1 Tendaiꞌ myu itue, dut mengeꞌ emuring eldew mura ketepus-tepusan et sengkedunyaan, maya timpu na kelang keliyutan. 2 Na, maya mengeꞌ taaw inginen lang kedyeng diriꞌ bekeꞌ inginen pirak. Dye in peleꞌlaluꞌ, meabbu, metinuara, mesmal et gunggurang, kaya penglingew et neketabang kedye, bekeꞌ mepenuara dut Empuꞌ. 3 Luwas itue, megmendyaring meburangit dye, kaya meingasiꞌ, megpenginlelew, kaya pegeteng et diriꞌ, meselseg, bekeꞌ meiiseg dye dut kenunganan. 4 Diki lang et atin, dye in memegkampi dut mengeꞌ kebanta, kaya pikiren dye pasal et sungduan et keradya dye, pereklaꞌ dye et peleꞌlaluꞌ, bekeꞌ meinginen et kelemian imbes eset mengeꞌ ginis na tudyu eset Empuꞌ. 5 Dye pemenutsulit na mengengandel segwaꞌ diki gasi mebiriꞌ eset kedyeng kebtangan itueng kepengyedian apang megpinda arat dye eset menunga. Tengkisan mu itueng mengeꞌ taaw.

6 Maya mengeꞌ senu eset kedye na mengusal et pengengakal apang mekesled eset kebenbenwanan et kelilibunang merurugey meuurag. Ating mengeꞌ kelilibunan neng peguripenen et keselaan bekeꞌ kesled dye et mekansang keginisan et mereraat neng keiregan. 7 Itueng mengeꞌ kelilibunan gaay meenaran et tulduꞌ dut misan sinu-sinu, segwaꞌ misan ingyan diki dye meretian itueng keberbenaran. 8 Indyari samat kire Janes bekeꞌ Jambres na negpenungsang ki Moises, na itueng mengeꞌ kelelekian negpenungsang gasi et keberbenaran. Kaya ne pememikir dye et kenunganan bekeꞌ diki keteup-teup itueng kedyeng pegandel. * 3:8 Exodo 7:11. 9 Temed lang diki mekepelahyun itueng kedyeng keyeatan, sabab mebunayag et ginsan itueng kedyeng kerupangan, na samat neinabu kire Janes bekeꞌ Jambres.

10 Temed inasip mu penulduꞌ ku, arat ku, bekeꞌ pegperuen ku eset kebiyagan. Kesewd mu pegandel ku, ketentuan ku, pegmergaꞌ ku, bekeꞌ kepengnaan ku eset pengandel et Empuꞌ. 11 Neseksian mu itueng pegraat eset daken, kwantin gasi pegpeliyut eset dakeng pegsandal eset lungsud et Antiokia, lungsud et Ikonio, bekeꞌ lungsud et Listra. Segwaꞌ eset ginsan neng itue binawiꞌ nega aku et Begerar Jesus.† 3:11 Keradya 13:14-52; 14:1-7; 14:8-20. 12 Asal, dut ginsan neng megaay mengebiyagan et metulid bilang mengingibut i Kristo, dye in mekelabay et pegraat. 13 Segwaꞌ itueng mengeꞌ meyeyaat megmendyaring lebing megpekeraat bekeꞌ itueng mengrurunding megpelahyun lebing mengrunding dut sebayaꞌ dye, sampay dye in merundingan.

14 Segwaꞌ ikew, pelembus keʼt itueng mengeꞌ penulduꞌ na neenaran mu bekeꞌ mepangger na pegeerapen, deuluꞌ gasi na nekilala mu ne itueng nenulduꞌ eset dimu. 15 Mawanan negaʼt sengkerinekan, sewd mu ne itueng Beres et Empuꞌ nesurat eset pasek metignang Kesuratan, na megpenulduꞌ et dalan eset kepuwasan pebiyaꞌ et pegandel ki Jesus Kristo. 16 Ginsan neng Kesuratan ipinesurat et Empuꞌ pebiyaꞌ et taaw Ye, bekeꞌ meusal itulduꞌ et keberbenaran, eset pegsagkaꞌ et kaya sugat neng ketulduan, pepetignaꞌ eset belingkeg neng keradya, bekeꞌ eset pegdundun dut metulid neng pemimiyagan. 17 Supaya kityung mengeꞌ mengengeradya eset Empuꞌ subaliꞌ megmendyaring panyap eset ginsan neng menunungang bubuwaten.