2
Me no kwian Chube gerua Jesucristo giti
kagenga ngwale
1 Jesucristo ma kweri ma kiraske lle boanga Chube alin nga ngaña giti ulitage, malen che nu geru Jesucristo giti keruchugaba che geru e gadale gwangerugu ulia, geru e giti che mo ta gbadale suge moge ma ngle trate mo tale ene che mi joge siere Chube gerua uliage, che be chege diali ama gerua ole. 2 Chube geru gbu che enusulian unsuialin ulita alin kwian toidale mine Chube takalin kare. Chube lle boanga ama alin kagu geru e amanu kete kwian ulitage. Geru Chubenu e chegu kiraske, kwian bai kaire me agedu Chube geru e gbu kare, kwian e giti jo ji gbaba tirare ama agedu me no gdale. 3 Nege tangle Chube gerua no ma kiraske Jesucristo giti jo ketaba chege che jwangda siere ji chugege age me no gdale. ¿Agwa gire mineade che gweale kle tañachuge che be chege sugekare ji chugege, ji me joge gbaba tirare che giti kwian unsuialin tangle kare che me Jesucristo gerua e gai ulia giti? Che me ñage tañachuge ai kare ene. Kwian ulita bai kaire me kle Chube gerua Jesucristo giti gai ulia me kle geru Jesucristo giti tallade, kwian e kaire agwe ji chugadale kwian unsuialin tangle kare ama agedu me no gdale. Che Chugagwalla Jesucristo amañabi geru gbu gwangea kwian alin kwian ama gerua gai ulia mo tale gire Jesucristo giti kwian e tien gitiru ji chugege ama agedu me no gdale. Kwian ulita bai geru jun Jesucristoge Jesucristo kledu nga dba ai giti gire, kwian e giti geru chku uñale chege geru Jesucristonu geru no trate ulia. 4 Chube Jesucristo kaire kwian Jesucristo gerua ketanga dabage gbu lle daga ngwale no tanre dodade Chube kiralla giti kwian tanre gwa giti, kaire Chube Oña giti Chube ta ketu kwian ulita ama gerua gaba uliage lle gweale boale ama alin ama takalin kare. E giti sugedale chege Chube gerua Jesucristo giti geru e ulia, che geru e gbadale gdadi no trate mo tale me geru e kagenga ngwale.
Kwian tien gitiru ji chugege age me no gdale Jesucristo alin giti me lle boanga Chube alin giti
5 Chube mi lle boanga Chube alin nga ngaña giti gbe kwian ulita chugagwallale ni lle na ulita chugagwallale dale, agwa chui be chke gire ama be mo Kirolla gdaitre alin Jesucristo gbe kwian ulita Chugagwalla chui tangle diali. Jesucristo ma kweri ma kiraske lle boanga Chube alin nga ngaña giti ulitage. 6 Unsuialin tangle kwian chugagwalla David gerudu Chube ole kwian ulita giti, geru e jo degaba ene:
“Chube, ba kweri no trate, ba kle tai dage kwian ulitage. Ba kle kwian ulita manade no.
Kwian ulita me ñanaske dale, agwa ba no kwian ulita ole.
7-8 Kwian ulita me chege lle boanga ba alin nga ngaña giti kare, kwian ulita chege ma soli amage agwa ba kwian gbu no trate chege kweri, ba lle ulita ba nu dodaba jigu kwian ulita kote kwian chege lle e ulita chugagwallale.”
David chada degu ama gerudu ene Chube ole kwian ulita giti unsuialin tangle, malen chada ai giti suge chege Chube lle ulita ama nu dodaba jigu kwian ulita kote, ama me lle jigu lle boanga ama alin nga ngaña giti kote dale, ni Chube lle gdaite jigu sugekare kwiange, lle ulita chegu kwiange kwian chegu lle ulita chugagwallale. Agwa kaire agwe uñale chege me klebi chegé ulita chada kle degaba kare, nege tangle kwian ulita me kle chege lle ulita chugagwallale dale. 9 Agwa sugedale chege Jesucristo giti lle ulita be chege Chube gerua kle degaba unsuialin tangle gerule kare. Jesucristo ma kweri ma kiraske lle ulitage, bdagli ama be chege lle ulita kwian ulita Chugagwalla kweri. Jesucristo chku nga dba ai giti ama medunga kwian kare ama mo gbu sugetidale ma soli lle boanga Chube alin nga ngaña giti ulitage ama mo gbu salengwli kwian ngwale kare, ene ama ñadu boi daga ngwale kwian kle boi kare. Chube noare kwian ole ulita malen Chube agedu no kwian ulita alin ama mo Kirolla Jesucristo kagu boadalenga daga ngwale jogekeda kwian ulita alin. Jesucristo guleda kwian ulita agenga me no alin, gire e giti Chube ama gbuni naskuni chegeni ma kweri lle ulitage kwian ulita Chugagwalla kweri.
