Surat dut mengeꞌ tawʼt
HEBREO
Kepurisnan et itueng Surat neng Hebreo
Itueng surat binibit dut pegtimung-timungan et mengeꞌ mengengandel neng Judio, etawa mengeꞌ Hebreo. Nesurat itue apang ipepanggar pengandel dye, sabab eldew-peldew kumansang mengeꞌ keliyutan kedye, bekeꞌ mekabiꞌ ne tirengan dye pengandel dye supaya ibuten peuliꞌ ating egama et mengeꞌ Judio na diki mengandel. Angkansa, pegtulduꞌ et nesurat na si Jesus pineketaas neng Empuꞌ, lebing mebasag set ginsan neng mengeꞌ ibang empuꞌ.
Binwat ye itue pebiyaꞌ telung sebaban. Una, pineretiꞌ ye na si Jesus ating bugtung na Yegang et Empuꞌ banar, kaya tegnaan sampay kaya seskeran. Sabab si Jesus yegang et Empuꞌ, lebing metaas ya kasga mengeꞌ propeta, bekeꞌ si Moises, sampay ga mengeꞌ dereakan et Empuꞌ. Ikeruwa, ating binwat i Jesus lebing mergaꞌ kasga ating keradya et mengeꞌ pariꞌ neng Judio. Angkansa negsubliꞌ ya dut pengelet set mengeꞌ taaw bekeꞌ Empuꞌ. Iketlu, sabab i Jesus, mekedyari ne mebebawiꞌ banar et Empuꞌ mengeꞌ taaw, sabab netuman i Jesus ginsan mengeꞌ keilangan et Keseraan bekeꞌ mengeꞌ simayaꞌ neng ayup na binggey dut Empuꞌ.
Pegketbes, sinugid et nesurat baꞌ enu binwat et mengeꞌ metaas neng mengengandel tagnaꞌ tiꞌ sabab et pengandel dye, supaya meglahyun nega dye dut pengandel dye ki Jesus, misan ne kansang-kansang mengeꞌ keliyutan kedye. Dut ketimpusan et surat, maya mengeꞌ beres ye na diki dye ne megperayuꞌ set Empuꞌ, imbes ibuten dye ne arat ye bekeꞌ pememiyagan et menunga supaya ikeksan dye Empuꞌ
Ketulduan et itueng Surat
Pegkeempuꞌ i Jesus neng Yegang et Empuꞌ 1:1-3
Lebing metaas si Jesus kasga Dereakan et Empuꞌ 1:4—2:18
Lebing metaas si Jesus kasga kire Moises bekeꞌ Josue 3:1—4:13
Menunga et Keparian i Jesus 4:14—7:28
Menunga et Pinegsulutan et Empuꞌ na Tinuman i Jesus 8:1—9:28
Menunga et Sinimayaꞌ i Jesus 10:1-39
Menunga et Pengandel ki Jesus 11:1-40
Pememiyagan et mengeꞌ Mengengandel 12:1—13:19
Ketimpusan et Surat tuꞌ 13:20-25
1
Pegkeempuꞌ i Jesus neng Yegang et Empuꞌ
1 Tagnaꞌ tiꞌ Empuꞌ nengampang dut mengeꞌ keupuꞌupuan tyu pebiyaꞌ dut mengeꞌ tarus ye dut iba-ibang timpu bekeꞌ iba-ibang pepebiyanan. 2 Segwaꞌ itueng emuring eldew ya nampang pebiyaꞌ dut kenyeng yegang na si Jesus. Ya piniliꞌ et Empuꞌ na memusakaꞌ et ginsan neng ginis. Sampay negmendyari Empuꞌ et sengkelungsuran pebiyaꞌ ating yegang ye. 3 Ating Yegang et Empuꞌ binyar et ketaasan et Empuꞌ bekeꞌ lulus na kebuneyagan et kenyeng pegmendyaring Empuꞌ. Ating Yegang et Empuꞌ negpeteteg et ginsan ginis pebiyaꞌ dut kenyeng bebresen na mekepengyedian. Pegketbes ye na mebuwat pasal pegugad et salaꞌ tyu, ya narung ne dut tampaꞌ kewanan et Empuꞌ Amaꞌ neng metaas dut langit.
Lebing Metaas si Jesus kasga mengeꞌ Dereakan et Empuꞌ
4 Ating Yegang et Empuꞌ negmendyaring metaas banar dut mengeꞌ dereakan, angkansa ating ketaasan neng nepusakaꞌ ating Yegang et Empuꞌ negmendyaring lebing metaas nega set kedyeng ketaasan. 5 Sabab kaya sinugid et Empuꞌ misan ingyan dut mengeꞌ dereakan ye na kwan,
“Ikew yegang ku. Tiban negmendyaring Amaꞌ mu aku.”
Etawa kaya sinugid et Empuꞌ dut sebarang dereakan ye, kwan,
“Aku Amaꞌ mu, indyari ikew negmendyaring Yegang ku.”* 1:5 Kanta 2:7; Hebreo 5:5; Keradya 13:33; 2 Samuel 7:14.
6 Megdemikian ganang pinesurung ye ne dut sengkelungsuran kenyeng bugtung ne Yegang, kwan ye,
“Ya pengempuen et ginsaʼt dereakan.”† 1:6 Pasal et uluanak dut Empuꞌ bekeꞌ kenyeng kebegeyan, betsaen Tagnaꞌ 25:5-6, 29-34; Deuteronomio 32:43.
7 Pasal gasi dut mengeꞌ dereakan, sinugid ye,
“Binwat mengeꞌ dereakan Ku samat deres, daken tetehagen samat deleg et apuy.”‡ 1:7 Kanta 104:4.
8 Segwaꞌ pasal dut kenyeng yegang, kwantin penugid ye,
“U, Empuꞌ, dimung Kemilikan kaya seskeran bekeꞌ ketignaan megmendyaring kepengyedian et dimung pengmilikan.
9 Pegmerganen mu pasal ketignaan bekeꞌ pegisgan mu sebarang mengeꞌ mereraat. Angkansa Aku, misan dimung Empuꞌ, nemadlis ke dut lebing metaas neng gerar kasga ginsan neng sebayaꞌ mu, sampay binggey Ku dimu enep.”§ 1:9 Kanta 45:6-7.
10 Megdemikian sinugid ye gasi,
“Dut sengkepunan, u Begerar, binwat mu ating dunya, bekeꞌ ating langit keremut negpendyari.
11 Segwaꞌ dye mepapas, temed ikew dumaran. Mantang dye samat repanan mebukluꞌ.
12 Lulunen mu dye samat kumut. Samat repanan neng sembian. Segwaꞌ ikew dumaran, bekeꞌ diki ke matey misan ingyan.”* 1:12 Kanta 102:25-27.
13 Kengyan masa kaya sinugid et Empuꞌ dut misan sinung dereakan,
“Marung ke dut tampaꞌ ku seked buwaten kuʼt tungtungan et tiked mu sebarang mengeꞌ kebanta mu.”† 1:13 Kanta 110:1; Keradya 2:34.
14 Diki be ginsaʼt mengeꞌ dereakan atin mengeꞌ dinaak supaya tumabang dut sebarang memusakaꞌ et kepuwasan?