaↄ zɛ kãaa ḿpii. 18 Tó aa mɛɛwiapi tɛ́kũa lu è, aa wiilɛ aa mɛ: Mɛɛwiae ku yãa, a zↄ̃ↄ kà mɛɛwiaɛ beewao. 19 Aa ↄ́ↄlↄ aa ńzĩa gbɛ̃gbɛ̃, aa wɛ̃nakɛ aa wiilɛ aa mɛ:

Waiyoo, waiyoo mɛɛwia zↄ̃ↄ!

Gbɛ̃́ pↄ́ aa gó'ilɛna vĩ ísiaaↄ píi

kɛ̀ ↄdeↄ ũ ń àizɛɛ pↄ́ pàlawào,‡

ↄ̃ à gↄ̃̀ bɛzia ũ gↄↄ do gↄ̃̀ↄ.

20 À pↄnakɛ a yã́ musu luabɛdeↄ ń Lua gbɛ̃́ↄ ń aà zĩnaↄ ń aà ãnabiↄ, asa Lua mɛ́ tↄsìwàɛ́.

21 Ɔ̃ malaika gbãade gbɛ pↄ́ kà wísilↄgbɛ gbɛ̃̀nɛwa sɛ zù ísia guu à mɛ̀: Màa wa mɛɛwia zↄ̃ↄ Babɛli zu ń gbãao, wa mɛɛwiapi e bau lↄo.§

22 Wa mↄↄna ge gã̀a'ↄ ge kulɛ

ge kã̀ae'ↄ ma n guu bau lↄo.

Wa ↄzĩkɛnae e n guu bau lↄo.

Wa wísilↄgbɛ kↄ̃fĩ ma n guu bau lↄo.

23 Wa filia gupua e n guu bau lↄo.

Wa nↄsɛkↄ̃fĩ ma n guu bau lↄo.

N laatanaↄá dṹnia gbɛ̃́ gbiaↄnɛ yãa,

n pↄdà bui píiwa, n ń mi lìaa.

24 Wà ãnabiↄ ń Lua gbɛ̃́ↄ au è a guu

ń gbɛ̃́ pↄ́ wà ń dɛdɛ dṹnia guuↄ píi.*

*18:2 Isa 21.9

†18:2 Zia 14.8, Zel 50.39

‡18:3 Zel 51.7, Zia 17.2

§18:4 Zel 51.6

*18:7 Isa 47.7-9

†18:11 Eze 27.31

‡18:19 Eze 27.33

§18:21 Zel 51.63-64

*18:24 Zel 51.49