10 Chube nu lle ulita dodaba, lle e ulita kle Chube alin ama gbagda kweri ama ta gbagda nga suga no ole, Chube takalin kwian tanre chege toi ama ole nga ngaña giti ama oliale, malen Chube sugedu moge ama mo Kirolla Jesucristo gbadale boi daga ngwale jogekeda kwian ulita age me no giti, ene Jesucristo ñage chege kwian chudaboanga no kwian jwannga siere ji chugege age me no gdale ene Jesucristo giti kwian chege trate Chube gwa giti ñage toi Chube ole kaire Jesucristo ole nga ngaña giti chui tangle diali Chube takalin kare. 11 Jesucristo kwian gbanga no trate me jiske Chube gwa giti, kwian bai Jesucristo gerua gaba ulia, kwian ene ulita chege trate Chube gwa giti kaire ama ulita chege Chube oliale, Chube chege ama Ñenuale salengwli Chube Jesucristo ole kare. Malen Jesucristo me kle ibule kwian ama gerua ganga gai mo bitallale ulita. 12 Jesucristo gerudu Chube ole kwian chui bdugu ama gerua ganga ulia giti, Chube gerua degaba unsuialin kada Salmos gerule e giti, chada e gerule:
“Chube, ba cha Ñenua, cha be gerule no ba giti kwian ulita cha gerua ganga ole, ama cha bitallale, ama ole cha be gerule no ba giti ba mine, ama ole ule cha be mo gate no ba giti cha ulita kle mo litaba ule gire.”
13 Kaire Chube gerua degaba unsuialin gerule Jesucristo kle Chube gai mo chudaboangale salengwli kwian Chubenu ulita kle Chube gai mo chudaboangale kare, chada kle degaba Jesucristo gerudu giti ene:
“Cha be mo ta gbe kiraske Chube gai ulia cha chudaboangale.”
Kaire chada kle degaba Jesucristo gerudu Chube ole giti ene:
“Cha Ñenua Chube, cha kle ai ule kwian ole kwian bai kaire ba nu ta gbaba cha gai ulia chage cha ole, ama ulita chege ba oliale ule cha ole.”
Chube gerua degaba unsuialin gerule ene Jesucristo giti. 14-15 Kwian ulita bai kaire Jesucristo kle gerule giti kwian ene chege Chube oliale Jesucristo ole ule. Salengwli kwian kle toi u gbaitre alinge gwa ulita mo olia ole kare, e kare ene Jesucristo chegu kwianle salengwli kwian ulita kare, ene ama ñadu jogekeda boi ulita daga ngwale kwian kle boi kare. Agwa Jesucristo jokeda ama jaba chkuni gwade gire e giti ama kirachku che dolla Satanádi, che dolla kwian gbanga age me no Chube dollale malen age me no kbiale kwian ulita kle jogekeda. Jesucristo agedu giti che dolla e me chegu kiraske dale ngeru kare che gbe jogekeda age me no kbiale. Jesucristo kirachku che dolladi, malen kwian me kendalenga dare jogekeda giti, diali kwian ulita chru ole tanre ta kle kennga jogekeda giti ni chru e joge tangle amage, diali ama chege tañachuge jogekeda giti, agwa Jesucristo ta chrule junnga kwian ama gerua gangage, che dolla Satanás amaña kada Diablo me chegu kiraske Jesucristoge.
16-18 Ulia Chube me Jesucristo kagu nga dba ai giti lle boanga Chube alin nga ngaña giti kare lle boanga chudaboale, me ene, agwa Chube Jesucristo kagu nga dba ai giti kwian kare che enusulian oña Abraham oindallaske, Jesucristo ulia kwian malen ama chegu kwian ulita bitallale ene ama ñage kwian ulita chudaboi no. Jesucristo kledu toi kwianske nga dba ai giti gire che dolla Satanás mo chugu ama ole, Satanás tadukalin Jesucristo gbe age me no agwa me ñadu. Jesucristo boidu salengwli daga ngwale nga dba ai giti kwian ulita kle boi kare, ene ñage suge amage kwian kle boi daga ngwale kare gire ama ñage kwian Chubenu ulita chudaboi me age dolla Satanás takalin kare. Jesucristo jokeda kwian ulita jwanle siere ji chugege age me no gdale, ene Jesucristo giti kwian age me no ulita Chube talla mlienga. Ulia ama chegu ulita kwian kare agwa ta no trate ole ene ama ñage chege Chube gwa giti gerunga kwian alin Chube ole ma no trate ma kweri gerunga daba alin na ulitage. Jesucristo tai dage kwian ulitage, Jesucristo kle kwian ulita ama gerua gaba ulia chudaboi diali kwian ta gbe no Chube ole.